IPL 2024 Playoffs / સિઝનમાં 7 વાર હાર પછી મુંબઈ પ્લેઓફમાંથી OUT? જાણો શું છે ક્વૉલિફાઈ માટેનું સમીકરણ

IPL 2024 માં મંગળવારે 48મી મેચ લખનૌના એકાના ક્રિકેટ સ્ટેડિયમમાં લખનૌ સુપર જાયન્ટ્સ અને મુંબઈ ઇન્ડિયન્સ વચ્ચે રમાઈ. સુપર જાયન્ટ્સે આ મેચ સરળતાથી જીતી લીધી. આ મેચમાં પ્લેઓફમાં જગ્યા બનાવવા માટે મુંબઈ ઇન્ડિયન્સ માટે જીતવું જરૂરી હતું, પરંતુ આ હાર બાદ મુંબઈ માટે પ્લેઓફનો રસ્તો ઘણો મુશ્કેલ બની ગયો છે.

ક્વોલિફાય થવા માટે મુંબઈ ઇન્ડિયન્સનું સમીકરણ

મુંબઈ ઇન્ડિયન્સ તેની દસમી મેચ હારી ગઈ છે. પ્લેઓફમાં જગ્યા બનાવવા માટે મુંબઈને દસમી મેચથી લઈને સતત પાંચ મેચ જીતવાની હતી. પરંતુ આ પાંચ મેચમાંથી ટીમ એક મેચ હારી ગઈ. જે પછી હવે મુંબઈ ઇન્ડિયન્સ માટે પ્લેઓફમાં ક્વોલિફાય થવાનો રસ્તો ઘણો મુશ્કેલ બની ગયો છે. હવે મુંબઈએ બાકીની ચાર મેચ જીતવી પડશે અને અન્ય ટીમોની હાર માટે પણ પ્રાર્થના કરવી પડશે. કારણ કે જો તેઓ ચારેય મેચ જીતી જાય તો પણ તેમના પોઈન્ટ 14 જ રહેશે.

પોઈન્ટ ટેબલમાં મુંબઈ ઇન્ડિયન્સની સ્થિતિ

પાંચ વખતની IPL ચેમ્પિયન રહેલી મુંબઈની ટીમ આ સિઝનમાં અત્યાર સુધી સારું પ્રદર્શન કરી શકી નથી. હાર્દિક પંડ્યાની કપ્તાનીમાં ટીમે આ સિઝનમાં અત્યાર સુધી 10 મેચ રમી છે, જેમાંથી તેને સાતમાં હારનો સામનો કરવો પડ્યો છે અને માત્ર 3 મેચમાં જ તેને જીત મળી છે. મુંબઈનો નેટ રન રેટ -0.272 અને 6 પોઈન્ટ છે. મુંબઈ ઇન્ડિયન્સ 6 પોઈન્ટ સાથે પોઈન્ટ ટેબલમાં 9માં નંબર પર છે.

વધુ વાંચો: વધી હાર્દિક પંડ્યાની મુશ્કેલી! BCCIએ ફટકાર્યો રૂ. 24 લાખનો દંડ, MIના અન્ય ખેલાડીઓ પણ ઝપેટે ચડ્યાં

પોઈન્ટ ટેબલમાં લખનૌ સુપર જાયન્ટ્સની સ્થિતિ

લખનૌ સુપર જાયન્ટ્સ આ સિઝનમાં પ્લેઓફમાં સ્થાન મેળવવા માટે પ્રબળ દાવેદારોમાંની એક છે. કેએલ રાહુલની કપ્તાનીવાળી ટીમ સતત બે સિઝનમાં પ્લેઓફમાં પહોંચી છે. લખનૌ પણ આ સિઝનમાં અત્યાર સુધીમાં 10 મેચ રમી છે. આ 10 મેચમાં ચાર મેચમાં હાર અને 6 મેચમાં જીત મેળવી છે. સુપર જાયન્ટ્સ પાસે +0.094 નેટ રન રેટ સાથે 12 પોઈન્ટ છે. હાલ લખનૌ પોઈન્ટ ટેબલમાં ત્રીજા સ્થાન પર છે. હવે લખનૌને પ્લેઓફમાં પહોંચવા માટે માત્ર 2 જીતની જરૂર છે. તેની આગામી મેચ કોલકાતા નાઈટ રાઈડર્સ સામે ઘણી મહત્ત્વની રહેશે.