કારોબાર / મોરબીના સિરામિક ઉદ્યોગને ગેસનો ઝટકો, GELએ નેચરલ ગેસના ભાવ રૂ. 79થી વધારી રૂ.90 કર્યા

મોરબીના સિરામિક ટાઇલ્સ અને સેનેટરીવેર ઉદ્યોગ માટે ઔદ્યોગિક નેચરલ ગેસનો ભાવ વધ્યો છે. ગુજરાત એનર્જી લિમિટેડ (જીઈએલ), જે અગાઉ ગુજરાત ગેસ તરીકે ઓળખાતી હતી, તેણે બીજી સપ્ટેમ્બરથી ગેસના ભાવમાં રૂ. ૧૧નો વધારો કરી રૂ. ૭૯થી રૂ. ૯૦ પ્રતિ સ્ટાન્ડર્ડ ક્યુબિક મીટર (એસસીએમ) કર્યા છે. આ ભાવમાં છ ટકા વેટનો સમાવેશ થાય છે. ભાવવધારાથી મોરબીના સિરામિક ઉત્પાદકોની ચિંતા વધી છે, કારણ કે ઉદ્યોગમાં ઈંધણનો ખર્ચ કુલ ઉત્પાદન ખર્ચના ૩૫થી ૪૦ ટકા જેટલો છે.

ગુજરાત એનર્જી લિમિટેડે લાંબા ગાળાના નેચરલ ગેસ ગ્રાહકો અને સેનેટરીવેર યુનિટને રૂ. ૮/એસસીએમની છૂટ આપી છે. તેથી તેમના માટે સપ્ટેમ્બરનો ભાવ રૂ. ૮૨/એસસીએમ રહેશે. ગુજરાત તથા દાદરા-નગર હવેલીના અન્ય બિન-ટાઇલ્સ ઔદ્યોગિક ગ્રાહકો માટે પણ એમજીઓ આધારિત ભાવ રૂ. ૮૨/એસસીએમ નક્કી કરાયો છે. જોકે ઉદ્યોગકારો તમામ ગ્રાહકોને સમાન રાહત આપવાની માગ કરી રહ્યા છે.

મોરબીમાં ટાઇલ્સ અને સેનેટરીવેર બનાવતાં આશરે ૮૦૦ સિરામિક યુનિટ છે. તેમાંથી લગભગ ૫૫૦ યુનિટ પ્રોપેનનો ઉપયોગ કરે છે. ઓગસ્ટમાં મોરબીના આશરે ૩૫ ટકા ગેસનો પુરવઠો ગુજરાત એનર્જી લિમિટેડ પાસેથી લેવામાં આવ્યો હતો, જ્યારે ૬૫ ટકા જરૂરિયાત પ્રોપેનથી પૂરી થઈ હતી. સપ્ટેમ્બરમાં પ્રોપેનનો હિસ્સો વધીને ૮૦ ટકા થવાની ધારણા છે અને ગુજરાત એનર્જી લિમિટેડનો હિસ્સો ૨૦ ટકા સુધી ઘટી શકે છે.

મોરબી સિરામિક્સ એસોસિયેશનના વોલ ટાઇલ્સ વિભાગના પ્રમુખ નરેન્દ્ર સંઘાતે જણાવ્યું કે હાલ પ્રોપેન સસ્તું હોવાથી માત્ર નેચરલ ગેસ પર આધારિત એકમો માટે નફો જાળવવો મુશ્કેલ બનશે. બીજી તરફ, ઊંચા કન્ટેનર ભાડા અને મર્યાદિત ઉપલબ્ધતા પણ નિકાસકારો માટે પડકાર બની રહ્યા છે.

ઉદ્યોગસૂત્રોના જણાવ્યા મુજબ પશ્ચિમ એશિયાની કટોકટી વકરે તે પહેલાં મોરબીના સિરામિક યુનિટ માટે સરેરાશ ગેસ ભાવ ₹48/SCM હતો. હાલનો ₹90નો ભાવ તેના કરતાં લગભગ 88% વધુ છે. ₹8ની છૂટ મેળવનારા ગ્રાહકો માટે ₹82નો ભાવ પણ કટોકટી પહેલાંના સ્તર કરતાં લગભગ 71% ઊંચો છે.

સિરામિક ઉત્પાદકોના મતે ઊંચા ઈંધણ ખર્ચથી મોરબીની સિરામિક કંપનીઓની સ્થાનિક તેમજ આંતરરાષ્ટ્રીય બજારમાં સ્પર્ધાત્મકતા અને નિકાસ પર અસર થઈ શકે છે. ઉત્પાદકોનું કહેવું છે કે સમાન રાહત મળવાથી વધેલા ઈંધણ ખર્ચનો સામનો કરવામાં મદદ મળશે.