ગુજરાત / ગુજરાતમાં સિંહોની અવરજવર માટે 11 મુખ્ય કોરિડોરની ઓળખ, રામપરા સુધી 150 કિમીનો નવો સંભવિત કોરિડોર

ગુજરાતમાં એશિયાટિક સિંહોના પરંપરાગત ગીર વિસ્તારની બહારના વિસ્તરણ માટે વધુ એક સંભવિત માર્ગ સામે આવ્યો છે. વાઇલ્ડલાઇફ ઇન્સ્ટિટ્યૂટ ઑફ ઇન્ડિયા (WII) અને ગુજરાત વન વિભાગે શેત્રુંજીથી હિંગોળગઢ થઈ રામપરા સુધીનો આશરે 150 કિમી લાંબો સિંહોના અવરજવરનો કોરિડોર ઓળખી કાઢ્યો છે. આ વિસ્તાર સિંહોની અવરજવર અને ગીર બહાર તેમના સંભવિત વિસ્તરણની દૃષ્ટિએ મહત્વનો બની શકે છે.

રાજકોટ જિલ્લાના હિંગોળગઢથી સુરેન્દ્રનગરના રામપરા સુધી એક સિંહે કરેલી એકલ સફરથી આ સમગ્ર વિસ્તારની જોડાણક્ષમતા અને ગીર બહાર સિંહના સંભવિત વિસ્તરણની શક્યતા તરફ ધ્યાન ગયું હતું. આ કોરિડોરનું મહત્ત્વ નવેમ્બર 2019ની એક ઘટનાથી સામે આવ્યું હતું. ત્યારે એક સિંહ હિંગોળગઢથી ગીરની પરંપરાગત હદની બહાર રામપરા તરફ લગભગ 100 કિમીની સફર કરતો જોવા મળ્યો હતો.

રામપરામાં કાયમી વસવાટનું ક્ષેત્ર બનાવ્યું નહોતું

આ સિંહે રામપરામાં કાયમી વસવાટનું ક્ષેત્ર બનાવ્યું નહોતું. જોકે, અધિકારીઓના જણાવ્યા મુજબ તેની હિલચાલ દર્શાવે છે કે સિંહો નવા પ્રદેશ, શિકાર અને અનુકૂળ રહેઠાણની શોધમાં આ વિસ્તારમાંથી પસાર થઈ શકે છે. સિંહની આ એકલ સફરે ગીર વિસ્તારની બહારના વિસ્તારો સાથે ગીરની જોડાણક્ષમતા અંગે મહત્વપૂર્ણ ધ્યાન દોર્યું હતું. આ સાથે જ ભવિષ્યમાં સિંહો નવા વિસ્તારો તરફ આગળ વધી શકે તેવી સંભાવનાને પણ મહત્વ મળ્યું છે.

સિંહોની અવરજવર માટેના 11 મુખ્ય કોરિડોર ઓળખવામાં આવ્યા

કેન્દ્રીય પર્યાવરણ, વન અને આબોહવા પરિવર્તન મંત્રાલયે જણાવ્યું હતું કે વાઇલ્ડલાઇફ ઇન્સ્ટિટ્યૂટ ઑફ ઇન્ડિયા (WII)ના અભ્યાસમાં ગુજરાતમાં સિંહોની અવરજવર માટેના 11 મુખ્ય કોરિડોર ઓળખવામાં આવ્યા છે. આ પૈકી શેત્રુંજી-હિંગોળગઢ અને હિંગોળગઢ-રામપરા એમ બે જોડાયેલા વિસ્તારો મળીને ગીર બહારનાં રહેઠાણોને જોડતો વધુ વ્યાપક સંભવિત માર્ગ બનાવે છે.

સિંહોની કુદરતી અવરજવર માટે મહત્વપૂર્ણ

આ કોરિડોર સિંહોની કુદરતી અવરજવર માટે મહત્વપૂર્ણ બની શકે છે. ગીરની બહાર સિંહોની સંખ્યા અને તેમનું ભૌગોલિક વિસ્તરણ વધતું જાય ત્યારે નવા રહેઠાણો સાથે ગીર વિસ્તારની જોડાણક્ષમતા પણ મહત્વની બની રહી છે. શેત્રુંજીથી હિંગોળગઢ અને ત્યારબાદ રામપરા સુધીનો આશરે 150 કિમીનો સંભવિત માર્ગ આ દૃષ્ટિએ મહત્વનો ગણાઈ રહ્યો છે.

હિંગોળગઢ-રામપરા અને ગીર-બરડાનો સમાવેશ થાય

અભ્યાસમાં ઓળખાયેલા મુખ્ય કોરિડોરમાં ગીર-ગીરનાર, ગીર-વેરાવળ-સુત્રાપાડા, ગીર-વેરાવળ-સુત્રાપાડા, ગીર-કોડીનાર, ગીર-રાજુલા, ગીર-મિતિયાળા-પાલિતાણા, ગીર-શેત્રુંજી, પાલિતાણા-મહુવા, પાલિતાણા-ભાવનગર, શેત્રુંજી-હિંગોળગઢ, હિંગોળગઢ-રામપરા અને ગીર-બરડાનો સમાવેશ થાય છે.

આ પણ વાંચો : નિકોલમાં તિજોરીમાંથી રૂ.14.39 લાખના દાગીના ગાયબ થવાનું રહસ્ય ખૂલ્યું, પ્રેમીના ડરથી યુવતીએ જ દાગીના કાઢ્યાની કબૂલાત

આ સમગ્ર બાબત એશિયાટિક સિંહોના ગીર બહારના વિસ્તરણની દૃષ્ટિએ મહત્વપૂર્ણ છે. એક તરફ સિંહો નવા પ્રદેશ, શિકાર અને અનુકૂળ રહેઠાણની શોધમાં આગળ વધી શકે છે, તો બીજી તરફ આવા વિસ્તારોને જોડતા સંભવિત કોરિડોરની ઓળખ સિંહોની અવરજવર સમજવામાં મદદરૂપ બની શકે છે. શેત્રુંજી-હિંગોળગઢ અને હિંગોળગઢ-રામપરા વિસ્તારો મળીને ગીર બહારના રહેઠાણોને જોડતો વ્યાપક સંભવિત માર્ગ બની શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ