દેશ / PM મોદી બહાર પાડશે 75 રુપિયાનો સિક્કો, 33 ગ્રામ વજન અને 50% ચાંદી, આ સિક્કાની અન્ય ખાસિયત આવી હશે

• PM મોદી આજે 75 રૂપિયાનાં સિક્કાનું લોકાર્પણ કરશે
• સિક્કાનું વજન 33 ગ્રામ હશે
• ચાંદી અને કોપરનાં મિશ્રણથી બન્યો છે આ સિક્કો

દેશની આઝાદીને 75 વર્ષ પૂર્ણ થયાં બાદ દેશને નવા સંસદ ભવનની ભેટ મળી છે.  પ્રધાનમંત્રી નરેન્દ્ર મોદીએ વિધિ-વિધાનની સાથે સંસદમાં સેંગોલની સ્થાપના કરી છે અને નવું સંસદ ભવન દેશને અર્પિત કર્યું છે. આ સમારોહનાં દ્વિતીય ચરણમાં આજે PM મોદી 75 રૂપિયાનાં સિક્કાનું પણ લોકાર્પણ કરશે. આ સિક્કાનું વજન 33 ગ્રામ છે.

ચાંદી અને કોપરથી બન્યો છે આ સિક્કો
માહિતી અનુસાર 75 રૂપિયાનાં આ સિક્કામાં 50% ચાંદી, 40% કૉપર અને 5-5 % નિકલ-જિંકનાં મિશ્રણથી તૈયાર થયેલ આ સિક્કાનો વ્યાસ 44 મિલીમીટર હશે. કિનારીઓ સહિત 200 સેરેશન આકારનાં ગોળાકાર સિક્કાઓ વિશે નાણામંત્રાલયે જણાવ્યું હતું કે સિક્કાનું નિર્માણ ઉપર જણાવેલ મિશ્રણને ધ્યાનમાં રાખીને જ કરવામાં આવશે.

સિક્કા પર નવા સંસદ ભવનનું ચિત્ર
પ્રધાનમંત્રી નરેન્દ્ર મોદી 75 રૂપિયાનાં જે સિક્કાઓ બહાર પાડશે તેના પર નવા સંસદ ભવનનું ચિત્ર પણ હશે અને એ ચિત્રની નીચે 2023 પણ લખેલું હશે. આ સિક્કા પર અશોક સ્તંભ અંકિત હશે અને હિંદીમાં સંસદ સંકુલ, અંગ્રેજીમાં પાર્લિયામેન્ટ કોમ્પ્લેક્ષ લખવામાં આવશે. 75 રૂપિયાનાં આ સિક્કાઓ પર હિંદીમાં ભારત અને અંગ્રેજી ભાષામાં INDIA લખેલું હશે.