દુર્ઘટના / અમદાવાદમાં લિફ્ટમાં ફસાતા 12 વર્ષના બાળકનું મોત, લિફ્ટ અને દરવાજાના સળિયા વચ્ચે માથું ફસાયું

નાના છોકરાઓને લિફ્ટમાં કદી પણ એકલા ન મોકલવા જોઈએ તેમની સાથે ગમે ત્યારે ગમે તેવું બની શકે છે. અનેક ચેતવણીઓ અને અપીલ છતાં પણ લોકો સુધરતા નથી અને તેનું પરિણામ ભયાનક આવતું હોય છે. અમદાવાદના નારોલ સ્થિત શાંતિ શુક્ર સોસાયટીમાં લિફ્ટમાં ફસાતા 12 વર્ષીય બાળકનું મોત થયું હતું.

ઘરેથી ટ્યૂશન જતો હતો ત્યારે બની ઘટના

છોકરો જ્યારે ઘરેથી ટ્યૂશન જતો હતો ત્યારે લિફ્ટ નીચે પછડાઈ હતી અને તેનું માથું લોખંડના દરવાજાની વચ્ચે ફસાઈ ગયું હતું અને ગંભીર ઈજા થતાં તેનું ઘટનાસ્થળે જ મોત થઈ ગયું હતું. બનાવને પગલે સ્થાનિકો અને પરિવારમાં ભારે રોષ જોવા મળ્યો છે.

લિફ્ટ ખૂબ ખરાબ હતી, રજૂઆત છતાં રિપેર ન કરાઈ

સોસાયટીના રહીશોનો આક્ષેપ છે કે, ઘણા સમયથી આ લિફ્ટ ખરાબ હાલતમાં હતી. આ અંગે બિલ્ડરને વારંવાર રજૂઆતો કરવામાં આવી હોવા છતાં કોઈ સમારકામ કે યોગ્ય કાર્યવાહી કરવામાં આવી ન હતી. ઘટના બાદ પરિવારજનોએ ભારે આક્રોશ વ્યક્ત કરીને લાશને પોસ્ટમોર્ટમ માટે લઈ જવાની મનાઈ કરી અને ન્યાયની માગણી કરી હતી. બનાવની જાણ થતાં જ પોલીસ કાફલો ઘટનાસ્થળે પહોંચ્યો હતો, પરિવારને સમજાવી મૃતદેહ પીએમ અર્થે મોકલી આપી તપાસ શરૂ કરી છે.

વધુ વાંચો : અમદાવાદમાં અસામાજિક તત્વોએ પાર્કિંગ પડેલા વાહનોના ભુક્કા બોલાવ્યાં, યુવકને મારવા આવ્યાં હતા ન મળતાં ઉશ્કેરાયા

છોકરાઓ લિફ્ટનો ઉપયોગ રમકડાંની જેમ કરી રહ્યાં છે

આજકાલ નાના છોકરાઓ પણ લિફ્ટમાં એકલા જ અવરજવર કરતાં હોય છે અને તેઓ આડેધડ બટન દબાવતા હોય છે. બાળકો લિફ્ટનો રમકડાંની જેમ ઉપયોગ કરતા પણ જોવા મળી રહ્યાં છે આને કારણે ગંભીર દુર્ઘટના બની શકે છે. વાલીઓએ વિશેષ ધ્યાન રાખવું જોઈએ.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ