ગુજરાત / Video: ક્યાંક એક્ટિવા તણાયું, તો ક્યાંક કાર હોડી બની ગઇ, સાંબેલાધાર વરસાદથી સૌરાષ્ટ્રના હાલ બેહાલ

Gujarat Rain Video: ગુજરાતમાં ચોમાસાની ધમાકેદાર એન્ટ્રી થઈ ગઈ છે. છેલ્લા 2 દિવસથી રાજ્યભરમાં વરસાદી માહોલ છવાયેલો છે. પહેલા જ સેશનમાં મેઘરાજાએ ધમાકેદાર શરૂઆત કરી છે. જેને લીધે સૌરાષ્ટ્રમાં જળબંબાકારની સ્થિતિ બની ગઈ છે. કેટલાય વિસ્તારોમાં પાણી ભરાઈ ગયા છે, તો કેટલાક વિસ્તારોમાં પાણી ભરાઈ જતા વાહનો તણાયા હોવાની ઘટના પણ સામે આવી છે. આ ઘટનાના વીડિયો પણ સામે આવ્યા છે.

બોટાદ જિલ્લામાં સર્વત્ર વરસાદથી સ્થાનિક નદી-નાળા છલકાયા છે, બોટાદના રાણપુરના માલણપુર ગામે પાણીના પ્રવાહમાં કાર તણાઈ ગઈ, તો સ્થાનિકોએ બે લોકોને બચાવ્યા.

બોટાદના બરવાળાના ખાંભડા ડેમના 4 દરવાજા ખોલાયા છે, તો પાણી ઉતાવળી નદીમાં છોડવામાં આવ્યું, ત્યારે નદી બે કાંઠે થઈ છે.

ભાવનગરના સિહોર ગામમાં સાંબેલાધાર વરસાદ બાદ પાણી ભરાઈ ગયા, તો પાણીના તેજ પ્રવાહમાં 2 રીક્ષા અને 2 એક્ટિવા તણાઈ ગયા.

ગઢડાની ઘેલો નદી ગાંડીતૂર બની છે,ત્યારે ખોડીયાર મંદિર પાસે નદીના પ્રવાહમાં બાઇકચાલક તણાયો, જેનું JCBથી રેસ્ક્યૂ કરવામાં આવ્યું.

દેવભૂમિ દ્વારકા જિલ્લાના કલ્યાણપુર પંથકમાં મેઘો મહેરબાન થયો છે, ત્યારે ભારે વરસાદ બાદ ખેડૂતોમાં ખુશીની લહેર છવાઈ ગઈ છે.

ભાવનગરના પાલિતાણાના રંડોળા ગામની રજાવળ નદીમાં ઘોડાપૂર આવ્યું, જેમાં એક કાર તણાઈ ગઈ, જો કે કારમાં સવાર પરિવારનો આબાદ બચાવ થયો છે.

ભાવનગરના ઉમરાળામાં મેઘ તાંડવ બાદ દડવા ગામમાં ચારેયકોર પાણી ભરાઈ ગયું છે, જેના કારણે જનજીવન અસ્તવ્યસ્ત થઈ ગયું છે.

દ્વારકાના કલ્યાણપુરમાં હરિપર પ્રાથમિક શાળાના વિદ્યાર્થીઓએ વરસાદની મજા માણી. બાળકોનો આ વીડિયો સોશિયલ મીડિયા પર વાયરલ થઈ રહ્યો છે.

અમરેલીના લીલીયાના ભોરીગડા ગામે GSRTCની બસ પાણીમાં ફસાઈ ગઈ, ત્યારે બસમાં સવાર 20 મુસાફરોનું રેસ્ક્યૂ કરવામાં આવ્યું.

ભાવનગરમાં તડામાર વરસાદ વરસતા નદીઓમાં ઘોડાપૂરની સ્થિતિ સર્જાઈ છે. ગાંડીતૂર બનેલી નદીઓના ભયાવહ દ્રશ્યો સામે આવ્યા છે.

ધોધમાર વરસાદ વરસતા બોટાદની સોસાયટીઓમાં પાણી ભરાઈ ગયા છે. લોકોના ઘરોમાં પાણી ઘૂસી ગયું છે.

અનરાધાર વરસાદ વરસતા બગદાણાના બાપા સીતારામ ધામના રસોઇ ઘરમાં પાણી ફરી વળ્યાં છે.

ભારે પવન સાથે ભાવનગરના ગામડાઓમાં ધોધમાર વરસાદ ખાબક્યો છે. રસ્તાઓ પર નદીઓ વહેતી હોય એવા દ્રશ્યો સામે આવ્યા છે.

આ પણ વાંચો: મન મૂકીને વરસાદનો આનંદ ઉઠાવતા ભૂલકાંઓ કેમેરામાં કેદ, Video જોઇ દિલ ખુશ થઇ જશે

બોટાદના ગઢડામાં 13 ઈંચ વરસાદ વરસતા ઘેલો નદી બે કાંઠે થઈ છે, ત્યારે તેના રમણીય દ્રશ્યો કેમેરામાં કેદ થયા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ