ગુજરાત / મહેસાણામાં લૂંટની ફરિયાદ નીકળી ખોટી, CCTVમાં ફરિયાદી જ આંખમાં મરચું નાખતો ઝડપાયો

મહેસાણા જિલ્લાના ખેરવા ગામમાં લૂંટની ચોંકાવનારી ફરિયાદનો પોલીસે ગણતરીના કલાકોમાં ભેદ ઉકેલી નાખ્યો હતો. તપાસમાં સામે આવ્યું કે ફરિયાદીએ પોતાની પુત્રવધૂના દાગીના ગુપ્ત રીતે વેચી નાખ્યા હતા અને આ વાત છુપાવવા માટે લૂંટનું નાટક રચ્યું હતું.

ફરિયાદીએ મહેસાણા તાલુકા પોલીસને જણાવ્યું હતું કે ૧૩ જુલાઈના રોજ કાળા રંગની બાઇક પર આવેલા બે અજાણ્યા શખ્સોએ તેના પર હુમલો કર્યો હતો. આરોપીઓએ આંખમાં મરચું નાખી, છરીથી ઈજા પહોંચાડી અને આશરે ૮.૫ તોલા સોનું તથા રૂ.૧.૫ લાખ રોકડ ભરેલી બેગ લૂંટી લીધી હતી.

પોલીસે ઘટનાસ્થળ આસપાસના સીસીટીવી ફૂટેજ તપાસતાં હકીકત સામે આવી હતી. ફૂટેજમાં ફરિયાદી પોતે જ ઘટના સ્થળે એકલો દેખાયો હતો. તે પોતાની બેગની પટ્ટીથી હાથ બાંધતો, પોતાની આંખમાં મરચું નાખતો અને ડાબા હાથના કાંડા પર ઈજા કરતો જોવા મળ્યો હતો.

પૂછપરછ દરમિયાન તેણે કબૂલ્યું કે પુત્ર અને પુત્રવધૂના નામે રહેલા દાગીના તેણે અગાઉ વેચી નાખ્યા હતા. આ દાગીના લોકરમાં રાખેલા હોવાનું પરિવારને જણાવ્યું નહોતું. તેમાં ત્રણ તોલાનો નેકલેસ, ત્રણ તોલાની ચેઇન અને ત્રણ તોલાની વીંટી સહિત આશરે રૂ.પાંચ લાખનું સોનું સામેલ હતું.

આ પણ વાંચો- 3 વર્ષથી બોમ્બ બનાવવાની તાલીમ લેતા હતા, 8 વખત ટેસ્ટિંગ માટે બ્લાસ્ટ કર્યા, આતંકીઓની ધરપકડ બાદ ખુલાસા

પોલીસના જણાવ્યા મુજબ, પુત્ર અને પુત્રવધૂને કેનેડા મોકલવા માટે રૂ.૫૦ લાખની વ્યવસ્થા કર્યા બાદ તેમજ ધંધામાં નુકસાન થતાં તે ભારે આર્થિક તણાવમાં હતો. પરિવાર દાગીના અંગે પૂછપરછ કરશે તેવી બીકે તેણે લૂંટની ખોટી કહાણી બનાવી હતી. હવે પોલીસે ખોટી ફરિયાદ નોંધાવવા અને તપાસને ગેરમાર્ગે દોરવા બદલ તેના વિરુદ્ધ કાયદેસરની કાર્યવાહી શરૂ કરી છે

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ