- અતીક અહેમદ અને અશરફની હત્યા બાદ નેતાઓના નિવેદનો
- યુપી સરકારમાં કેબિનેટ મંત્રીએ કહ્યું, પાપ અને પુણ્યનો હિસાબ આ જન્મમાં છે
- ઉત્તર પ્રદેશમાં અપરાધ ચરમસીમાએ પહોંચી ગયો: અખિલેશ યાદવ
પ્રયાગરાજમાં માફિયા અતીક અહેમદ અને તેના ભાઈ અશરફની ગોળી મારીને હત્યા કરવામાં આવી છે. મીડિયાની સામે ત્રણ લોકોએ બંને પર અંધાધૂંધ ફાયરિંગ કર્યું હતું. ફાયરિંગ કરનાર ત્રણેય યુવકોની ધરપકડ કરવામાં આવી છે. મહત્વનું છે કે, પોલીસ માફિયા અતીક અહેમદ અને અશરફને પ્રયાગરાજ મેડિકલ કોલેજમાં મેડિકલ તપાસ માટે લઈ જઈ રહી હતી. પરંતુ ત્યારબાદ રસ્તામાં ત્રણ લોકોએ અંધાધૂંધ ગોળીબાર કર્યો હતો. ગોળીબારમાં અતીક અને અશરફ માર્યા ગયા હતા. એક પોલીસ કોન્સ્ટેબલ પણ ઘાયલ થયો છે.
શું કહ્યું યુપી સરકારમાં કેબિનેટ મંત્રીએ ?
અતીક અહેમદ અને તેના ભાઈ અશરફની ગોળી મારીને હત્યા કરી દેવાયા બાદ હવે રાજનેતાઓનાં નિવેદનો સામે આવી રહ્યા છે. અતીક અહેમદ અને અશરફની હત્યા બાદ યુપી સરકારમાં કેબિનેટ મંત્રી સ્વતંત્ર દેવ સિંહે પોતાની પ્રતિક્રિયા આપી છે. સ્વતંત્ર દેવ સિંહે કહ્યું- આ જન્મમાં પાપ અને પુણ્યનો હિસાબ છે. જોકે બાદમાં તેઓ તેમનુ આ ટ્વિટ પોતાની આઈડી ઉપરથી હટાવી દીધું હતું.
શું કહ્યું અખિલેશ યાદવે ?
પૂર્વ મુખ્યમંત્રી અને સપાના વડા અખિલેશ યાદવે અતિક અહેમદ અને અશરફની હત્યા પર કહ્યું કે, ઉત્તર પ્રદેશમાં અપરાધ ચરમસીમાએ પહોંચી ગયો છે અને ગુનેગારોનું મનોબળ ઉંચુ છે. જ્યારે સુરક્ષાના ઘેરા વચ્ચે ખુલ્લેઆમ ગોળીબાર કરીને કોઈની હત્યા કરી શકાય છે. પોલીસ તો સામાન્ય જનતાની સલામતીનું શું ? આનાથી લોકોમાં ભયનું વાતાવરણ ઊભું થઈ રહ્યું છે, એવું લાગે છે કે, કેટલાક લોકો જાણી જોઈને આવું વાતાવરણ ઊભું કરી રહ્યા છે.
યુપી STFએ અતીકના પુત્રનું એન્કાઉન્ટર કર્યું હતું
મહત્વનું છે કે, યુપી એસટીએફની ટીમે ગુરુવારે ઝાંસીમાં અસદ અને તેના સાથી ગુલામની હત્યા કરી હતી જ્યારે તેઓ મોટરસાઈકલ પર ભાગવાનો પ્રયાસ કરી રહ્યા હતા. પોલીસે પીછો કરતાં બંનેએ ટીમ પર ગોળીબાર કર્યો હતો. જે બાદ STF ટીમે તેમની સામે જવાબી કાર્યવાહી કરી હતી. એન્કાઉન્ટરમાં માર્યા ગયેલા આરોપીઓ પાસેથી આધુનિક વિદેશી હથિયારો મળી આવ્યા હતા. જેમાં બ્રિટિશ બુલડોગ રિવોલ્વર અને જર્મન વોલ્થર પિસ્તોલનો સમાવેશ થાય છે.
