અમદાવાદ / કોવિશીલ્ડ રસી લીધી હોય તો ડૉક્ટરની આ સલાહ માનજો, જાણો ડૉ.તુષાર પટેલે શું કહ્યું

કોરોનાની દવા બનાવતી બ્રિટિશ ફાર્માસ્યુટિકલ કંપની એસ્ટ્રાઝેનેકાએ UKની કાર્ટમાં કોવિશીલ્ડ વેક્સિનની આડઅસર થતી હોવાનો સ્વીકાર કર્યો છે. જે બાદ કોવિશીલ્ડ વેક્સિન લેનારા તમામ લોકોમાં ભયનો માહોલ જોવા મળી રહ્યો છે, ત્યારે અમદાવાદના ડૉક્ટર તુષાર પટેલે આ મામલે પ્રતિક્રિયા આપી છે.

કોવિશીલ્ડની આડઅસર મામલે બોલ્યા ડૉ.તુષાર પટેલ

તેમણે કહ્યું કે, આડઅસરના સમાચારથી લોકોને ગભરાવાની જરૂર નથી. વેક્સિનના કારણે જ હાર્ટએટેકની ઘટનામાં વધારો થયો, તે વાતમાં બિલકુલ તથ્ય નથી. હાર્ટ એટેકના બનાવ પહેલા પણ બનતા હતા, પરંતુ સામે આવતા નહતા. જેથી લોકોએ વેક્સિનની આડઅસરથી ગભરાવાને બદલે ઓબ્ઝર્વ કરવાની જરૂર છે. વધુમાં તેમણે કહ્યું કે, દરેક વેક્સિનમાં આડઅસર જોવા મળે છે.

વાંચવા જેવું: ગૌણ સેવા મંડળે મોકૂફ પરીક્ષાની નવી તારીખો કરી જાહેર, આ તારીખથી નીકળશે કોલલેટર

"બદલાયેલી જીવનશૈલીથી વધ્યા હાર્ટએટેકના બનાવ"

ડૉક્ટર તુષાર પટેલે કહ્યું કે, આ વેક્સિન બહુ ટૂંકા પરિક્ષણો બાદ માર્કેટમાં આવી હતી. જેથી આપણે એ પણ ભૂલવું ન જોઈએ કે, વેક્સિનના કારણે અનેક લોકોના જીવ બચ્યા છે. વધુમાં હાર્ટ એટેક મામલે તેમણે કહ્યું કે, વેક્સિનના કારણે નહીં પરંતુ, ફાસ્ટ ફૂડ, જંગફૂડ અને બદલાયેલી જીવનશૈલીના કારણે યુવાનોમાં હાર્ટએટેક આવવાના પ્રમાણમાં વધારો થયો છે.