ગુજરાત / ગ્લાસગોમાં કોમનવેલ્થ ગેમ્સ 2026નું ભવ્ય સમાપન, અમદાવાદને 2030 યજમાનીનો ઐતિહાસિક ગૌરવ

સ્કોટલેન્ડના ગ્લાસગોમાં 11 દિવસ સુધી ચાલેલી 2026 કોમનવેલ્થ ગેમ્સનું રવિવારે શાનદાર સમાપન થયું. આ સાથે ભારત માટે એક ઐતિહાસિક ક્ષણ સર્જાઈ, કારણ કે 2030માં યોજાનારી કોમનવેલ્થ ગેમ્સના શતાબ્દી સંસ્કરણની યજમાની સત્તાવાર રીતે ભારતને સોંપવામાં આવી છે. વર્ષ 2030ની આ પ્રતિષ્ઠિત રમતો ગુજરાતના અમદાવાદમાં યોજાશે. સમાપન સમારોહ દરમિયાન સ્કોટિશ અધિકારીઓએ ભારતીય પ્રતિનિધિમંડળને સત્તાવાર કોમનવેલ્થ ગેમ્સનો ધ્વજ અને દંડૂકો સોંપીને આગામી યજમાન તરીકે ભારતનું સ્વાગત કર્યું હતું.

આ ઐતિહાસિક ક્ષણના સાક્ષી બનવા માટે ઓલિમ્પિક સુવર્ણ ચંદ્રક વિજેતા ભાલા ફેંક ખેલાડી નીરજ ચોપરા, ભારતીય ઓલિમ્પિક સંઘ (IOA)ના પ્રમુખ પી.ટી. ઉષા તેમજ ગુજરાતના નાયબ મુખ્યમંત્રી હર્ષ સંઘવી સ્ટેજ પર ઉપસ્થિત રહ્યા હતા. સમગ્ર સમારોહ દરમિયાન ભારતના પ્રતિનિધિમંડળમાં ઉત્સાહ અને ગૌરવનો માહોલ જોવા મળ્યો હતો. અમદાવાદને મળેલી યજમાની દેશના રમતગમત ક્ષેત્ર માટે એક મહત્વપૂર્ણ સિદ્ધિ માનવામાં આવી રહી છે.

સમાપન સમારોહની શરૂઆત સ્કોટલેન્ડની સમૃદ્ધ અને ઐતિહાસિક સંસ્કૃતિની સુંદર રજૂઆત સાથે થઈ હતી. ત્યારબાદ ભારત અને સ્કોટલેન્ડના સંગીતકારો તેમજ નર્તકો દ્વારા રજૂ કરવામાં આવેલી ઇન્ડો-સ્કોટિશ સાંસ્કૃતિક જુગલબંધી સ્ટેડિયમમાં ઉપસ્થિત હજારો દર્શકો માટે ખાસ આકર્ષણનું કેન્દ્ર બની હતી. બંને દેશોની સંસ્કૃતિનું આ અનોખું મિશ્રણ સમાપન સમારોહને વધુ યાદગાર બનાવી ગયું હતું અને દર્શકોએ તાળીઓના ગડગડાટ સાથે કલાકારોનું સ્વાગત કર્યું હતું.

View this post on Instagram

A post shared by Harsh Sanghavi (@iharshsanghavi)

રમતગમતની દૃષ્ટિએ પણ ભારત માટે આ કોમનવેલ્થ ગેમ્સ ખૂબ સફળ રહી. ભારતીય ખેલાડીઓએ વિવિધ રમતોમાં શાનદાર દેખાવ કરતાં કુલ 39 મેડલ જીત્યા હતા. તેમાં 13 ગોલ્ડ, 17 સિલ્વર અને 9 બ્રોન્ઝ મેડલનો સમાવેશ થાય છે. આ પ્રભાવશાળી પ્રદર્શનના આધારે ભારત મેડલ ટેલીમાં ચોથા સ્થાને રહ્યું હતું. ભારતીય ટીમ ગ્લાસગોથી ગૌરવ અને સંતોષની લાગણી સાથે પરત ફરી રહી છે, કારણ કે ખેલાડીઓએ અનેક સ્પર્ધાઓમાં દેશનું ગૌરવ વધાર્યું હતું.

ગુજરાતના અમદાવાદમાં યોજાવાની હોવાથી રાજ્ય માટે પણ આ ઐતિહાસિક તક

2030ની કોમનવેલ્થ ગેમ્સ ગુજરાતના અમદાવાદમાં યોજાવાની હોવાથી રાજ્ય માટે પણ આ ઐતિહાસિક તક બની છે. વિશ્વભરના ખેલાડીઓ અને રમતપ્રેમીઓ અમદાવાદમાં એકત્રિત થશે, જેના કારણે રમતગમતની સાથે પ્રવાસન, ઇન્ફ્રાસ્ટ્રક્ચર અને વૈશ્વિક ઓળખને પણ મોટો ફાયદો થશે. આગામી ચાર વર્ષ દરમિયાન અમદાવાદમાં રમતગમત માટે આધુનિક સુવિધાઓ અને આંતરરાષ્ટ્રીય ધોરણની તૈયારીઓ પર ખાસ ભાર મૂકવામાં આવશે તેવી અપેક્ષા છે.

આ પણ વાંચો : VIDEO : રસ્તો ધોવાયો તો જાવું કેવી રીતે? લોકોએ શોધી પાડ્યો તોડ, પણ છે ખૂબ જોખમી

ભારત માટે આ યજમાની અનેક રીતે ઐતિહાસિક છે. ઓસ્ટ્રેલિયા પછી ભારત એવો બીજો દેશ બનશે, જે એકથી વધુ વખત કોમનવેલ્થ ગેમ્સનું આયોજન કરશે. અગાઉ ભારતે વર્ષ 2010માં નવી દિલ્હીમાં સફળતાપૂર્વક કોમનવેલ્થ ગેમ્સનું આયોજન કર્યું હતું. હવે 2030માં શતાબ્દી આવૃત્તિનું આયોજન અમદાવાદમાં થવાથી ભારત ફરી એકવાર વૈશ્વિક રમતગમતના મંચ પર પોતાની આયોજન ક્ષમતા અને મહેમાનગતિનું પ્રદર્શન કરશે, જે દેશ માટે ગૌરવની નવી સિદ્ધિ સાબિત થશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ