ક્રિકેટ / IND vs ENG: કાર્ડિફમાં ગરજે છે રોહિત-કોહલીનું બેટ, માત્ર આ એક આંકડો આપે છે ટેન્શન

ભારત અને ઇંગ્લેન્ડ વચ્ચે બીજી વન-ડે મેચ ગુરુવારે કાર્ડિફના મેદાન પર રમાશે. આ મેચ ભારતીય સમય અનુસાર સાંજે 5:30 વાગ્યે શરૂ થશે, જ્યારે ટોસ અડધો કલાક પહેલા એટલે કે સાંજે 5:00 વાગ્યે થશે. એજબેસ્ટન વન-ડેમાં શાનદાર જીત મેળવ્યા બાદ ભારતીય ટીમ જો આ મેચ જીતશે તો સિરીઝ પણ પોતાના નામે કરી લેશે.

કાર્ડિફમાં ભારત અને ઇંગ્લેન્ડનો રેકોર્ડ

કાર્ડિફનું આ મેદાન એક રીતે ઇંગ્લેન્ડનો મજબૂત ગઢ માનવામાં આવે છે, જ્યાં વર્ષ 2010 થી અત્યાર સુધી રમાયેલી 14 વન-ડે મેચોમાંથી ઇંગ્લેન્ડે 10 મેચો જીતી છે. જોકે, આ મેદાન પર ભારતીય ટીમનો રેકોર્ડ પણ ઘણો મજબૂત છે. ભારતે અહીં રમેલી 4 મેચોમાંથી 3-1 થી જીત મેળવી છે. વર્ષ 2011 માં ભારત અહીં ઇંગ્લેન્ડ સામે 6 વિકેટથી હારી ગયું હતું, પરંતુ તેના 3 વર્ષ બાદ એટલે કે વર્ષ 2014 માં ભારતે જોરદાર વાપસી કરીને ઇંગ્લેન્ડને 133 રનથી હરાવ્યું હતું. આ સિવાય ભારતે વર્ષ 2013 માં આ જ મેદાન પર શ્રીલંકા અને સાઉથ આફ્રિકા બંને ટીમોને ધૂળ ચટાડી હતી. એટલે કે શરૂઆતની એક હાર બાદ ભારતે અહીં સતત ત્રણેય વન-ડે જીત્યા છે.

ભારતીય ખેલાડીઓનો કાર્ડિફમાં રેકોર્ડ

ટીમ ઇન્ડિયા આશરે 12 વર્ષ બાદ આ મેદાન પર વન-ડે મેચ રમવા જઈ રહી છે, તેથી ઘણા વર્તમાન ખેલાડીઓ માટે અહીં વન-ડે ફોર્મેટમાં રમવાનો અનુભવ સાવ નવો હશે. જોકે, કેપ્ટન શુભમન ગિલ સપ્ટેમ્બર 2022 માં ગ્લેમોર્ગનના વિદેશી ખેલાડી તરીકે અહીં 3 મેચ રમી ચૂક્યા છે, પણ વન-ડે ફોર્મેટમાં તેમનો આ પ્રથમ અનુભવ હશે.

વિરાટ કોહલી: ભારતીય ટીમ વતી વિરાટ કોહલી અહીં તમામ 4 વન-ડે મેચ રમ્યા છે. તેમણે 4 મેચોમાં 65.33 ની સરેરાશ અને 97.51 ના સ્ટ્રાઇક રેટથી 196 રન બનાવ્યા છે, જેમાં 1 સદી અને 1 અર્ધસદી સામેલ છે.

રોહિત શર્મા: રોહિત શર્માએ અહીં 3 વન-ડે મેચોમાં 50 ની એવરેજ અને 68.80 ના સ્ટ્રાઇક રેટથી 150 રન બનાવ્યા છે.

સૌથી મોટી ચિંતા: વર્તમાન ભારતીય ટીમની બોલિંગ લાઇનઅપમાં એક પણ એવો બોલર નથી જેને કાર્ડિફમાં વન-ડે રમવાનો અનુભવ હોય. આ મેદાન પર ભારતના સૌથી સફળ બોલર રવીન્દ્ર જાડેજા છે, જેમણે 4 મેચમાં 8 વિકેટ ઝડપી છે, પરંતુ તેઓ હાલના સ્ક્વોડનો હિસ્સો નથી.

બંને ટીમોની સંભવિત પ્લેઇંગ 11 (Probable Playing 11):

ભારત: શુભમન ગિલ(કેપ્ટન), રોહિત શર્મા, વિરાટ કોહલી, શ્રેયસ અય્યર, વોશિંગ્ટન સુંદર, કે.એલ. રાહુલ (વિકેટકીપર), અક્ષર પટેલ, શિવમ દુબે, પ્રસિદ્ધ ક્રિષ્ણા, જસપ્રિત બુમરાહ, ગુરનૂર બ્રાર / પ્રિન્સ યાદવ / અર્શદીપ સિંહ.

ઇંગ્લેન્ડ: બેન ડકેટ, જેકબ બેથલ, જો રૂટ, હેરી બ્રુક (કેપ્ટન), જોસ બટલર (વિકેટકીપર), સેમ કરન, વિલ જેક્સ, જોફ્રા આર્ચર, જોશ ટંગ / બ્રાઇડન કાર્સે, સાકિબ મહમૂદ, આદિલ રશીદ.

આ પણ વાંચોઃ ઈજાગ્રસ્ત શુભમન ગિલ બીજી વનડે નહીં રમે, કોણ હશે ટીમનો કેપ્ટન?

બંને ટીમોનો સંપૂર્ણ વન-ડે સ્ક્વોડ

ટીમ ઇન્ડિયા: રોહિત શર્મા, શુભમન ગિલ (કેપ્ટન), વિરાટ કોહલી, શ્રેયસ અય્યર, કે.એલ. રાહુલ, ઇશાન કિશન, અક્ષર પટેલ, વોશિંગ્ટન સુંદર, કુલદીપ યાદવ, જસપ્રિત બુમરાહ, અર્શદીપ સિંહ, ગુરનૂર બ્રાર, પ્રિન્સ યાદવ, શિવમ દુબે, પ્રસિદ્ધ ક્રિષ્ણા.

ઇંગ્લેન્ડ: બેન ડકેટ, વિલ જેક્સ, જો રૂટ, હેરી બ્રુક (કેપ્ટન), જોસ બટલર, જેકબ બેથલ, સેમ કરન, લિયામ ડોસન, જોફ્રા આર્ચર, આદિલ રશીદ, સાકિબ મહમૂદ, ટોમ બેન્ટન, જોશ ટંગ, ગસ એટકિન્સન, જેમ્સ કોલ્સ, રેહાન અહેમદ.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ