IPL 2024ની 24મી મેચ બુધવારે ગુજરાત ટાઇટન્સ (Gujarat Titans) અને રાજસ્થાન રોયલ્સ (Rajasthan Royals) વચ્ચે રમાઈ હતી, જેમાં ગુજરાત ટાઇટન્સે ત્રણ વિકેટે મેચ જીતીને રાજસ્થાન રોયલ્સના ચાર મેચમાં જીતના સિલસિલાને ખતમ કરી દીધો. 196 રનના લક્ષ્યાંકનો પીછો કરતા ગુજરાત ટાઇટન્સે છેલ્લી પાંચ ઓવરમાં શાનદાર વાપસી કરી અને છેલ્લા 30 બોલમાં 73 રન બનાવ્યા. મેચમાં હારવા છતાં, રાજસ્થાન રોયલ્સે (Rajasthan Royals) પોઈન્ટ્સ ટેબલમાં કોલકાતા નાઈટ રાઈડર્સથી આગળ પોતાનું ટોચનું સ્થાન જાળવી રાખ્યું છે. એક તરફ હારનું દુ:ખ હતું તો બીજી તરફ ભારતીય ક્રિકેટ બોર્ડે રાત્રે જ કાર્યવાહી કરીને રાજસ્થાનના કેપ્ટન સંજુ સેમસન (Sanju Samson)ને દંડ ફટકાર્યો.
સંજુ સેમસનને ફટકાર્યો 12 લાખ રૂપિયાનો દંડ
ગુજરાત ટાઇટન્સ (Gujarat Titans) સામે તેની ટીમે ધીમી ઓવર રેટ જાળવી રાખ્યા બાદ રાજસ્થાન રોયલ્સ (Rajasthan Royals) ના કેપ્ટનને દંડ ફટકારવામાં આવ્યો છે. IPLએ કહ્યું કે આઇપીએલ આચાર સંહિતા હેઠળ ન્યૂનતમ ઓવર રેટ (સ્લો ઓવર રેટ) અપરાધ સંબંધિત આ સિઝનમાં તેની ટીમનો પ્રથમ ગુનો હતો, તેથી સેમસન (Sanju Samson) પર 12 લાખ રૂપિયાનો દંડ લગાવવામાં આવ્યો. મેચ છેલ્લા બોલ સુધી ચાલી, જેમાં બોલિંગ ઓલરાઉન્ડર રાશિદ ખાને શાનદાર ફિનિશ કરીને ગુજરાત ટાઇટન્સને સિઝનની ત્રીજી જીત અપાવી. રાશિદે છેલ્લા બોલ પર ચોગ્ગો ફટકાર્યો અને આ સાથે બોલર અવેશ ખાન સહિત રાજસ્થાન રોયલ્સની આખી ટીમ હારના દુ:ખમાં ડૂબી ગઈ.
સંજુ સેમસન અને રિયાન પરાગે ફટકારી અડધી સદી
નોંધનીય છે કે ધીમી શરૂઆત છતાં રાજસ્થાન રોયલ્સે (Rajasthan Royals) બેટિંગમાં શાનદાર પ્રદર્શન કર્યું. જયપુરમાં રાજસ્થાન રોયલ્સે પહેલા બેટિંગ કરી, જેમાં સેમસને (Sanju Samson) માત્ર 38 બોલમાં અણનમ 68 રન બનાવીને તેનું શાનદાર ફોર્મ ચાલુ રાખ્યું. લીગમાં શાનદાર શરૂઆત કરનાર રિયાન પરાગે પણ 48 બોલમાં 76 રનની શાનદાર ઇનિંગ રમીને રાજસ્થાન રોયલ્સને 3 વિકેટે 196 રન બનાવવામાં મદદ કરી.
વધુ વાંચો: મુંબઈ ઈન્ડિયન્સમાં ફરી કંઈક મોટું થવા જઈ રહ્યું છે? મેચ પહેલા આકાશ અંબાણી-રોહિત શર્માનો VIDEO થયો વાયરલ
શુભમન ગિલ બાદ રાશિદ અને તેવટિયાની રહી મહત્ત્વની ભૂમિકા
ગુજરાત ટાઇટન્સ (Gujarat Titans) માટે શુભમન ગિલે 44 બોલમાં શાનદાર 72 રન ફટકારીને ટીમ માટે સારો સ્કોર ઉભો કર્યો. પાછળથી, રાહુલ તેવટિયાએ 11 બોલમાં 22 રન અને રાશિદ ખાને 11 બોલમાં 24 બનાવ્યા, જેમણે ટીમને જીત અપાવવામાં મહત્ત્વની ભૂમિકા ભજવી. રાજસ્થાન રોયલ્સ 13 એપ્રિલે ફરી મેદાનમાં ઉતરશે જ્યારે તેઓ પંજાબ કિંગ્સનો સામનો કરશે, જેમણે સનરાઇઝર્સ હૈદરાબાદ સામેની તેમની અગાઉની મેચમાં બે રનથી હારનો સામનો કરવો પડ્યો હતો.
VTV Gujarati Newsની તમામ અપડેટ સૌથી પહેલા મેળવવા માટે અમારી WhatsApp ચેનલ ફોલો કરો
