ચૂંટણી 2024 / બનાસની બાજી: કોંગ્રેસ ઉમેદવાર ગેનીબેનનું ક્ષત્રિય સમાજે ભર્યું મામેરું, જુઓ વીડિયો

લોકસભાની ચૂંટણી મતદાન તારીખ આડે હવે ગણતરીના દિવસો બાકી રહ્યાં છે, ત્યારે બનાસકાંઠા જિલ્લામાં ક્ષત્રિય અસ્મિતા સંમેલન ડીસા ખાતે યોજાયું હતું. જેમાં ક્ષત્રિય સમાજના આગેવાનો ઉપસ્થિત રહ્યા હતા. જે કાર્યક્રમમાં બનાસકાઠામાં લોકસભાના કોંગ્રેસના ઉમેદવાર ગેનીબેનનું ક્ષત્રિય સમાજે મામેરૂ ભર્યુ હતું.

ક્ષત્રિય સમાજે ગેનીબેનનું મામેરૂ ભર્યું

ડીસા ખાતેના ક્ષત્રિય અસ્મિતા સંમેલન દરમિયાન ગેનીબેનનું પરંપરાગત રીતે મામેરૂ ભરાયું હતું. ગેનીબેનને ચૂંદડી ઓઢાડી અને નારિયળ આપી મામેરૂ ભર્યુ હતું. તો બીજી તરફ મામેરૂ ભરવા બદલ ગેનીબેને ક્ષત્રિય સમાજના ભાઇઓના ઓવારણા લીધા હતાં. સંમેલનમાં ગુજરાત પ્રદેશ કોંગ્રેસ પ્રમુખ શક્તિસિંહ ગોહિલ પણ ઉપસ્થિત રહ્યાં હતાં.

શું છે બનાસકાંઠાનું ગણિત?

બનાસકાંઠા લોકસભા મતવિસ્તારમાં 7 વિધાનસભા બેઠકનો સમાવેશ થાય છે. 7 પૈકી 4 બેઠકો ભાજપ પાસે છે જ્યારે 2 બેઠકો કોંગ્રેસ પાસે છે. એક બેઠક અપક્ષ માવજી દેસાઈ ભાજપને સમર્થન આપી ચૂક્યા છે. સાત બેઠકો પૈકી દાંતા સીટ સિવાય અન્ય તમામ સીટ સામાન્ય છે. દાંતા બેઠક અનુસૂચિત જનજાતિ માટે અનામત છે. કોંગ્રેસના લોકસભા બેઠકના ઉમેદવાર ગેનીબેન ઠાકર વાવ બેઠક પરથી ધારાસભ્ય છે. ધાનેરા બેઠક અપક્ષ પાસે છે, દાંતા બેઠક પણ કોંગ્રેસ પાસે છે. બાકીની ચાર બેઠકો ભાજપના કબજામાં છે.

વાંચવા જેવું: કોવિશીલ્ડ રસી લીધી હોય તો ડૉક્ટરની આ સલાહ માનજો, જાણો ડૉ.તુષાર પટેલે શું કહ્યું

અગાઉ આ બેઠક કોંગ્રેસનો ગઢ હતી

સરહદી જિલ્લા બનાસકાંઠામાં 1951થી લઈને 2019 સુધીમાં કુલ 19 વખત લોકસભાની ચૂંટણી યોજાઈ છે. 2013ની પેટાચૂંટણીમાં ભાજપે બનાસકાંઠા બેઠક પર ચોથી વખત જીત મેળવી હતી. ત્યારથી આ સીટ ભાજપના કબજામાં છે. આ બેઠક પર ભાજપે છ વખત જીત મેળવી છે જ્યારે કોંગ્રેસે 10 વખત જીત મેળવી છે. આ સીટ સ્વતંત્ર પાર્ટી, જનતા પાર્ટી અને પછી જનતા દળ એકએક વાર જીતી ચુક્યુ છે. 2019ની લોકસભા ચૂંટણીમાં ભાજપે આ સીટ 3,68,296 વોટથી જીતી હતી. ભાજપના ઉમેદવાર પરબતભાઈ પટેલે કોંગ્રેસને હરાવ્યા હતા, આ વખતે ભાજપે ફેરફાર કરીને રેખા ચૌધરીને અહીંથી મેદાનમાં ઉતાર્યા છે.