અનોખી પરંપરા / અમરેલીના આ ગામમાં દિવાળીની રાતે રમાય છે રોમાંચક ઈંગોરીયા યુધ્ધ

• ઈંગોરિયાનાં ઝાડ પરથી ઈંગોરીયા તોડીને બને છે ઈંગોરીયા
• ઈંગોરીયાના ઝાડ ઘટી જતા હવે કોકડા બનાવાય છે
• દિવાળીની રાતે જામે છે યુદ્ધ

હાલ ઈંગોરીયાનાં ઝાડ ઓછા થઈ જતાં દોરા માટેનાં નાના કોકડામાં દારૂખાનું ભરી ઈંગોરીયા યુધ્ધની પરંપરા ચાલુ રખાઈ છે. ઈંગોરીયાની લડાઈમાં સામાન્ય ઈજાઓ અને નુકસાની થાય છે પણ ખેલૈયાઓને આ રમતનો આનંદ એ ઈજાઓ વિસરાવી દે છે. 

ઈંગોરિયાનાં ઝાડ પરથી ઈંગોરીયા તોડીને બને છે ઈંગોરીયા
સાવરકુંડલામાં નાવલી નદીનાં બંને કાંઠે આવેલા સાવર અને કુંડલાનાં રહીશો ઈંગોરીયાની લડાઈ રમી નિર્દોષ આનંદ માણે છે. દિવાળીનાં તહેવાર પહેલા એક માસ અગાઉ યુવાનો સીમમાં આવેલ ઈંગોરીયાનાં ઝાડ ઉપરતી ઈંગોરીયા તોડી લાવે છે.  ઈંગોરીયાનાં ઝાડ બહુ મોટા નથી હોતા.

કેવી રીતે બનાવે છે ઈંગોરીયા
આઠથી દશ ફુટનાં ઝાડમાંથી ઈંગોરીયા તોડી તેને સુકવી દેવામાં આવે છે. સુકાઈ ગયા બાદ છાલ કાઢી કાણું પાડીને તેમાં ગંધક સુરોખાર દારૂ ઠાંસી ઠાંસીને ભરી દેવામાં આવે છે. ત્યારબાદ પથ્થરનાં ભુક્કાથી કાણું બુરી દેવામાં આવવા બાદ સુકવવામાં આવે છે. આવી રીતે હજારો ઈંગોરીયા તૈયાર કરવામાં આવે છે.

ઈંગોરીયાના ઝાડ ઘટી જતા હવે કોકડા બનાવાય છે
હાલ ઈંગોરીયાનાં ઝાડ ઓછા થઈ જતાં પુરતાં ઈંગોરીયાના અભાવે કોકડાનો સહારો લેવામાં આવે છે. કોકડામાં દારૂખાનું ભરી સળગાવી એક બીજા ઉપર ફેંકવામાં આવે છે. હાલનાં સમયમાં કોઈ માથાકુટ ન સર્જાય તે માટે પોલીસ બંદોબસ્ત પણ ગોઠવવામાં આવે છે

દિવાળીની રાતે જામે છે યુદ્ધ
દિવાળીની રાતે થેલા ભરીને બે જૂથો સામ સામાં એક બીજા ઉપર સળગતાં અને ફુવારા જેવી આગ ઓકતાં ઈંગોરીયાં ફેંકી ચિચિયારીઓ સાથે એક બીજા જુથને હરાવવા નિર્દોષ હોડ જામે છે. આ ઈંગોરીયા સળગાવવા માટે કાથીની વાટનો ઉપયોગ આપવામાં આવે છે.

ઈંગોરીયા યુધ્ધમાં ઈંગોરીયાને સળગાવી ફેંકવામાં આવતાં રોકેટની જેમ ફુવારા સાથે દૂર દૂર સુધી જાય છે. પરંતુ સળગતાં ઈંગોરીયા માથે પડવાથી કપડામાં સામાન્ય નૂકશાની સિવાય કોઈ મોટી દુર્ઘટનાં સર્જાતી નથી. તેથી લોકો નિર્દોષ આનંદ સાથે ઈંગોરીયાની લડાઈ રમે છે. આ અનોખી લડાઈ જોવા દૂર દુરથી લોકો સાવર કુંડલા આવે છે અને ઈંગોરીયા યુધ્ધ જોઈ પોતે પણ રોમાંચથી ઝુમી ઉઠે છે.

આલેખનઃ ગાયત્રી જોષી