WAR / અમેરિકા-ઈઝરાયલના હુમલામાં ઈરાનના 787 નાગરિકોના મોત, 170 વિદ્યાર્થીઓના પણ મોત

અમેરિકા અને ઇઝરાયેલ દ્વારા ચાલી રહેલા સતત હવાઈ હુમલાઓ વચ્ચે ઈરાનમાં મૃત્યુઆંક ચોંકાવનારી સપાટીએ પહોંચી ગયો છે. ઈરાની માધ્યમોના અહેવાલ મુજબ અત્યાર સુધીમાં 787 નાગરિકોના મોત નોંધાયા છે. ચાર દિવસથી વધુ સમયથી ચાલતા આ સશસ્ત્ર સંઘર્ષમાં નિર્દોષ લોકો સૌથી વધુ ભોગ બની રહ્યા છે. દેશમાં અનેક વિસ્તારોમાં હજુ પણ હુમલાઓ ચાલુ હોવાનું જણાવવામાં આવી રહ્યું છે.

આ મહાસંઘર્ષનું સૌથી કરુણ દૃશ્ય દક્ષિણ પ્રાંત હોર્મોઝગાનના મિનાબ શહેરમાં સામે આવ્યું. 28 ફેબ્રુઆરીના રોજ શાળા પર થયેલા હુમલામાં 165 બાળાઓના મોત થયા હતા. તેમાં મોટાભાગની પ્રાથમિક કક્ષાની વિદ્યાર્થીનીઓ સામેલ હતી. શાળાની ઇમારતનો મોટો ભાગ ધરાશાયી થઈ ગયો હતો અને બચાવ દળોએ કલાકો સુધી કાટમાળ હટાવવાની કામગીરી હાથ ધરી હતી.

View this post on Instagram

A post shared by Sambhaav Nascent LLP (@vtv_gujarati_news)

આ હુમલામાં કુલ 170 વિદ્યાર્થીઓના મોત થયાનું પણ જણાવવામાં આવ્યું છે. આ આંકડો સમગ્ર દેશમાં શોક અને આક્રોશનું કારણ બન્યો છે. મિનાબ શહેરમાં આજે 165 બાળાઓના જનાજા એકસાથે નીકળતા સમગ્ર શહેર ગમગીન બની ગયું હતું. મુખ્ય મેદાનમાં અને આસપાસની મસ્જિદોમાં હજારો લોકો એકત્રિત થયા હતા.

એકસરખી કતારમાં રાખવામાં આવેલા તાબૂતોએ યુદ્ધની ક્રૂરતા સ્પષ્ટ કરી દીધી હતી. નમાઝ-એ-જનાજા બાદ તમામ બાળાઓને સામૂહિક રીતે દફનાવવામાં આવી. સ્થાનિક નાગરિકો સાથે નજીકના વિસ્તારોમાંથી પણ મોટી સંખ્યામાં લોકો અંતિમ વિદાય આપવા પહોંચ્યા હતા. શહેરમાં અનેક સ્થળોએ શાંતિ યાત્રાઓ યોજાઈ અને વિશેષ પ્રાર્થનાઓ કરવામાં આવી.

જનાજાના દિવસે મિનાબ શહેરમાં બજારો બંધ રહ્યા હતા. નાગરિકોએ કાળી પટ્ટી બાંધીને શોક વ્યક્ત કર્યો અને હુમલાની નિંદા કરી. લોકોમાં ભારે વ્યથા સાથે સાથે ભવિષ્ય અંગે અનિશ્ચિતતા પણ દેખાઈ રહી છે. ઈરાનના અનેક વિસ્તારોમાં હજુ પણ સાયરન અને વિસ્ફોટના અવાજો સંભળાઈ રહ્યા હોવાના અહેવાલ છે.

હુમલાઓના કારણે માત્ર ઢાંચાગત નુકસાન જ નહીં પરંતુ સામાજિક અને માનસિક અસર પણ ઊંડી પડી છે. પરિવારો પોતાના પ્રિયજનોને ગુમાવી બેઠા છે અને અનેક બાળકો અનાથ બન્યા છે. 787 નાગરિકોના મોત સાથે આ સંઘર્ષ માનવતાના દૃષ્ટિકોણે ગંભીર ચિંતાનો વિષય બની ગયો છે.

આ પણ વાંચોઃ ઈઝરાયલના હુમલા વચ્ચે ઈરાનમાં તીવ્રશાળી ભૂકંપ, પરમાણુ પરીક્ષણ તો નથી ને જવાબદાર?

આ ઘટનાએ આંતરરાષ્ટ્રીય સ્તરે પણ પ્રતિક્રિયાઓ જગાવી છે. શાળા જેવી સંવેદનશીલ જગ્યા પર થયેલા હુમલાએ વૈશ્વિક સમુદાયમાં આક્રોશ ઊભો કર્યો છે. 165 બાળાઓના એકસાથે જનાજાએ યુદ્ધના ભયાનક પરિણામોને દુનિયા સમક્ષ ઉજાગર કર્યા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ