આક્ષેપ / સન્માન સમારોહની આડમાં ચાલતા ધર્માંતરણના ખેલનો પર્દાફાશ, જુઓ કાળો ખેલ

Navsari Conversion Case: નવસારી જિલ્લાના સરા ગામમાં એક સન્માન સમારોહને લઈને વિવાદ ઉભો થયો છે. ગામલોકોએ આ કાર્યક્રમની આડમાં ધર્માંતરણની પ્રવૃત્તિ ચાલી હોવાના ગંભીર આક્ષેપો કર્યા છે. આ મામલે ગ્રામજનોએ વંસદા પોલીસ સ્ટેશનમાં લેખિત ફરિયાદ નોંધાવી તપાસ અને કાર્યવાહી કરવાની માંગ કરી છે.

મળતી માહિતી મુજબ સરા ગામમાં એક નિવૃત્ત CRPF જવાનના સન્માન માટે કાર્યક્રમ યોજાયો હતો. પરંતુ કાર્યક્રમ દરમિયાન અચાનક કેટલાક શખ્સો સ્ટેજ પર ચડી ગયા અને ખ્રિસ્તી ધર્મના ગુણગાન ગાવા લાગ્યા. ગ્રામજનોએ આરોપ લગાવ્યો છે કે આ સમગ્ર આયોજન સન્માન સમારોહના બહાને કરવામાં આવ્યું હતું અને પાછળથી ધર્માંતરણનો પ્રયાસ ચાલી રહ્યો હતો.

ગ્રામજનોના જણાવ્યા મુજબ કેટલાક પરપ્રાંતિય પાસ્ટરો અને તેમના સ્થાનિક સાગરીતો દ્વારા આદિવાસી સમાજને ટાર્ગેટ કરીને તેમની માનસિકતા બદલવાનો પ્રયાસ કરવામાં આવી રહ્યો હતો. પોસ્ટર, ભાષણ અને અન્ય માધ્યમો દ્વારા લોકોનું બ્રેઇનવોશ કરવાનો પ્રયાસ કરવામાં આવતો હોવાનો પણ આક્ષેપ છે. આ પ્રવૃત્તિઓ માટે કોઈપણ પ્રકારની સત્તાવાર મંજૂરી લેવામાં આવી ન હતી. જેના કારણે ગામલોકોમાં રોષ ફેલાયો હતો.

આ સમગ્ર ઘટના બાદ ગામલોકોએ એકઠા થઈને વંસદા પોલીસ સ્ટેશનમાં અરજી આપી છે. તેમણે આરોપીઓ સામે કડક કાર્યવાહી કરવાની માંગ કરી છે અને આવા કાર્યક્રમો પર રોક લગાવવાની પણ માંગ ઉઠાવી છે. ખાસ કરીને જવાનોના નામે આવા કારસ્તાન કરવામાં આવી રહ્યા હોવા અંગે પણ લોકોમાં નારાજગી જોવા મળી રહી છે.

આ પણ વાંચો: અંબાજી મંદિરના પૂજા વિવાદ કેસમાં કોર્ટનો ઐતિહાસિક ચુકાદો, જાણો સમગ્ર કેસ

પોલીસ દ્વારા હાલ મામલાની પ્રાથમિક તપાસ શરૂ કરવામાં આવી છે અને તમામ પાસાઓની તપાસ કરવામાં આવી રહી છે. ગામલોકો પણ માંગ કરી રહ્યા છે કે આવા તત્વો સામે કડક પગલાં લેવામાં આવે જેથી ભવિષ્યમાં આવી ઘટનાઓ ફરી ન બને.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ