બિઝનેસ / વિશ્વભરમાં હલચલ મચાવશે ભારતની આ 3 મોટી બેંકો, જુઓ કોને કરી ભવિષ્યવાણી

શું ભારતમાં એવી બેંકો ઉભી થઈ રહી છે જે વિશ્વની સૌથી મોટી બેંકોને ટક્કર આપશે? સ્ટેટ બેંક ઓફ ઈન્ડિયા (SBI)ના ચેરમેન C.S. શેટ્ટીએ તાજેતરમાં આપેલા નિવેદનથી આ સવાલ વધુ ચર્ચામાં આવ્યો છે. તેમણે કહ્યું છે કે 2030 સુધીમાં SBI સહિત ભારતની બે ખાનગી બેંકો વિશ્વની ટોચની 10 બેંકોની યાદીમાં સામેલ થશે.

શુક્રવારે એક કાર્યક્રમ દરમિયાન પત્રકારો સાથે વાત કરતાં શેટ્ટીએ કહ્યું કે, “SBIનું બજાર મૂડીકરણ હવે $100 બિલિયનને વટાવી ગયું છે. માત્ર SBI જ નહીં, પણ બે મોટી ખાનગી બેંકો પણ છે જેઓ ઝડપથી આગળ વધી રહી છે. મને વિશ્વાસ છે કે 2030 સુધીમાં ત્રણેય બેંકો વિશ્વની ટોચની યાદીમાં હશે.” શેટ્ટીએ જો કે આ બે ખાનગી બેંકોના નામ જાહેર કર્યા નથી, પરંતુ બજારના નિષ્ણાતો માને છે કે તે બે બેંકો HDFC બેંક અને ICICI બેંક છે.

દેશની સૌથી મૂલ્યવાન બેંક

હાલમાં ખાનગી ક્ષેત્રની HDFC બેંક ₹15.11 લાખ કરોડના બજાર મૂલ્યાંકન સાથે દેશની સૌથી મૂલ્યવાન બેંક છે. જ્યારે ICICI બેંક ₹9.59 લાખ કરોડના મૂલ્યાંકન સાથે બીજા સ્થાને છે. SBIનું બજાર મૂડીકરણ ₹8.82 લાખ કરોડ છે. SBI હાલમાં સંપત્તિની દ્રષ્ટિએ ભારતની સૌથી મોટી બેંક છે, પણ વૈશ્વિક સ્તરે તે 43મા ક્રમે છે. શેટ્ટીનો દાવો છે કે SBIનું લક્ષ્ય 2030 સુધીમાં ટોચની 10 વૈશ્વિક બેંકોમાં સ્થાન મેળવવાનું છે.

“ભારતને મોટી અને વિશ્વસ્તરીય બેંકોની જરૂર છે”

SBI ચેરમેનનું નિવેદન એવા સમયે આવ્યું છે જ્યારે ભારત સરકાર મોટી બેંકો ઉભી કરવા માટે નાના બેંકોના વિલીનીકરણ પર કામ કરી રહી છે. નાણામંત્રી નિર્મલા સીતારમણે પણ તાજેતરમાં કહ્યું હતું કે “ભારતને એવી મોટી બેંકોની જરૂર છે જે વિશ્વના સ્તરે સ્પર્ધા કરી શકે.”

તાજેતરમાં ₹25,000 કરોડની મૂડી

શેટ્ટીએ વધુમાં જણાવ્યું કે SBIએ તાજેતરમાં ₹25,000 કરોડની મૂડી એકત્ર કરવાની પ્રક્રિયા શરૂ કરી છે. તેમણે સ્પષ્ટ કર્યું કે આ મૂડી વિકાસ માટે નહીં, પરંતુ બેંકિંગ ઉદ્યોગને વિશ્વાસ આપવા માટે છે કે SBIની મૂડી બફર સ્થિતિ મજબૂત છે. શેટ્ટીએ કહ્યું કે વર્ષના અંત સુધી SBIનો મૂડી પર્યાપ્તતા ગુણોત્તર 15% થી ઉપર રહેશે, જ્યારે બેંકનું લક્ષ્ય 12% થી ઉપર મુખ્ય ટાયર-1 મૂડી સ્તર જાળવી રાખવાનું છે.

આ પણ વાંચો : આજે બેંકો ખુલ્લી રહેશે કે બંધ? બ્રાન્ચે જતા પહેલા લિસ્ટ પર નજર મારી લેજો

તેમણે એ પણ જણાવ્યું કે એન્જિનિયરિંગ સ્નાતકોમાં SBIમાં નોકરી માટે વધતી રુચિ બેંક માટે ફાયદાકારક સાબિત થઈ છે. ટેકનોલોજી અને નવી પ્રતિભાનો સંયોજન SBIને ભવિષ્ય માટે વધુ મજબૂત બનાવી રહ્યો છે. આ રીતે, SBI અને અન્ય ખાનગી બેંકોના વધતા મૂલ્યાંકન અને મજબૂત નીતિઓ જોઈને સ્પષ્ટ થાય છે કે ભારતની બેંકો વિશ્વના બેંકિંગ નકશામાં પોતાનું મહત્વપૂર્ણ સ્થાન બનાવવા તરફ વધી રહી છે. 2030 સુધીમાં શું SBI ખરેખર વિશ્વની ટોચની 10 બેંકોમાં સ્થાન મેળવે છે? એ જોવું રસપ્રદ રહેશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ