લોકસભા ચૂંટણી 2024 / ભારતની નાગરિકતા મળ્યા બાદ અક્ષય કુમારે કર્યું પ્રથમ મતદાન, કરી જનતાને અપીલ

લોકસભા ચૂંટણી 2024ના 5મા તબક્કામાં 8 રાજ્યો અને કેન્દ્રશાસિત પ્રદેશોની 49 લોકસભા બેઠકો પર મતદાન થઈ રહ્યું છે. પાંચમા તબક્કામાં મહારાષ્ટ્રની 13, ઉત્તર પ્રદેશની 14, પશ્ચિમ બંગાળની 7, બિહારની 5, ઝારખંડની 3 અને ઓડિશાની 5 બેઠકો પર મતદાન થઈ રહ્યું છે. સાથે જ આ તબક્કામાં જમ્મુ-કાશ્મીર અને લદ્દાખમાં એક-એક સીટ પર મતદાન થઈ રહ્યું છે.

આજે મહારાષ્ટ્રમાં મતદાન થઈ રહ્યું છે અને બોલિવૂડ ખેલાડી કુમારે પહેલી વખત મતદાન કર્યું છે. ભારતીય નાગરિકતા મળ્યા બાદ પ્રથમ વખત મતદાન કરવા અંગે અક્ષય કુમારે કહ્યું કે,' હું ઈચ્છું છું કે ભારત વિકસિત અને મજબૂત રહે. મારો મત આના પર આધારિત છે. પહેલી વખત મતદાન કરીને સારું લાગ્યું..'

આ સિવાય અભિનેતા ફરહાન અખ્તર અને ઝોયા અખ્તરે પણ વોટ આપ્યો છે.

મહારાષ્ટ્રમાં આજે ભિવંડી, ડિંડોરી, ધુલે, નાસિક, પાલઘર, કલ્યાણ, થાણે, મુંબઈ નોર્થ, મુંબઈ નોર્થ-વેસ્ટ, મુંબઈ નોર્થ ઈસ્ટ, મુંબઈ નોર્થ સેન્ટ્રલ, મુંબઈ સાઉથ સેન્ટ્રલ અને મુંબઈ સાઉથની લોકસભા બેઠકોનો સમાવેશ થાય છે. મુંબઈમાં લોકસભાની 6 બેઠકો છે. આ તમામ બેઠકો પર મતદાન થવાનું છે. કેન્દ્રીય મંત્રી પીયૂષ ગોયલ, ભારતી પવાર, મહારાષ્ટ્રના સીએમ એકનાથ શિંદેના પુત્ર શ્રીકાંત શિંદે અને ઉજ્જવલ નિકમ જેવા દિગ્ગજ નેતાઓ મેદાનમાં છે.

વધુ વાંચો: 49 બેઠકો, 695 ઉમેદવારો, 9 કરોડ મતદાતા, આજે પાંચમા તબક્કાનું વોટિંગ, આ દિગ્ગજો મેદાનમાં

આ સિવાય 5મા તબક્કાની આ ચૂંટણીમાં રાહુલ ગાંધી, સ્મૃતિ ઈરાની, રક્ષા મંત્રી રાજનાથ સિંહ, ઓમર અબ્દુલ્લા, ચિરાગ પાસવાન, પીયૂષ ગોયલ અને રાજીવ પ્રતાપ રૂડી પણ સામેલ છે. આ સિવાય આરજેડીની રોહિણી આચાર્યના ભાવિનો પણ આજે નિર્ણય થવાનો છે. રાયબરેલી બેઠક પર પણ આજે મતદાન થઈ રહ્યું છે. સાથે જ રક્ષા મંત્રી રાજનાથ સિંહ લખનૌ સીટ પરથી ત્રીજી વખત ચૂંટણી લડી રહ્યા છે.