- 12 જ કલાકમાં ત્રણ દેશોમાં ભૂકંપ
- પાપુઆ ન્યુ ગિની, અફઘાનિસ્તાનમાં ભૂકંપ
- જાપાનમાં પણ આવ્યા છે ભૂકંપના આંચકા
દુનિયાના અનેક દેશોમાં ભૂકંપનાં સમાચાર સામે આવી રહ્યા છે. આ દરમિયાન 12 જ કલાકમાં ત્રણ દેશોમાં ભૂકંપ આવ્યો છે. પાપુઆ ન્યુ ગિની, અફઘાનિસ્તાન અને જાપાનમાં ભૂકંપના સમાચાર છે. ભારતના પડોશમાં રવિવારે મોડી રાત્રે ભૂકંપના આંચકા બાદ ગભરાટ ફેલાઈ ગયો હતો. જોકે તેના કારણે કોઈ જાનમાલનું નુકસાન થયું નથી. નેશનલ સેન્ટર ફોર સિસ્મોલોજી (NCS) અનુસાર રવિવારે સવારે 02:14:52 વાગ્યે અફઘાનિસ્તાનના ફૈઝાબાદથી 273 કિમી પૂર્વ ઉત્તરપૂર્વમાં ભૂકંપ આવ્યો હતો. રિક્ટર સ્કેલ પર તેની તીવ્રતા 4.3 માપવામાં આવી હતી.
આ સાથે પાપુઆ ન્યુ ગિનીના ન્યૂ બ્રિટન વિસ્તારમાં ધરતી ધ્રુજારીને કારણે લોકો ભયભીત થઈ ગયા હતા. યુએસ જિયોલોજિકલ સર્વે (યુએસજીએસ)ના અધિકારીઓએ સમાચાર એજન્સીને જણાવ્યું કે ભૂકંપની તીવ્રતા 6.5 માપવામાં આવી છે. હજુ સુધી કોઈ નુકસાનના અહેવાલ નથી.
આ પહેલા શનિવારે જાપાનના હોક્કાઇડો ટાપુના પૂર્વ વિસ્તારમાં ભૂકંપના આંચકા અનુભવાયા હતા. રિક્ટર સ્કેલ પર તેની તીવ્રતા 6.1 માપવામાં આવી હતી. સ્થાનિક અધિકારીઓના જણાવ્યા અનુસાર ભૂકંપના કારણે સુનામીની કોઈ ચેતવણી જારી કરવામાં આવી નથી.
નોંધનીય છે કે, છેલ્લા એક મહિનામાં તુર્કી, સીરિયા, તાજિકિસ્તાન, અફઘાનિસ્તાન, ભારત સહિત વિશ્વના ઘણા દેશોમાં ભૂકંપ આવ્યા છે. તુર્કીમાં ભૂકંપના કારણે અત્યાર સુધીમાં લગભગ 50 હજાર લોકોના મોત થયા છે.
