Asia Cup 2025 / અફઘાનિસ્તાનની હારથી સુપર-4માં પહોંચવાની રેસ બની રોમાંચક, બદલાયા સમીકરણ

એશિયા કપ 2025 માં ગઈકાલની મેચમાં બાંગ્લાદેશની અફઘાનિસ્તાન સામેની જીતથી પોઇન્ટ ટેબલમાં લડાઈ રોમાંચક દેખાઈ રહી છે. આ કપમાં માત્ર ભારતીય ટીમ જ સુપર-4 માં પોતાનું સ્થાન સુરક્ષિત કરી શકી છે. ગૃપ-B માં આગામી રાઉન્ડમાં પહોંચવાની લડાઈ ઈન્ટરેસ્ટિંગ બની છે. કેમ કે, 16 સપ્ટેમ્બરના રોજ બાંગ્લાદેશે 8 રનથી જીત મેળવી હતી અને સુપર-4 માં પહોંચવાની રેસમાં પોતાને બનાવી રાખ્યું હતુ. જેથી હવે ગૃપ-B માં બાકી રહેલી છેલ્લી મેચ અફઘાનિસ્તાન માટે ખૂબ જ મહત્વની સાબિત થશે.

ગૃપ B માં ત્રણ ટીમો વચ્ચે આ સમીકરણો

બાંગ્લાદેશની ટીમે ગૃપ B માં તેની ત્રણ મેચ રમી છે, જેમાં આ ટીમ 2 જીત અને એક હાર બાદ -0.270 નેટ રન રેટ સાથે બીજા સ્થાને છે. તો શ્રીલંકા 2 મેચ રમીને બંને જીત સાથે 4 પોઈન્ટ અને 1.546 નેટ રન રેટ સાથે પ્રથમ સ્થાને છે. હોંગકોંગ તેની ત્રણેય મેચ હાર્યા બાદ સુપર-4ની રેસમાંથી બહાર થઈ ગયું છે. તો અફઘાનિસ્તાન બે મેચમાં એક જીત અને એક હાર સાથે ત્રીજા નંબર પર છે, જેમાં તેનો નેટ રન રેટ 2.150 છે.

આવી સ્થિતિમાં જો અફઘાનિસ્તાન 18 સપ્ટેમ્બરે શ્રીલંકા સામેની મેચમાં હારનો સામનો કરે છે તો બાંગ્લાદેશ અને શ્રીલંકા બંને સુપર-4 માં સામેલ થઈ જશે. બીજી તરફ જો અફઘાનિસ્તાન શ્રીલંકા સામે જીતશે તો તે સુપર-4માં પહોંચશે. અને શ્રીલંકા અને બાંગ્લાદેશમાં જેની નેટ રન રેટ વધુ સારી હશે તે  ટીમ આગામી રાઉન્ડમાં પહોંચશે. પરંતુ શ્રીલંકાનો નેટ રન રેટ ઘણો સારો છે, જેથી શ્રીલંકા જો અફઘાનિસ્તાન સામેની મેચમાં ઓછામાં ઓછા 70 રનથી અથવા 50 બોલ બાકી હોય ત્યારે હારે તો જ તેનો નેટ રન રેટ બાંગ્લાદેશ કરતા ઓછો થશે.

વધુ વાંચો : બાંગ્લાદેશે અફઘાનિસ્તાનને આઠ રનથી હરાવ્યું, મુસ્તફિઝુરે ત્રણ વિકેટ લીધી

• ગૃપ Aમાં પાકિસ્તાનની મેચ પર પણ નજર

ગૃપ Aમાં ભારતીય ટીમ પોઇન્ટ ટેબલમાં પહેલા નંબર પર છે, ભારત તેની બંને મેચ જીતીને સુપર-4 માટે પોતાનું સ્થાન પહેલાથી જ નિશ્ચિત કરી ચૂકી છે ત્યારે બીજી ટીમનો નિર્ણય 17 સપ્ટેમ્બરે પાકિસ્તાન અને UAE વચ્ચેની મેચથી થશે. અત્યારે પોઇન્ટ ટેબલમાં પાકિસ્તાનની ટીમ 2 પોઈન્ટ અને 1.649 નેટ રન રેટ સાથે બીજા સ્થાને છે ત્યારે UAEની ટીમ 2 પોઈન્ટ અને -2.030 નેટ રન રેટ સાથે ત્રીજા સ્થાને છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ