ગુજરાત / અમદાવાદ એરપોર્ટ પર 600 ગ્રામ સોનાની લૂંટમાં મોટો ખુલાસો, અંદરથી માહિતી લીક થઈ? દાણચોરીના નેટવર્ક અને સુરક્ષા પર ગંભીર સવાલો

અમદાવાદ એરપોર્ટ પર 27 જૂને બનેલી ૬૦૦ ગ્રામ સોનાની લૂંટ હવે માત્ર લૂંટનો કેસ રહ્યો નથી. તપાસ જેમ જેમ આગળ વધી રહી છે તેમ તેમ એક પછી એક એવા સવાલો સામે આવી રહ્યા છે, જે માત્ર પોલીસ જ નહીં, પરંતુ કસ્ટમ, ડીઆરઆઈ અને એરપોર્ટની સુરક્ષા વ્યવસ્થા સામે પણ ગંભીર સવાલો ઊભા કરી રહ્યા છે. સૌથી મોટો સવાલ એક જ છે કે આખરે એરપોર્ટની અંદરનો ‘ભેદી’ કોણ છે?

પોલીસની ઓળખ આપીને કેટલાક શખ્સો તેને લૂંટી

દુબઈથી અમદાવાદ એરપોર્ટ સુધી પહોંચેલું અંદાજે 600 ગ્રામ સોનું એરપોર્ટની સુરક્ષા વ્યવસ્થા પાર કરીને બહાર આવી જાય અને બહાર નીકળતાંની સાથે જ પોલીસની ઓળખ આપીને કેટલાક શખ્સો તેને લૂંટી લે. પ્રથમ નજરે આ માત્ર લૂંટનો બનાવ લાગે, પરંતુ તપાસ જેમ આગળ વધી રહી છે તેમ કેસની અંદર એક પછી એક રહસ્યમય કડીઓ ખૂલતી જઈ રહી છે. હવે તપાસનું મુખ્ય કેન્દ્રબિંદુ માત્ર લૂંટ નહીં, પરંતુ દાણચોરીના નેટવર્ક સુધી માહિતી પહોંચાડનાર કોણ હતું તે બની ગયું છે.

ધરપકડ બાદ બે પોલીસકર્મીઓનાં નામ સામે આવ્યાં

ક્રાઇમ બ્રાંચની તપાસમાં મહિલા આરોપીની ધરપકડ બાદ બે પોલીસકર્મીઓનાં નામ સામે આવ્યાં છે. આ ઘટનાએ અનેક સવાલો ઊભા કર્યા છે. પોલીસને આટલી ચોક્કસ માહિતી કેવી રીતે મળી કે કયો કેરિયર, કઈ ફ્લાઇટમાં, કેટલું સોનું લઈને બહાર આવશે? તપાસકર્તાઓ હવે આ માહિતીનો સ્રોત શોધવામાં લાગ્યા છે.

ઇન્ફોર્મર જેવી અલગ અલગ કડીઓ હોઈ શકે

તપાસ સાથે જોડાયેલાં સૂત્રોનું માનવું છે કે જો કોઈ સંગઠિત દાણચોરીનું નેટવર્ક સક્રિય હોય તો તેમાં વિદેશમાં બેઠેલા સંચાલક, સોનું લાવતો કેરિયર, સ્થાનિક રિસીવર અને માહિતી આપતો ઇન્ફોર્મર જેવી અલગ અલગ કડીઓ હોઈ શકે. આ કેસમાં પણ એવી સંભાવનાઓની તપાસ થઈ રહી છે કે એરપોર્ટની અંદરથી મળેલી કોઈ માહિતી બહારના નેટવર્ક સુધી પહોંચી હતી કે કેમ?

વ્યવસ્થામાં ક્યાંક કોઈ ચૂક રહી હતી કે કેમ?

આ કેસનો સૌથી સંવેદનશીલ મુદ્દો એ પણ છે કે જો દાણચોરીનું સોનું એરપોર્ટની બહાર આવ્યું હોય તો તે દરમિયાન સુરક્ષા અને તપાસ વ્યવસ્થામાં ક્યાંક કોઈ ચૂક રહી હતી કે કેમ? તપાસ એ દિશામાં પણ આગળ વધી રહી છે કે શું કોઈ અધિકારી, કર્મચારી અથવા અન્ય વ્યક્તિએ જાણતાં કે અજાણતાં એવી માહિતી લીક કરી હતી, જેના આધારે બહાર રાહ જોતી ટીમ સક્રિય થઈ. જો તપાસમાં માહિતી લીક થવાની કડી પુરવાર થશે તો આ કેસ માત્ર લૂંટનો નહીં રહે, પરંતુ દાણચોરીના સમગ્ર નેટવર્ક, તેના ઇન્ફોર્મર અને આંતરિક માહિતીના દુરુપયોગ સુધી પહોંચી શકે છે, બીજી તરફ જો બહારની ટીમે સ્વતંત્ર રીતે માહિતી મેળવી હોય તો તે કેવી રીતે શક્ય બન્યું તે પણ તપાસનો મહત્ત્વનો મુદ્દો છે.

સોનું એરપોર્ટની બહાર કેવી રીતે આવ્યું ?

હાલ પોલીસે કસ્ટમ વિભાગને તપાસ અહેવાલ મોકલી સોનું એરપોર્ટની બહાર કેવી રીતે આવ્યું તેની વિગતો માગી છે, બીજી તરફ ફરાર પોલીસકર્મીઓ સુધી પહોંચવાનો પ્રયાસ ચાલુ છે. તપાસકર્તાઓ માને છે કે આ બંને કડીઓ જોડાશે તો સમગ્ર કેસનું ચિત્ર સ્પષ્ટ થઈ શકે છે. પોલીસે તપાસનો અહેવાલ કસ્ટમ વિભાગને મોકલી આપ્યો છે અને મુસાફર સોનું લઈને બહાર કેવી રીતે આવ્યો તેની વિગત પણ માગવામાં આવી છે. કસ્ટમનો જવાબ હવે સમગ્ર કેસમાં મહત્ત્વનો પુરાવો બની શકે છે.

આ પણ વાંચો- 3 વર્ષથી બોમ્બ બનાવવાની તાલીમ લેતા હતા, 8 વખત ટેસ્ટિંગ માટે બ્લાસ્ટ કર્યા, આતંકીઓની ધરપકડ બાદ ખુલાસા

શું દાણચોરીના નેટવર્કમાં માહિતી આપનાર ઈન્ફોર્મર સક્રિય હતો?

• કેરિયરની વિગતો બહાર સુધી કેવી રીતે પહોંચી?
• સુરક્ષા પ્રક્રિયામાં ક્યાંક ચૂક થઈ હતી?
• આરોપીઓને ફ્લાઇટ અને કેરિયરની માહિતી ક્યાંથી મળી?
• લૂંટાયેલું સોનું હાલ ક્યાં છે?

સૌથી મોટા ત્રણ સવાલ

• ૬૦૦ ગ્રામ સોનું એરપોર્ટ બહાર આવ્યું કેવી રીતે?
• પોલીસની ઓળખ આપનાર આરોપીઓ સુધી માહિતી કોણે પહોંચાડી?
• આ એક જ ઘટના છે કે અગાઉથી ચાલતું મોટું રેકેટ?

એરપોર્ટના ગોલ્ડ ગેટનું રહસ્ય... અંદરથી કોણે ખોલ્યો રસ્તો?

• દુબઈની વ્યક્તિએ સોનું પેસેન્જર મારફતે અમદાવાદ મોકલ્યું
• કસ્ટમ કે ડીઆરઆઈના અધિકારીને તેની જાણ હતી
• સોનું અમદાવાદ એરપોર્ટ બહાર આવ્યું, જેની જાણ પોલીસને હતી
• પોલીસે આ સોનું લૂંટી લીધું
• હવે દાણચોરીની સિન્ડિકેટ અને એજન્સીઓની મીલીભગત હતી
• જ્યારે સિન્ડિકેટના ઈન્ફોર્મરે પોલીસને બાતમી આપી દીધી

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ