મનોરંજન / વાહ ભાઇ વાહ! જુઓ તો ખરાં, સાધ્વી બનેલી મમતા કુલકર્ણીને હવે દાઉદ આતંકી નથી લાગતો

બોલિવૂડની એક એવી અભિનેત્રી, જેણે 90ના દાયકામાં પોતાના સૌંદર્ય અને અભિનયથી લાખો દિલ જીતી લીધા હતા... પણ પછી અચાનક જ ફિલ્મી દુનિયા પરથી ગાયબ થઈ ગઈ. હવે, વર્ષો બાદ, તે અભિનેત્રી ફરી ચર્ચામાં આવી છે અને આ વખતે પણ કારણ વિવાદાસ્પદ છે. હા, વાત છે મમતા કુલકર્ણીની, જેઓએ હવે અંડરવર્લ્ડ ડોન દાઉદ ઇબ્રાહિમ અંગે એવું નિવેદન આપ્યું છે કે સોશિયલ મીડિયા પર ભારે ચર્ચા શરૂ થઈ ગઈ છે.

90ના દાયકાની લોકપ્રિય અભિનેત્રી મમતા કુલકર્ણી છેલ્લા કેટલાય વર્ષોથી ચર્ચાથી દૂર હતી. પરંતુ તાજેતરમાં તે ફરી એક વખત હેડલાઈન્સમાં આવી છે. આ વર્ષની શરૂઆતમાં મમતાને કિન્નર અખાડાની મહામંડલેશ્વર તરીકે નિયુક્ત કરવામાં આવી હતી. આ નિર્ણય પછી અખાડામાં ભારે વિવાદ ઊભો થયો હતો, અને અંતે મમતાને અખાડામાંથી હટાવી દેવામાં આવી હતી. તેમ છતાં, તે કિન્નર સમુદાય સાથે જોડાયેલી રહી અને સામાજિક પ્રવૃત્તિઓમાં ભાગ લેતી રહી. હવે, એક નવો વીડિયો સામે આવ્યો છે, જેમાં મમતા કુલકર્ણી દાઉદ ઇબ્રાહિમ વિશે ખુલ્લેઆમ બોલતી જોવા મળી રહી છે.

વીડિયોમાં શું કહ્યું મમતાએ ?

વીડિયોમાં મમતા કહે છે, “મારે દાઉદ ઇબ્રાહિમ સાથે કોઈ સંબંધ નથી. કોઈનું નામ જોડાયું હતું, પરંતુ તેણે ક્યારેય દેશમાં બોમ્બ વિસ્ફોટ કે રાષ્ટ્રવિરોધી પ્રવૃત્તિ કરી નથી. હું તેની સાથે નથી, પણ તે આતંકવાદી નથી. તમે તફાવત સમજો. જ્યારે તમે દાઉદનો ઉલ્લેખ કરો છો, ત્યારે તેણે ક્યારેય મુંબઈમાં બોમ્બ વિસ્ફોટ કર્યો નથી. શું તમે ક્યારેય સાંભળ્યું છે? હું ક્યારેય દાઉદને મળી પણ નથી.”

સોશિયલ મીડિયા પર ચર્ચાનો માહાલો

આ નિવેદન પછી સોશિયલ મીડિયા પર ચર્ચાનો માહોલ ગરમ થયો છે. ઘણા લોકો મમતાના આ નિવેદનને વિવાદાસ્પદ અને ભડકાઉ ગણાવી રહ્યા છે. મમતાનો અંડરવર્લ્ડ સાથેનો સંબંધ વર્ષો સુધી ચર્ચાનો વિષય રહ્યો છે. કહેવાય છે કે તે સમયગાળામાં તે અંડરવર્લ્ડ ડોન છોટા રાજન સાથે સંબંધમાં હતી. ફિલ્મ ચાઇના ગેટ ના શૂટિંગ દરમિયાન થયેલી એક ઘટનાને કારણે લોકો એવું માનવા લાગ્યા કે મમતા અંડરવર્લ્ડના પ્રભાવ હેઠળ છે. તેને ફિલ્મમાંથી દૂર કરવામાં આવી હતી, પરંતુ થોડા સમય પછી ફરીથી પ્રોજેક્ટમાં પાછી બોલાવવામાં આવી હતી.

ક્યા આરોપ માટે ફસાઇ ?

અહેવાલો અનુસાર, છોટા રાજન તરફથી મળેલી ધમકીઓને કારણે મમતાની વાપસી થઈ હતી. મમતાનું જીવન હંમેશા વિવાદોથી ઘેરાયેલું રહ્યું છે. તે 2000 કરોડ રૂપિયાના ડ્રગ કાંડમાં પણ ફસાઈ હતી, જેમાં તેના પર આરોપ હતો કે તે ડ્રગ લોર્ડ વિક્કી ગોસ્વામી સાથે જોડાયેલી હતી. કહેવામાં આવે છે કે તેણે વિક્કી સાથે લગ્ન કર્યા હતા અને પછી બંનેએ ભારત છોડી દીધું હતું. મમતાની છેલ્લી ફિલ્મ 2002માં રિલીઝ થઈ હતી, ત્યાર પછી તે સંપૂર્ણપણે ફિલ્મી દુનિયા પરથી ગાયબ થઈ ગઈ હતી.

આ પણ વાંચો : માનસી પારેખથી લઇને...! ફિલ્મ પ્રમોશનમાં ભાન ભૂલેલા ગુજરાતી સ્ટારકાસ્ટ વિવાદમાં, જુઓ જોખમી સ્ટંટ

હવે વર્ષો પછી, મમતાનો આ વીડિયો ફરી તેના નામને ચર્ચાના કેન્દ્રમાં લાવી રહ્યો છે. એક સમયે બોલિવૂડની સૌથી ગ્લેમરસ અભિનેત્રી રહી ચૂકેલી મમતા કુલકર્ણી આજે પણ પોતાની દરેક હરકતથી લોકોનું ધ્યાન ખેંચી રહી છે — આ વખતે પણ એક એવા નિવેદનથી, જેને લઈને આખું સોશિયલ મીડિયા ગરમાયું છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ