ગોલ્ડ કાર્ડ / હવે અમેરિકાની સિટીઝનશિપ પાક્કી, બસ આટલા રૂપિયા ચૂકવો અને ટ્રમ્પ પોતે બનાવશે અમેરિકન નાગરિક

અમેરિકાના રાષ્ટ્રપતિ ડોનાલ્ડ ટ્રમ્પે તાજેતરમાં 'ટ્રમ્પ કાર્ડ' નામે એક ખાસ કાર્ડની જાહેરાત કરી છે. આ કાર્ડ દ્વારા, વિશ્વભરના લોકો હવે 5 મિલિયન ડોલર એટલે કે લગભગ ₹42.70 કરોડ ચુકવીને અમેરિકામાં રહેવાની અને ભવિષ્યમાં નાગરિકતા મેળવવાની તક મેળવી શકે છે. ટ્રમ્પે આ જાહેરાત પોતાના સોશિયલ મીડિયા પ્લેટફોર્મ (Truth Social) પર કરી હતી અને કહ્યું હતું કે ઘણા લોકો આ કાર્ડ વિશે માહિતી માગી રહ્યા છે.

આ કાર્ડ માટેની અરજીની પ્રક્રિયા સત્તાવાર રીતે શરૂ થઈ ગઈ છે. તેની વેબસાઇટ TrumpCard.gov પર જઈને લોકો પોતાનું નામ, E-mail, દેશ અને તેઓ વ્યક્તિગત કે વ્યવસાય માટે અરજી કરી રહ્યા છે તેના જેવી વિગતો ભરીને નોંધણી કરી શકે છે. નોંધણી કર્યા પછી, અરજદારોને રાહ જોવાની લિસ્ટમાં રહેવું જોઇએ છે.

ટ્રમ્પ કાર્ડનું લુક ખૂબ આકર્ષક છે જેમાં ડોનાલ્ડ ટ્રમ્પનો ફોટો, તેમની સહી અને નામ છે. ટ્રમ્પના જણાવ્યા મુજબ આ કાર્ડ કંઈક એવું છે જે ‘ગ્રીન કાર્ડ’ જેવી તક આપે છે. જોકે, કાર્ડ પ્રાપ્ત કરવાથી તરત નાગરિકતા કે પ્રવેશ મળવાની કોઈ ગેરંટી નથી. ટ્રમ્પનું કહેવું છે કે આ યોજના માટે કોંગ્રેસની મંજૂરીની જરૂર નથી કારણ કે આ કાર્ડ સીધું નાગરિકત્વ આપતું નથી. ટ્રમ્પ કાર્ડ વિશ્વના 8 મોટા પ્રદેશોના અરજદારો માટે ઉપલબ્ધ છે યુરોપ, એશિયા (મધ્ય પૂર્વ સહિત), ઉત્તર અમેરિકા, ઓશનિયા, મધ્ય ક્ષેત્ર, દક્ષિણ અમેરિકા, કેરેબિયન અને આફ્રિકા. અરજદારોને વધુ વિગતો અરજી પ્રક્રિયા શરૂ થતાં જ આપવામાં આવશે. ટ્રમ્પનું માનવું છે કે આ યોજના એવા લોકો માટે છે જેઓ સફળ છે, પૈસાવાળા છે અને અમેરિકામાં રોકાણ કરવા તૈયાર છે.

આ ટ્રમ્પ કાર્ડ તાજેતરમાંની EB-5 વિઝા યોજના માટેનો વિકલ્પ માનવામાં આવી રહ્યો છે. EB-5 હેઠળ વિદેશી નાગરિકો અમેરિકામાં નોકરીઓ પૂરી પાડનારા પ્રોજેક્ટમાં $800,000 થી $1.05 મિલિયન સુધીનું રોકાણ કરે છે અને પછી ગ્રીન કાર્ડ મેળવી શકે છે. જોકે, આ યોજના પર છેલ્લા કેટલાક સમયથી બેકલોગ અને છેતરપિંડીના આરોપ લાગ્યા છે. એટલે હવે ટ્રમ્પે એના વિકલ્પ રૂપે નવી યોજના રજૂ કરી છે.

ટ્રમ્પ કાર્ડની સૌથી મોટી વિશેષતા એ છે કે તેને ધરાવનારા પર માત્ર અમેરિકામાં મળતી આવક પર જ ટેક્સ લાગશે, જ્યારે ગ્રીન કાર્ડ ધારકોને વૈશ્વિક આવક પર ટેક્સ ચૂકવવો પડે છે. એટલે ઘણા એવા ધનિકો માટે જે આંતરરાષ્ટ્રીય કર પ્રણાલીને કારણે અમેરિકા જવાનું ટાળી રહ્યા હતા, હવે એ લોકો માટે પણ આ એક રસપ્રદ તક બની છે. US વાણિજ્ય સચિવ હોવર્ડ લુટનિકે કહ્યું કે કાર્ડના સત્તાવાર લોન્ચ પહેલા જ એક જ દિવસમાં 1,000 કાર્ડ વેચાઈ ગયા હતા અને આશરે 3.7 કરોડ લોકો વિશ્વભરમાંથી આ કાર્ડ ખરીદવા માટે યોગ્ય માનવામાં આવે છે.

આ પણ વાંચો : એક અઠવાડિયાની ખટાસ બાદ ફરીથી ઝળકી ઉઠી ટ્રમ્પ-મસ્કની દોસ્તી, કહ્યું ‘Very nice'

ટ્રમ્પનું કહેવું છે કે આ કાર્ડ માત્ર પૈસાદાર લોકોને નથી, પણ એવી છૂપી પ્રતિભા ધરાવતી વ્યક્તિઓ માટે પણ છે જેમને કોઈ રોકાણદારના સહયોગથી અમેરિકામાં રહેવાની તક મળી શકે. આ યોજના હેઠળ, પૈસાવાળા લોકો એવા પ્રતિભાશાળી લોકો માટે પણ ચૂકવણી કરી શકે છે, જેનાથી તેમને પણ નાગરિકતા મેળવવાનો માર્ગ ખૂલે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ