- કોરોના મહામારી બાદ બોલિવૂડની આ વર્ષે વાપસી
- છેલ્લાં 2-3 વર્ષોમાં ખાસ કમાણી ન કરી શકી બોલિવૂડની ફિલ્મો
- 2023માં જ કરી લીધી 9 હજાર કરોડની કમાણી
વૈશ્વિક મહામારી કોવિડ 19 આવ્યાં બાદ સિનેમાઘરો અને થિયેટર્સ બંધ થઈ ગયાં હતાં. વર્ષ 2020-21માં બોલિવૂડ સહિત સમગ્ર સિનેમાજગત નિરાશાજન્ય થઈ ગયું હતું. કોરોનાનાં સમયે ઘણી મોટી ફિલ્મો રિલીઝ થવાની હતી પણ મહામારીનાં કારણે તેની તારીખો આગળ વધારવી પડી. આ 2-3 વર્ષોમાં બોલિવૂડની કેટલીક ફિલ્મો લોકોનું દિલ ન જીતી શકી પણ 2023માં બોલિવૂડની અનેક સારી ફિલ્મોએ રિકવરી કરી છે.
9 હજાર કરોડથી વધારેની કમાણી
શાહરૂખ ખાને પઠાણ બનાવીને 2023ની શરૂઆત કરી અને રેકોર્ડ બ્રેક કરી દીધાં. પઠાણે 1050.30 કરોડની વૈશ્વિક કમાણી કરી હતી. આ બાદ રણબીર કપૂર અને શ્રદ્ધા કપૂરની ફિલ્મ તૂ જૂઠી મૈં મક્કાર 100 કરોડનાં કલ્બમાં શામેલ થઈ. સની દેઓલની ફિલ્મ ગદ્દર 2એ ભારતમાં સૌથી વધારે કમાણી કરનારી ફિલ્મનો રેકોર્ડ બનાવ્યો અને વર્લ્ડવાઈડ 684.75 કરોડનું કલેક્શન કર્યું. હવે શાહરૂખ ખાનની જવાને દુનિયાભરમાં 1000 કરોડથી વધારેની કમાણી કરી લીધી છે. સપ્ટેમ્બર 2023 એટલે કે 9 મહિનામાં જ બોલિવૂડે રિકવરી કરી લીધી છે. અત્યાર સુધીમાં રિલીઝ થયેલ તમામ બોલિવૂડની ફિલ્મોની કુલ કમાણીનો આંકડો આશરે 9315 કરોડને પાર થયો છે.
2019માં રિલીઝ થઈ હતી મોટી ફિલ્મો
કોરોનાથી પહેલા વર્ષ 2019માં બોલિવૂડની ફિલ્મોનું કુલ બોક્સ ઓફિસ કલેક્શન આશરે 4200 કરોડ નેટ રહ્યું હતું. બોલિવૂડ માટે 2019 એટલો સારો વર્ષ નહોતો રહ્યો. આ વર્ષે ઊરી, ભારત, કબીર સિંહ, સુપર-30, મિશન મંગલ, છિછોરે, ડ્રિમ ગર્લ, વૉર, ધ સ્કાય ઈઝ પિંક, દબંગ 3, ગુડ ન્યૂઝ વગેરે જેવી ફિલ્મો આવી હતી.
2022માં કોરોનાની અસર રહી
કોરોના બાદ વર્ષ 2022માં બોલિવૂડની ફિલ્મો રિલીઝ થઈ જેમાં કશ્મીર ફાઈલ્સ, કેજીએફ ચેપ્ટર 2, ભૂલ ભૂલૈયા અને બ્રહ્માસ્ત્ર જેવી ફિલ્મો આવી હતી. એ સમયે બોલિવૂડ ફિલ્મોનું ટોટલ કલેક્શન આશરે 1950 કરોડ રહ્યું હતું.
2023માં મચાવી ધૂમ
બોલિવૂડ જે ઝડપે આગળ વધી રહ્યું છે એ જોઈને જાણી શકાય છે કે આવનારા દિવસોમાં બોલિવૂડની ફિલ્મો મોટો ધમાકો કરવાની છે. આવનારા 3 મહિનાઓમાં શાહરૂખ, સલમાન અને રણબીર કપૂરની મોટી ફિલ્મો આવવાની છે. શાહરૂખની ડંકી, રણબીરની એનિમલ અને સલમાનની ટાઈગર 3 રિલીઝ થશે.
