IND vs PAK / ભારત-પાકિસ્તાન વચ્ચે રમાશે 10 વન-ડે, જાણો ક્યાં અને ક્યારે ખેલાશે હાઈવોલ્ટેજ મેચ

ક્રિકેટ જગતની સૌથી રોમાંચક અને ચર્ચાસ્પદ રાઇવલરી એટલે કે ભારત અને પાકિસ્તાન વચ્ચેની મેચોને લઈને એક મોટા સમાચાર સામે આવ્યા છે. આગામી એક વર્ષના સમયગાળા દરમિયાન બંને ટિમો કુલ 10 વનડે મુકાબલાઓમાં આમને-સામને આવી શકે છે. આ બ્લોકબસ્ટર જંગની શરૂઆત આગામી 8 નવેમ્બરથી થવા જઈ રહી છે, જ્યાં ભારતીય યુવા ખેલાડીઓ પાકિસ્તાન સામે મેદાન પર ઉતરશે. આ મહાસંગ્રામમાં ભારતના વિસ્ફોટક યુવા બેટ્સમેનો વૈભવ સૂર્યવંશી અને અભિષેક શર્મા પોતાની આક્રમક બેટિંગથી પાકિસ્તાની બોલરોના પરસેવા છૂટા પાડવા માટે સંપૂર્ણપણે તૈયાર છે. બંને ખેલાડીઓ આ જ મહિને પાકિસ્તાન સામેના મુકાબલામાં પોતાનો જાદુ વિખેરશે.

નવેમ્બર મહિનામાં જ થઈ શકે છે 4 વાર ટક્કર

ભારત અને પાકિસ્તાન વચ્ચેના આ રોમાંચક જંગની શરૂઆત અંડર-19 એશિયા કપથી થવા જઈ રહી છે, જેની પ્રથમ મેચ 8 નવેમ્બરે રમાશે. જો બંને યુવા ટીમો પોતાના શ્રેષ્ઠ પ્રદર્શનના જોરે ફાઇનલ સુધીની સફર ખેડે છે, તો આ ટુર્નામેન્ટમાં જ ભારત અને પાકિસ્તાન વચ્ચે બે વખત ટક્કર જોવા મળી શકે છે.

આ ઉપરાંત, તાજેતરમાં જ રાઇઝિંગ સ્ટાર એશિયા કપ માટે પણ ટીમની જાહેરાત કરવામાં આવી છે, જેમાં વૈભવ સૂર્યવંશી અને અભિષેક શર્મા જેવા પ્રતિભાશાળી યુવા ધુરંધરો રમતા નજરે પડશે. આ ટુર્નામેન્ટમાં ભારત અને પાકિસ્તાન વચ્ચે 22 નવેમ્બરે ત્રીજો વનડે મુકાબલો રમાશે. જો અહીં પણ બંને ટીમો 29 નવેમ્બરે રમાનાર ફાઇનલ સુધી પહોંચવામાં સફળ રહે છે, તો આ ટુર્નામેન્ટમાં પણ બે વાર સામસામે આવવાનું નિશ્ચિત બનશે. આમ, આ શરૂઆતી ટુર્નામેન્ટ્સમાં જ બંને ટીમો કુલ 4 વખત ટકરાઈ શકે છે.

એશિયા કપમાં રમાઈ શકે છે 3 મહામુકાબલા

આગામી વર્ષે જૂન અને જુલાઈ મહિના દરમિયાન એશિયા કપનું આયોજન નિર્ધારિત છે. આગામી વર્ષ વનડે વર્લ્ડ કપનું હોવાના કારણે એશિયા કપ પણ વનડે ફોર્મેટમાં જ રમાશે. જોકે, હજુ સુધી સત્તાવાર શેડ્યૂલ અને ગ્રૂપ્સની જાહેરાત કરવામાં આવી નથી, પરંતુ પરંપરાગત રીતે બંને ટીમોને એક જ ગ્રૂપમાં રાખવામાં આવે છે. એશિયા કપના પ્રવર્તમાન ફોર્મેટ મુજબ ભારત અને પાકિસ્તાનની ટીમો પ્રથમ ગ્રૂપ સ્ટેજમાં, ત્યારબાદ સુપર-4 સ્ટેજમાં અને જો બંનેએ શાનદાર ખેલ દેખાડ્યો તો ફાઇનલમાં એટલે કે કુલ 3 વખત એકબીજા સામે ટકરાઈ શકે છે.

વધુ વાંચો : ''કોર્ટને માછલી બજાર સમજીને રાખી છે?'', જંતર-મંતર પ્રદર્શન સંબંધિત અરજીઓ પર CJIની ફિટકાર

વનડે વર્લ્ડ કપ 2027 માં પણ સર્જાઈ શકે છે 3 જંગ

ક્રિકેટનો મહાકુંભ એટલે કે ICC વનડે વર્લ્ડ કપ 2027 સાઉથ આફ્રિકા, ઝિમ્બાબ્વે અને નામિબિયાની સંયુક્ત યજમાનીમાં રમાવાનો છે. આ મેગા ઇવેન્ટના નવા અને રોમાંચક ફોર્મેટને ધ્યાનમાં લેતા, ભારત અને પાકિસ્તાન વચ્ચે ગ્રૂપ સ્ટેજ, નવા સુપર-7 સ્ટેજ અને ત્યારબાદ નોકઆઉટ કે ફાઇનલ મુકાબલાઓને ભેગા કરીને કુલ 3 વાર મહા-ટક્કર જોવા મળી શકે છે. ભારતીય ટીમ આ આગામી ટૂર્નામેન્ટ્સમાં શાનદાર પ્રદર્શન કરીને પાકિસ્તાન સામેના પોતાના રેકોર્ડને વધુ મજબૂત કરવાના ઇરાદા સાથે મેદાન પર ઉતરશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ