માનહાનિની અરજી / પૂર્વ CM વિજય રૂપાણી પર આક્ષેપો કરનારા કોંગ્રેસ 4 નેતાઓને કોર્ટમાં હાજર થવાનો આદેશ

• પૂર્વ CM વિજય રૂપાણી પર આક્ષેપનો મામલો
• કોંગ્રેસ ચાર નેતાઓને ગાંધીનગર કોર્ટનું સમન્સ
• આણંદપર ગામની 500 કરોડની જમીનમાં હેતુફેરમાં ગોટાળાનો આક્ષેપ

કોંગ્રેસ નેતાઓએ પ્રેસ કોન્ફરન્સ કરી આણંદપર ગામની 500 કરોડની જમીનમાં હેતુફેરમાં ગોટાળાના પૂર્વ CM વિજય રૂપાણી, નીતિન ભારદ્વાજ પર આક્ષેપો કર્યા હતા. આ મામલે કોંગ્રેસ નેતાઓ વિરૂદ્ધ માનહાનિની અરજીને ગાંધીનગર કોર્ટે ગ્રાહ્ય રાખી હતી. CRPCની કલમ 202 મુજબ કાર્યવાહી કરવા અરજીમાં ઉલ્લેખ કરવામાં આવ્યો હતો. ગાંધીનગર કોર્ટે વિરોધ પક્ષના નેતાઓ સુખરામ રાઠવા, શૈલેષ પરમાર અને સી.જે.ચાવડા અને અંગત મદદનીશ વિરોધ પક્ષના કાર્યાલયને કોર્ટમાં હાજર રહેવા સમન્સ પાઠવ્યું છે. 

કોંગ્રેસ નેતાઓએ કર્યા હતા આક્ષેપ

પૂર્વ મુખ્યમંત્રી વિજય રૂપાણી અમેરિકા હતા તે સમયે 22 ફેબ્રુઆરીએ કોંગ્રેસના નેતાઓ દ્વારા વિજય રૂપાણી અને નીતિન ભારદ્વાજ પર આક્ષેપો કરવામાં આવ્યા હતા. કોંગ્રેસ નેતાઓએ 500 કરોડની જમીન કૌભાંડ થયું હોવાનો આરોપ કર્યો હતો. આ મામલે 2 માર્ચે એડવોકેટ અંશ ભારદ્વાજ મારફતે બદનક્ષી બદલ કોંગ્રેસ નેતાઓને નોટીસ મોકલવામાં આવી હતી. જેમાં જણાવાયું હતું કે, કોંગ્રેસના ખોટા આરોપોથી પ્રતિષ્ઠાને મોટું નુકસાન થયું છે, આથી 15 દિવસની અંદર લેખિતમાં માફી માગે અને તમામ આરોપ પરત ખેંચી લે. લેખિત માફી તમામ મીડિયાને મોકલી આપે નહીં તો કોર્ટમાં બદનક્ષીનો કેસ કરવામાં આવશે.

આબરૂ પ્રતિષ્ઠાને નુકશાન પહોંચાડવાનો ગંભીર પ્રકારનો ગુનો કરેલ હોય તેવી દલીલો કરતા નામદાર કોર્ટે આરોપીઓ સામે ફોજદારી કેસ દાખલ કરી આઈ.પી.સી.કલમ 500, 114 અન્વયેના ગુનાની કાર્યવાહી ચલાવવા અને ક્રિમિનલ પ્રોસિઝર કોડની કલમ 204 હેઠળ ફોજદારી કેસ નોંધી સમન્સ ઈશ્યુ કરી તમામને કોર્ટમા હાજર રહેવા આદેશ આપ્યો હતો.