IPL 2024ની શરૂઆતના એક દિવસ પહેલા જ મહેન્દ્રસિંહ ધોનીએ ફરી એકવાર ચેન્નાઈ સુપર કિંગ્સની કેપ્ટન્સી છોડીને બધાને ચોંકાવી દીધા છે. ધોની આટલા મોટા નિર્ણયો ખૂબ જ શાંતિથી લે છે, ટીમ મેનેજમેન્ટને પણ ખબર નથી કે તેના મગજમાં શું ચાલી રહ્યું છે. તાજેતરમાં ચેન્નાઈ સુપર કિંગ્સના સીઈઓ કાશી વિશ્વનાથે ખુલાસો કર્યો છે કે તેઓ ધોનીના કેપ્ટનશિપ છોડવાના નિર્ણય વિશે જાણતા ન હતા. આઈપીએલ 2024ના કેપ્ટનના ફોટોશૂટ પહેલા તેને આ વાતની જાણ થઈ હતી. તમને જણાવી દઈએ કે ધોનીએ કેપ્ટનશીપ છોડ્યા બાદ CSKએ રુતુરાજ ગાયકવાડને પોતાના લીડર તરીકે પસંદ કર્યા છે.
ટીમને રેકોર્ડ 5 વખત ચેમ્પિયન બનાવી
ન્યૂઝ એજન્સી પીટીઆઈ સાથે વાત કરતા સીએસકેના સીઈઓ કાસી વિશ્વનાથને ખુલાસો કર્યો કે ધોનીએ ચેન્નાઈમાં આઈપીએલ ઈવેન્ટ પહેલા આ નિર્ણય તેમની સાથે શેર કર્યો હતો. CSKના CEO વિશ્વનાથને કહ્યું, "ધોની જે પણ કરે છે તે ટીમના હિતમાં છે. મને તેના નિર્ણય વિશે કેપ્ટનોની બેઠક પહેલા જ ખબર પડી હતી. તેના નિર્ણયનું સન્માન કરવું પડશે, તે તેનો નિર્ણય છે." આ બીજી વખત છે જ્યારે માહીએ ચેન્નાઈ સુપર કિંગ્સની કેપ્ટન્સી છોડવાનો નિર્ણય કર્યો છે. ધોની IPL 2008થી CSKની કેપ્ટનશીપ કરી રહ્યો છે. આ સમયગાળા દરમિયાન તેણે પોતાની ટીમને રેકોર્ડ 5 વખત ચેમ્પિયન બનાવી છે.
ગાયકવાડ જવાબદારી કેવી રીતે સંભાળશે
ધોનીએ સૌથી પહેલા IPL 2022માં ટીમની કેપ્ટનશીપ છોડી હતી. ત્યારે રવિન્દ્ર જાડેજાએ તેનું સ્થાન લીધુ હતું. જો કે જાડેજા કેપ્ટનશિપનો આ બોજ સંભાળી શક્યો ન હતો અને તેણે સિઝનના વચમાં આ જવાબદારી ફરી ધોનીને સોંપી દીધી હતી. હવે જોવાનું એ રહે છે કે ગાયકવાડ CSKની લગામ કેવી રીતે સંભાળે છે. તે કેપ્ટનશિપનું દબાણ કેવી રીતે સહન કરે છે? ચેન્નાઈ સુપર કિંગ્સ તેની પ્રથમ IPL 2024 મેચ આજે એટલે કે 22 માર્ચે RCB સામે રમવા જઈ રહી છે.
VTV Gujarati Newsની તમામ અપડેટ સૌથી પહેલા મેળવવા માટે અમારી WhatsApp ચેનલ ફોલો કરો
