ગુજરાતનું ગૌરવ / બીલીમોરાની યુવતીનું ગજબ સાહસ: કડકડતી ઠંડીમાં ઉત્તરાખંડના બે મુશ્કેલ ટ્રેક સર કરી તિરંગો લહેરાવ્યો

 

• બીલીમોરાની રોશની ટેલરે ગુજરાતનું નામ કર્યું રોશન
• તુંગનાથ અને દેવરીયાતાલ પર લહેરાવ્યો તિરંગો
• યોગ કરીને પોતાના સાહસનો પરિચય આપ્યો

સામાન્ય રીતે સાહસિક પ્રવૃતિઓ અને પર્વતારોહણ જેવા શોખથી દૂર રહેતા ગુજરાતીઓ હવે સાહસિક ગતિવિધિઓમાં પણ આગવું પ્રદર્શન કરી રહ્યા છે. જેના ભાગરૂપે યુવાનો પર્વતારોહણ તરફ આગળ વધી રહ્યા છે. ત્યારે નવસારીના બીલીમોરા શહેરમાં રહેતી રોશની ટેલરે સૌથી ઊંચા શિખર પર ચઢી નવસારી અને ગુજરાતનું નામ રોશન કર્યું છે. 

ત્રિરંગો લહેરાવી ગુજરાતને ગર્વ અપાવ્યું
ઉત્તરાખંડ રાજ્યના રૂદ્રપ્રયાગ જિલ્લા સ્થિત મંદાકિની અને અલકનંદા નદીની ખીણમાં આવેલ અને મહાભારતમાં પણ ઉલ્લેખ છે તેમજ દુનિયા ઉંચા શિખરોમાં જેની ગણના થાય છે. એવા તુંગનાથ (3690 મીટર, 12106 ફૂટ) શિવ મંદિર તરીકે વિશ્વ વિખ્યાત છે એ શિખર સર કરી ત્યાં દેશનો તિરંગો ધ્વજ લહેરાવ્યો હતો. એટલું જ નહીં તેઓ યોગ ઇન્સ્ટ્રકટર છે, તેમણે આટલી ઉંચાઈ પર -2 ડિગ્રી તાપમાનમાં પાતળી હવાના કારણે સામાન્ય માણસને શ્વાસ લેવાની તકલીફ પડતી હોય છે ત્યાં યોગ કરીને પોતાના સાહસનો પરિચય આપ્યો હતો. ટ્રેકિંગના સફરના બીજા ચરણમાં ઉખીનાથ - ચોપટા રોડ સ્થિત (2438 મીટર, 7999 ફૂટ)ની ઉંચાઈ પર આવેલ દેવરીયાતાલનું કપરા ચઢાણ ચઢીને ત્રિરંગો લહેરાવી ગુજરાતને ગર્વ અપાવ્યું હતું.

માતા અને ભાઈએ આપ્યો સાથ
કહેવાય છે કે કોઈપણ મંઝિલ સુધી પહોંચવા માટે પરિવારનો સાથ ખૂબ જ મહત્વનો હોય છે એવામાં રોશનીના માતા અને તેમના ભાઈ તેમને આ શિખર સુધી પહોંચવામાં અનેક મદદરૂપ થયા. રોશની ટેલર યોગા ટીચર છે અને લોકોને યોગનું મહત્વ સમજાવે છે ત્યારે આ શિખર સર કરવા માટે યોગ સૌથી વધારે તેમને ઉપયોગી બન્યો હતો. આ શિખર સર કરવા માટે તેઓએ બેથી અઢી મહિના સુધી સતત પ્રેક્ટિસ કરી હતી. આ શિખર સર કરવામાં તેમના ભાઈ અને તેમના માતાએ ખૂબ સાથ અને સહકાર આપ્યો.

માઉન્ટ એવરેસ્ટ સુધી પહોંચવાનું છે સપનું
રોશની ટેલરના આ સાહસિક કામથી અન્ય લોકોને પ્રેરણા મળે, આવી કામગીરી આગળ પણ કરવામાં આવે એવી આશા વ્યક્ત કરવામાં આવી છે અને સાથે જ રોશની ટેલરે હજુ વધારે આગળ વધી અને માઉન્ટ એવરેસ્ટ સુધી પહોંચવાનું સ્વપ્ન સેવ્યું છે.