મનોરંજન / સલમાન ખાનને પાન-મસાલાનું બ્રાન્ડિંગ ભારે પડ્યું, કાયદાકીય પેચમાં ફસાયો ભાઈજાન, કોર્ટે ફટકારી નોટિસ

બોલિવુડના સુપરસ્ટાર સલમાન ખાન હંમેશા પોતાના મોટા બ્રાન્ડ એન્ડોર્સમેન્ટ માટે જાણીતા છે. પરંતુ આ વખતે એક જાહેરાતને કારણે તેઓ કાનૂની મુશ્કેલીમાં ફસાઈ ગયા છે. કોટાની ગ્રાહક અદાલતે સલમાન ખાનને નોટિસ જારી કરી છે, જે બાદથી સોશિયલ મીડિયા પર ચર્ચાનો માહોલ ગરમાયો છે.

આ મામલો એક એલચી પ્રોડક્ટની જાહેરાતનો છે. ફરિયાદકર્તા મુજબ, આ જાહેરાત ગ્રાહકોને ગેરમાર્ગે દોરે છે. આ ફરિયાદ ભાજપના નેતા અને રાજસ્થાન હાઈકોર્ટના એડવોકેટ ઈન્દર મોહન સિંહ હનીએ દાખલ કરી છે. તેમણે અદાલતમાં દલીલ કરી છે કે જાહેરાતમાં એવો દાવો કરવામાં આવ્યો છે કે ઉત્પાદન “એલચી અને કેસર ભેળવેલું પાન મસાલા” છે, પરંતુ તેની કિંમત ફક્ત ₹5 છે — જે શક્ય નથી.

સમ્રગ મામલો

એડવોકેટના કહેવા પ્રમાણે, કેસરની કિંમત પ્રતિ કિલોગ્રામ રૂ. 4 લાખ જેટલી છે, એટલે ₹5ના પેકેટમાં કેસરનો ઉપયોગ શક્ય નથી. આ રીતે ગ્રાહકોને ભ્રમિત કરવામાં આવી રહ્યા છે. ઉપરાંત, તેઓએ દાવો કર્યો કે આવી જાહેરાતો યુવાનોને પાન મસાલા ખાવા માટે પ્રોત્સાહિત કરે છે, જે સ્વાસ્થ્ય માટે હાનિકારક છે.

કરોડો યુવાનો માટે રોલ મોડલ

હનીએ કહ્યું, “સલમાન ખાન કરોડો યુવાનો માટે રોલ મોડલ છે. જ્યારે તેઓ આવા ઉત્પાદનોની જાહેરાત કરે છે, ત્યારે તે ખોટો સંદેશ આપે છે. અન્ય દેશોમાં સેલિબ્રિટી ઠંડા પીણાંની જાહેરાત પણ નથી કરતા, પરંતુ અહીં તો તમાકુ અને પાન મસાલાનું પ્રચાર થાય છે. આવી વસ્તુઓ મૌખિક કેન્સર જેવી બીમારીઓનું મુખ્ય કારણ બને છે.”

સંબંધિત કંપની બંનેને નોટિસ

કોટાની ગ્રાહક અદાલતે હવે આ ફરિયાદ પર કાર્યવાહી શરૂ કરી છે અને સલમાન ખાન તથા સંબંધિત કંપની બંનેને નોટિસ મોકલ્યું છે. અદાલતે બંને પાસેથી જવાબ માંગ્યો છે. આ કેસની આગામી સુનાવણી 27 નવેમ્બરના રોજ નક્કી કરવામાં આવી છે.

આ પણ વાંચો : દિગ્ગજ બૉલીવુડ અભિનેતાને ઘણી છોકરીઓ સાથે ચક્કર, પત્નીએ જાસૂસી કરાવી તો પોલ ખૂલી

ઉલ્લેખનીય છે કે સલમાન ખાન “એલચી” બ્રાન્ડની જાહેરાતોમાં દેખાયા છે — જે કંપની પાન મસાલા પણ વેચે છે. જોકે, સલમાન પાન મસાલાની સીધી જાહેરાતમાં દેખાયા નથી. તેમ છતાં, એન્ડોર્સમેન્ટને લઈને આ કાનૂની કાર્યવાહી થઈ છે, જે હવે ચર્ચાનો મુદ્દો બની ગઈ છે. આગામી સુનાવણીમાં શું નિર્ણય આવશે અને શું સલમાનને આ મામલામાં સ્પષ્ટતા કરવી પડશે — એ હવે સૌની નજરમાં છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ