- મોરબી ટોલનાકા કાંડમાં વધુ ત્રણ આરોપી ઝડપાયા
- મુખ્ય આરોપી અમરશી પટેલ પોલીસ પકડથી દૂર
- 4 ડિસેમ્બરે ફરિયાદ નોંધાયા બાદ તપાસનો ચાલી રહ્યો છે ધમધમાટ
સમગ્ર રાજ્યમાં ગાજેલા મોરબી ટોલનાકા કાંડની તપાસમાં ફરિયાદ નોંધાયા બાદ આખરે દોઢ મહિના બાદ વધુ ત્રણ આરોપીને ઝડપી પાડવામાં આવ્યા છે. જેમાં ભાજપના આગેવાન ધર્મેન્દ્રસિંહ ઝાલા, તેના ભાઈ યુવરાજસિંહ ઝાલા અને હિતેન્દ્રસિંહ ઝાલાની ધરપકડ કરવામાં આવી છે. જ્યારે હજુ એક મુખ્ય આરોપી અમરશી પટેલ પોલીસ પકડથી દૂર છે.
પાંચ આરોપીને પોલીસે ઝડપી પાડ્યા
મહત્વનું છે કે, વાંકાનેર નજીક વઘાસિયા પાસે ટોલ પ્લાઝાને બાયપાસ કરીને બાજુમાં આવેલી વ્હાઈટ હાઉસ નામની બંધ પડેલી ફેક્ટરીમાંથી ગેરકાયદે રસ્તો કાઢી ટોલ ઉઘરાવવામાં આવતો હતો. આ મામલે ગત 4 ડિસેમ્બરે ફરિયાદ નોંધાયા બાદ તપાસનો ધમધમાટ શરૂ થયો હતો. જેમાં અગાઉ બે આરોપી રવિરાજસિંહ ઝાલા અને હરવિજયસિંહ ઝાલાની ધરપકડ કરવામાં આવી હતી. જ્યારે હવે વાંકાનેર પોલીસે વધુ ત્રણ આરોપીને ઝડપી પાડ્યા છે. આમ કુલ પાંચ આરોપીને પોલીસે ઝડપી પાડ્યા છે. જ્યારે વ્હાઈટ હાઉસ કારખાનાનો માલિક અમરશી પટેલ કે જે પાટીદાર આગેવાન જેરામ પટેલનો પુત્ર છે તે હજુ ફરાર છે.
કેવી રીતે કરતા હતા કર ચોરી
મોરબીનાં વાંકાનેરમાં વઘાસિયા ટોલનાકાની બાજુમાં છેલ્લા ઘણા સમયથી ગેરકાયદે ટોલનાકું ધમધમી રહ્યું છે. ત્યારે આ નેશનલ હાઈવે પરથી રોજનાં હજારો વાહનો પસાર થાય છે. ત્યારે કેટલાક વાહન ચાલકો ટોલ બનાવવા માટે બાજુનાં ગામમાંથી પસાર થાય છે. ત્યારે વાહન ચાલકોની આ કર ચોરી કરવાની ટેવનાં કારણે કેટલાક અસામાજી તત્વો દ્વારા કમાણી કરવાનો રસ્તો અપનાવ્યો છે. ત્યારે ટોલનાકા નજીક બંધ કારખાનામાંથી રસ્તો કાઢી ટોલ ઉઘરાવવામાં આવતો હોવાનું પણ જાણવા મળી રહ્યું છે.
વાંચવા જેવું: મોરબી પગારકાંડ મામલે મોટા સમાચાર, રાણીબાને મળી રાહત, કોર્ટે આપ્યો આદેશ
વ્હાઈટ હાઉસ સિરામિકના કારખાનામાંથી ગેરકાયદેસર રીતે રસ્તો બનાવાયો
મોરબીનાં વાંકાનેર વઘાસિયા ટોલનાકાની બાજુમાં ગેરકાયદે ટોલનાકું બનાવાયું હતું. ત્યારે કેટલાક અસામાજીક તત્વો દ્વારા વ્હાઈટ હાઉસ સિરામિકનાં કારખાનામાંથી ગેરકાયદેસર રીતે રસ્તો બનાવાયો હતો. આ રસ્તા પર રવિરાજસિંહ અને હરવિંરસિંહ નામનાં બે શખ્શો ટોલનાકુ ચલાવતા હતા. કારખાનેદારની પણ આ ગેરદાયકે ટોલનાકું બનાવવામાં સંડોવણીની શક્યતા છે.
