- માફિયા અતીક-અશરફની હત્યા પછી અનેક સવાલો
- સંયોગ કહો કે બીજું કંઈક પણ 17 દિવસ પહેલા જ અશરફ કહ્યું હતું
- અશરફે મીડિયાકર્મીઓ સાથે વાતચીતમાં કહ્યું હતું, 15 દિવસમાં મારી નાંખશે
માફિયા અતીક અહેમદ અને તેના ભાઈ અશરફની હત્યા પછી અનેક અપડેટ સામે આવી રહી છે. જોકે આને સંયોગ કહો કે બીજું કંઈક પણ 17 દિવસ પહેલા અશરફ અહેમદે મીડિયા સાથેની વાતચીતમાં જે કહ્યું હતું તે સાચું સાબિત થયું છે. અતીક અહેમદના ભાઈ અશરફે તેના જીવને ખતરો હોવાનું જણાવ્યું હતું. બે સપ્તાહમાં તેનો નિકાલ થઈ જશે તેવી આશંકા વ્યક્ત કરવામાં આવી હતી. આ નિવેદન અને વીડિયો મીડિયામાં ચર્ચામાં રહ્યો છે.
વિગતો મુજબ માફિયા 28 માર્ચની મોડી રાત્રે પ્રયાગરાજથી બરેલી જેલમાં પરત ફર્યા હતા. મોડી રાત્રે પણ બરેલીમાં મીડિયાકર્મીઓ હાજર હતા. માફિયા અને પૂર્વ ધારાસભ્ય ખાલિદ અઝીમ ઉર્ફે અશરફ કેદી વાનમાં બેઠા હતા. અશરફે વાતચીતમાં કહ્યું હતું કે, તેમના જીવને ખતરો છે, બે અઠવાડિયામાં તેનો નિકાલ કરવાની યોજના છે. અશરફે દાવો કર્યો હતો કે, આવી ધમકી એક વરિષ્ઠ અધિકારી દ્વારા આપવામાં આવી હતી, પરંતુ તેણે નામ આપવાનો ઇનકાર કર્યો હતો. આ નિવેદનના 17માં દિવસે અતીક અહેમદ અને અશરફ મર્ડર પોલીસની સામે ખુલ્લેઆમ થઈ ગયા.
મીડિયાકર્મીઓને શું કહ્યું હતું અશરફે ?
આ તરફ પૂરતી સુરક્ષા વચ્ચે તેને બરેલીથી પ્રયાગરાજની કોર્ટમાં લઈ જવામાં આવ્યો હતી. અશરફ 28 માર્ચે મોડી રાત્રે બરેલી જેલમાં પરત ફર્યો હતો. ત્યારબાદ ત્યાં હાજર મીડિયાકર્મીઓએ કેદી વાનમાં બેઠેલા અશરફને પ્રશ્ન કર્યો હતો. જોકે એક સવાલના જવાબમાં સનસનીખેજ નિવેદન આપતા કહ્યું કે, એક મોટા અધિકારીએ ધમકી આપી છે, તેને બે અઠવાડિયામાં જેલમાંથી બહાર કાઢવામાં આવશે અને તેની સાથે કાર્યવાહી કરવામાં આવશે. જ્યારે અધિકારીનું નામ પૂછવામાં આવ્યું તો તેણે કહેવાનો ઇનકાર કર્યો. અશરફે કહ્યું કે, તેઓ સંબંધિત અધિકારી અને અન્ય લોકોની માહિતી મુખ્યમંત્રી યોગી અને મુખ્ય ન્યાયાધીશને બંધ પરબિડીયામાં આપશે.
અમારો પરિવાર રાજકીય કાવતરામાં ફસાયો
અશરફે એમ પણ કહ્યું હતું કે, ઉમેશ પાલ હત્યા કેસ અને કાવતરા સાથે તેને કોઈ લેવાદેવા નથી, તેને ફસાવવા માટે આ કરવામાં આવી રહ્યું છે. અતીકની પત્ની એટલે કે ભાભી શાઇસ્તા પરવીન મેયરની ચૂંટણી લડવાની તૈયારી કરી રહી છે, તેથી આ તમામ રાજકીય કાવતરા કરવામાં આવી રહ્યા છે.
જેલમાં કેમેરા હોય તો કોઈ ષડયંત્ર શક્ય નથી: અશરફ
અશરફે કહ્યું હતું કે, જ્યારે તે અને તેનો ભાઈ લાંબા સમયથી જેલમાં હતા ત્યારે ઉમેશ પાલની હત્યાના કાવતરામાં કેવી રીતે સામેલ હોઈ શકે? જેલની મુલાકાત દરમિયાન LIUના અધિકારીઓ હાજર હોય છે. ડઝનબંધ કેમેરા છે, આવી સ્થિતિમાં કોઈ ષડયંત્ર શક્ય નથી. પોતાના જીવને ખતરો ગણાવતા અશરફે કહ્યું કે, મુખ્યમંત્રી યોગી સામે પણ અનેક ગુનાહિત કેસ નોંધાયેલા છે. તે મારી પીડા સમજી શકે છે. આ બધું તેના પરિવારને ફસાવવા માટે કરવામાં આવી રહ્યું છે.
