- જ્ઞાનવાપી મામલે ધીરેન્દ્ર શાસ્ત્રીનું નિવેદન
- કહ્યું, જ્ઞાનવાપી ભગવાન શિવનું મંદિર છે
- "જ્ઞાનવાપી કોઈ મસ્જિદ નથી, તેને મસ્જિદ ન કહેવું"
મધ્યપ્રદેશનાં છિંદવાડામાં રામકથા કરવા પહોંચેલા બાગેશ્વર ધામ સરકારનાં કથવાચક ધીરેન્દ્ર શાસ્ત્રીએ જ્ઞાનવાપીને લઈને મોટું નિવેદન આપ્યું છે. સોમવારે જ્યારે તેમને જ્ઞાનવાપી મામલે સવાલ પૂછવામાં આવ્યો ત્યારે તેમણે કહ્યું કે જ્ઞાનવાપી કોઈ મસ્જિદ નથી, તે ભગવાન શિવનું મંદિર છે. તેને મસ્જિદ કહેવાનું બંધ કરો"
"જે બાલાજીનાં છે તે અમારાં છે"
ધીરેન્દ્ર શાસ્ત્રીએ આગામી MPની ચૂંટણીને લઈને કહ્યું કે," અમે રાજનીતિનાં માણસ નથી, અમને આ બધાંથી દૂર રાખો." આ સિવાય તેમણે કહ્યું કે," તેમને છિંદવાડા આવીને સારું લાગ્યું. તેઓ હંમેશા બધી જગ્યાએ જાય છે. કમલનાથજી ધામ પણ ગયાં છે. સનાતન બધાનું છે. અને અમારા માટે બધાં સમાન છે, સમગ્ર વિશ્વ એકસમાન છે. જે બાલાજીનાં છે તે અમારાં છે. "
ધીરેન્દ્ર શાસ્ત્રીને કમલનાથ પોતાના ઘરે લઈ ગયાં
ધીરેન્દ્ર શાસ્ત્રી જ્યારે છિંદવાડા પહોંચ્યા ત્યારે તેમના સ્વાગત માટે કમલનાથ પોતે અને તેમનો પુત્ર નકુલનાથ એરપોર્ટ પહોંચ્યાં હતાં. એરપોર્ટથી કમલનાથ ધીરેન્દ્ર શાસ્ત્રીને પોતાના ઘરે લઈ ગયાં. ઘરે જ તેમનું તિલક લગાવી સ્વાગત કરવામાં આવ્યું.
પહેલી વખત કોઈ કોંગ્રેસ નેતાએ કરાવી શાસ્ત્રીની કથા
છિંદવાડાનાં સિમરિયામાં ધીરેન્દ્ર શાસ્ત્રીની રામકથા માટે આશરે 25 એકર જમીન ભાડે લેવામાં આવી હતી. સિમરિયામાં જ કમલનાથે 108 ફુટ ઊંચી હનુમાનજીની મૂર્તિ બનાવડાવી હતી જેની સાથે એક મંદિર પણ બનાવ્યું હતું. આ મંદિરની પાસે જ રામકથાનું આયોજન કરવામાં આવ્યું. છિંદવાડાની મારુતિ નંદન સેવા સમિતિનાં સંયોજક આનંદ બખ્શી, પૂર્વ મુખ્યમંત્રી કમલનાથ અને સાંસદ નકુલનાથ ધીરેન્દ્ર શાસ્ત્રીની કથા આયોજિત કરવા માટે ઘણાં સમયથી મહેનત કરી રહ્યાં હતાં. એવું પહેલીવાર બની રહ્યું છે કે કોઈ કોંગ્રેસી નેતા ધીરેન્દ્ર શાસ્ત્રીની કથાનું આયોજન કરી રહ્યું હોય.
