ગાંધીનગર / એક સપ્તાહ પછી ગુજરાત વિધાનસભાની બેઠક આજે બપોરે 12 વાગે, વિવિધ વિભાગોના પ્રશ્નો પર થશે ચર્ચા

Gujarat Assembly Session: એક સપ્તાહના વિરામ બાદ આજે ગુજરાત વિધાનસભાની બેઠક બપોરે 12 વાગ્યે શરૂ થવાની છે. બેઠકની શરૂઆત પ્રશ્નોત્તરી કાળથી થશે. જેમાં વિધાનસભાના સભ્યો સરકારના વિવિધ વિભાગો અંગે પ્રશ્નો પુછશે અને મંત્રીઓ તેની જવાબદારી આપશે. આજે ખાસ કરીને કાનુભાઈ દેસાઇના હસ્તકના કેટલાક મહત્વપૂર્ણ વિભાગો અંગે ચર્ચા થવાની છે. જેમાં ગૃહ વિભાગ, પોલીસ હાઉસિંગ, રમતગમત-યુવા અને સાંસ્કૃતિક પ્રવૃત્તિઓ, ઉદ્યોગ, પ્રવાસન, કાયદો અને ન્યાયતંત્ર તેમજ યાત્રાધામ વિકાસ જેવા વિભાગોનો સમાવેશ થાય છે. આ ચર્ચા દરમિયાન વિધાનસભાના સભ્યો વિવિધ મુદ્દાઓ પર સરકારનું ધ્યાન દોરશે અને જનહિતના પ્રશ્નો ઉઠાવશે.

વિવિધ વિભાગોના પ્રશ્નો પર થશે ચર્ચા

બેઠક દરમિયાન આદિજાતિ વિકાસ અને ખાદી ગ્રામોદ્યોગ વિભાગ સંબંધિત પ્રશ્નો પર પણ ચર્ચા થવાની છે. વિધાનસભામાં સભ્યો દ્વારા તેમના મતવિસ્તાર અને રાજ્યના વિકાસ સાથે જોડાયેલા મુદ્દાઓ ઉઠાવવામાં આવશે. આ ઉપરાંત વિવિધ વિભાગો દ્વારા કરવામાં આવેલા ખર્ચ અને વિકાસકાર્યો અંગે માહિતી પણ માંગવામાં આવશે. સરકારના વિભાગો દ્વારા કરવામાં આવેલા કાર્યો અંગે સભ્યો ચર્ચા કરશે અને જ્યાં જરૂરી હોય ત્યાં સુધારા માટે સૂચનો પણ કરશે. વિધાનસભા બેઠક દરમિયાન રાજ્યના વિકાસ સાથે જોડાયેલા અનેક મહત્વપૂર્ણ મુદ્દાઓ ચર્ચા માટે આવવાની શક્યતા છે.

ઉમરેઠના ધારાસભ્યના નિધન પર શોક પ્રસ્તાવ

પ્રશ્નોત્તરી કાળ પૂર્ણ થયા બાદ રાજ્યના મુખ્યમંત્રી ભૂપેન્દ્ર પટેલ દ્વારા ઉમરેઠના ધારાસભ્ય ગોવિંદ પરમારના નિધન પર શોક દર્શક પ્રસ્તાવ રજૂ કરવામાં આવશે. ગોવિંદ પરમારના અચાનક અવસાનથી રાજકીય અને સામાજિક ક્ષેત્રમાં શોકની લાગણી ફેલાઈ છે. શોક પ્રસ્તાવ દરમિયાન શાસક પક્ષ અને વિપક્ષના સભ્યો પોતાના વિચારો રજૂ કરીને તેમને શ્રદ્ધાંજલિ પાઠવશે. સામાન્ય રીતે આવા પ્રસંગે ગૃહમાં મૌન પાળીને દિવંગત આત્માને શ્રદ્ધાંજલિ આપવામાં આવે છે. શક્યતા છે કે શોક પ્રસ્તાવ બાદ ગૃહને થોડા સમય માટે મુલત્વી પણ રાખવામાં આવે.

આ પણ વાંચો: રાજ્યમાં કાળઝાળ ગરમીની શરૂઆત, IMDનું યલો એલર્ટ, આગામી દિવસોમાં ગરમી વધશે

ખર્ચની માંગણીઓ અને સમિતિઓ અંગે મહત્વપૂર્ણ જાહેરાત

વિધાનસભા બેઠક દરમિયાન વિવિધ વિભાગોના વધારાના ખર્ચ અંગે માંગણીઓ પર ચર્ચા અને મતદાન પણ કરવામાં આવશે. જેમાં સામાન્ય વહીવટ વિભાગ, ઉદ્યોગ વિભાગ, માર્ગ અને મકાન વિભાગ, બંદરો તથા વાહનવ્યવહાર વિભાગ સંબંધિત ખર્ચની માંગણીઓ સામેલ છે. આ સાથે વિધાનસભાના અધ્યક્ષ દ્વારા અંદાજ સમિતિ, જાહેર હિસાબ સમિતિ, પંચાયત સમિતિ તથા જાહેર સાહસોની સમિતિ માટે 15-15 સભ્યોની પસંદગી માટેની ચૂંટણીની જાહેરાત પણ કરવામાં આવશે. આ સમિતિઓ સરકારના ખર્ચ અને કામગીરીની સમીક્ષા કરવા માટે મહત્વપૂર્ણ માનવામાં આવે છે. તેથી આજની વિધાનસભા બેઠક રાજ્યની રાજકીય તેમજ વહીવટી પ્રક્રિયા માટે મહત્વપૂર્ણ ગણાઈ રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ