T20 વર્લ્ડ કપ 2024 માટે ટીમ ઈન્ડિયાની જાહેરાત કરવામાં આવી ગઈ છે અને તે 15 ખેલાડીઓના નામ સામે આવ્યા છે, જેઓ આ વર્ષના વર્લ્ડ કપમાં ભારતીય ટીમ તરફથી રમતા જોવા મળશે. આ સાથે 4 ખેલાડીઓને પણ રિઝર્વ તરીકે મોકલવામાં આવ્યા છે. દરમિયાન ભારતમાં અત્યારે IPL ચાલી રહી છે અને તમામ ખેલાડીઓ વધુ સારું પ્રદર્શન કરી રહ્યા છે જેમાંથી માત્ર 15ની જ પસંદગી કરવામાં આવી છે. એવામાં ચાલો જાણીએ કે T20 વર્લ્ડ કપની ટીમમાં કઈ IPL ટીમનું વર્ચસ્વ વધુ છે..
T20 વર્લ્ડ કપ 2024 માટેની ટીમમાં MIનો દબદબો
જૂનમાં યોજાનાર T20 વર્લ્ડ કપ 2024 માટે સૌથી વધુ ખેલાડીઓની પસંદગી કરનાર IPL ટીમ મુંબઈ ઈન્ડિયન્સ છે. રોહિત શર્માને ટીમના કેપ્ટન તો હાર્દિક પંડ્યાને વાઇસ કેપ્ટન બનાવવામાં આવ્યો છે. આ સિવાય સૂર્યકુમાર યાદવ અને જસપ્રિત બુમરાહને પણ વર્લ્ડ કપ ટીમમાં પસંદ કરવામાં આવ્યા છે.
આ ટીમના ત્રણ-ત્રણ ખેલાડીઓને મળી જગ્યા
આ સિવાય T20 વર્લ્ડ કપ માટે રાજસ્થાન રોયલ્સના ત્રણ ખેલાડીઓની પણ ભારતીય ટીમમાં પસંદગી કરવામાં આવી છે. RRના કેપ્ટન સંજુ સેમસન, યશસ્વી જયસ્વાલ અને યુઝવેન્દ્ર ચહલે ટીમમાં જગ્યા બનાવી છે. દિલ્હી કેપિટલ્સના ત્રણ ખેલાડીઓ ઋષભ પંત,અક્ષર પટેલ અને કુલદીપ યાદવને પણ ટીમ ઈન્ડિયામાં એન્ટ્રી મળી છે.
ચેન્નાઈની ટીમના બે તો પંજાબના એક ખેલાડીને મળી એન્ટ્રી
ભારતીય ટીમમાં ચેન્નાઈ સુપર કિંગ્સના શિવમ દુબે અને રવિન્દ્ર જાડેજાની પસંદગી કરવામાં આવી છે. સાથે જ આરસીબી તરફથી બે ખેલાડીઓની પસંદગી કરવામાં આવી છે. જેમાં વિરાટ કોહલી અને મોહમ્મદ સિરાજનું નામ સામેલ છે. તે જ સમયે, પંજાબ કિંગ્સનો એક જ ખેલાડી ભારતીય ટીમમાં જગ્યા બનાવવામાં સફળ રહ્યો છે. તે અર્શદીપ સિંહ છે.
KKR એટલે કે કોલકાતા નાઇટ રાઇડર્સ, સનરાઇઝર્સ હૈદરાબાદ, ગુજરાત ટાઇટન્સ અને LSGમાંથી એક પણ ખેલાડીની પસંદગી કરવામાં આવી નથી. જો કે KKRના રિંકુ સિંહ અને ગુજરાત ટાઇટન્સનો કેપ્ટન શુભમન ગિલ ટીમ સાથે રિઝર્વ ખેલાડી તરીકે જોવા મળશે.
