હેલ્થ / બાળક સિક્કો ગળી જાય તો શું કરવું? આ ભૂલ તો બિલકુલ ના કરશો, જાણો શ્રેષ્ઠ ઉપાય

ઘરમાં રમતી વખતે નાના બાળકો ઘણીવાર વિવિધ વસ્તુઓ ઉપાડીને ગળી જતા હોય છે. તેઓ અજાણતામાં સિક્કા, ચુંબક કે રમકડાના નાના ભાગો જેવી વસ્તુઓ ગળી શકે છે, જેનાથી પરિવારની ચિંતા વધી જાય છે. જોકે આવી મોટાભાગની વસ્તુઓ કુદરતી રીતે શરીરની બહાર નીકળી જાય છે, પરંતુ અમુક વસ્તુઓ જેમ કે બટન બેટરી કે ચુંબક ગળી જવાથી ગંભીર સમસ્યાઓ સર્જાઈ શકે છે. માતા-પિતા ઘણીવાર ગભરાઈ જાય છે અને ઉલટી કરાવવી કે બળજબરીથી ખવડાવવા જેવા પગલાં લે છે, જેને ખોટા માનવામાં આવે છે. ડોક્ટરોના મતે, આવી પરિસ્થિતિઓમાં તાત્કાલિક યોગ્ય પગલાં લેવા એ જ સૌથી સમજદારીભર્યું કાર્ય છે. જો તમારા ઘરમાં નાના બાળકો હોય, તો આ માહિતી જરુરથી વાંચો.

તરત ડોક્ટર પાસે જાઓ

ગેસ્ટ્રોએટેરોલોજિસ્ટ ડોક્ટરનું કહેવુ છે કે, જો તમને લાગે કે તમારા બાળકે કંઈક ગળી લીધું છે, તો પહેલા શાંત રહો અને તરત જ ગભરાશો નહીં. સૌથી મહત્વની વાત એ છે કે કોઈ પણ ઘરેલું ઉપાય અજમાવવાનો પ્રયત્ન ન કરવો. કોઈ પણ સંજોગોમાં બાળકને વધુ પડતું પાણી પીવા કે ખોરાક ખાવા માટે મજબૂર કરશો નહીં, તેમજ તેને ઉલટી કરાવવાનો પ્રયાસ પણ કરશો નહીં. આમ કરવાથી પરિસ્થિતિ વધુ બગડી શકે છે. સૌથી યોગ્ય પગલું એ છે કે તરત જ ડોક્ટરની સલાહ લેવી, જેથી તેઓ એક્સ-રે અથવા અન્ય જરૂરી તપાસ દ્વારા નક્કી કરી શકે કે વસ્તુ ક્યાં ફસાયેલી છે.

મેગ્નેટ અને બેટરી કેમ વધારે ખતરનાક?

જોકે સિક્કો ઘણીવાર મળ વાટે બહાર નીકળી જાય છે, પરંતુ ચુંબક અને બટન બેટરી ગંભીર જોખમ ઊભું કરે છે. ડૉક્ટર સમજાવે છે કે જો બાળક એકથી વધુ ચુંબક ગળી જાય, તો તે આંતરડાના અલગ-અલગ ભાગોમાં ચોંટી શકે છે. આનાથી આંતરડામાં ઘા, કાણાં પડવા કે ચેપ જેવી સમસ્યાઓ થઈ શકે છે, જે જીવલેણ સાબિત થઈ શકે છે.

ઘણીવાર, બાળક કોઈ વસ્તુ ગળી ગયા પછી પણ સામાન્ય વ્યવહાર કરે છે અને રમે છે; તેથી, લક્ષણો ન દેખાવાનો અર્થ એ નથી કે બધું બરાબર છે. જો પેટમાં દુખાવો, ઉલટી, મોઢામાંથી લાળ પડવી અથવા ગળવામાં તકલીફ જેવા લક્ષણો જણાય, તો તરત જ ડૉક્ટરની સલાહ લો.

આ પણ વાંચોઃ ઊંઘની ગોળીઓ છોડો, રાત્રે ટ્રાય કરો આ દેશી નુસખો, મિનિટોમાં આવશે ઘસઘસાટ ઊંઘ

સાવધાની જ છે બચવાનો રસ્તો

બાળકો સ્વાભાવિક રીતે જ જિજ્ઞાસા ધરાવતા હોય છે, તેથી તેમને સંપૂર્ણપણે રોકવું અશક્ય બને છે; જોકે, અમુક આદતો બદલીને જોખમ ઘટાડી શકાય છે. સિક્કા, નાના ચુંબક, નાના રમકડાંના ભાગો અથવા રિમોટ કંટ્રોલ બેટરી જેવી વસ્તુઓ બાળકોની પહોંચથી દૂર રાખો. સમયાંતરે રમકડાં તપાસો કે કોઈ ભાગ છૂટો ન પડે.

નાના બાળકો પર દેખરેખ રાખવી અત્યંત મહત્વપૂર્ણ છે. જો આવી કોઈ દુર્ઘટના બને, તો રાહ જોવાને બદલે તરત જ હોસ્પિટલ જવું વધુ હિતાવહ છે, કારણ કે સમયસરની સારવાર કોઈ મોટી ઇમરજન્સીને ટાળી શકે છે.

Disclaimer આરોગ્ય અને સુખાકારી હેઠળ પ્રકાશિત સામગ્રી સામાન્ય જાણકારી ઉપલબ્ધ કરાવે છે. અહીં પ્રકાશિત લેખ તબીબ, વૈદ્ય, નિષ્ણાત અને રિસર્ચ આધારિત નિષ્કર્ષ પર છે. તમામ નિર્દેશોનું પાલન કરી વાંચકોની જાગૃતિ વધારવાના હેતુથી આ સામગ્રી તૈયાર કરાઈ છે. આ લેખ કોઈ પણ રીતે યોગ્ય ઉપચારનો વિકલ્પ નથી, વધુ જાણકારી માટે હંમેશા નિષ્ણાત કે આપના ચિકિત્સકની સલાહ લેવી. vtvgujarati.com આ જાણકારી માટે જવાબદારીનો દાવો કરતું નથી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ