કોંગ્રેસની સભામાં ખંભાળિયા બેઠકના કોંગ્રેસ ઉમેદવાર વિક્રમ માડમે કહ્યું કે, 'એકને ભાજપે અને NCPએ ટિકિટ ન આપી અને હવે વિક્રમ માડમને પૂરો કરવા નિકળ્યાં છે.'
પોતે, હકુભા જાડેજા અને કાંધલ જાડેજાની ત્રિપુટી તૂટ્યાનો કર્યો સ્વીકાર
ત્રિપુટીથી કેટલાક લોકોના પેટમાં તેલ રેડાયું છે: વિક્રમ માડમ
ગુજરાત વિધાનસભા ચૂંટણીને લઇ તમામ રાજકીય પક્ષોએ પોતાપોતાના મોટા ભાગના ઉમેદવારો જાહેર કરી દીધા છે. ત્યારે ટિકિટ ફાળવણીને લઇ ખંભાળિયા બેઠકના કોંગ્રેસ ઉમેદવાર વિક્રમ માડમનો એક વીડિયો વાયરલ થયો છે. જેમાં કોંગ્રેસની સભામાં વિક્રમ માડમનું દર્દ છલકાયું છે.
ત્રિપુટીથી કેટલાક લોકોના પેટમાં તેલ રેડાયું
વિક્રમ માડમે પોતાની, હકુભા જાડેજાની તેમજ કાંધલ જાડેજાની ત્રિપુટી તૂટ્યાનો સ્વીકાર કર્યો છે. વિક્રમ માડમે નિવેદન આપતા જણાવ્યું કે, 'ત્રિપુટીથી કેટલાક લોકોના પેટમાં તેલ રેડાયું છે. કાંધલ જાડેજાને NCPની ટિકિટ ન મળી. એકને ભાજપે ટિકિટ ન આપી અને હવે વિક્રમ માડમને પૂરો કરવા નિકળ્યાં છે.'
સૌ કોઇની નજર સૌરાષ્ટ્રની આ બેઠક પર રહેશે, જાણો કારણ
ઉલ્લેખનીય છે કે, ખંભાળિયા સીટના કોંગ્રેસ પક્ષના ઉમેદવાર વિક્રમ માડમે ગઇકાલે ખંભાળિયા ખાતે પ્રાંત કચેરીએ ઉમેદવારી ફોર્મ ભર્યું હતું. ફોર્મ ભર્યા બાદ વિક્રમ માડમે જંગી બહુમતીથી જીતનો વિશ્વાસ વ્યક્ત કર્યો હતો. તમને જણાવી દઇએ કે, આ વખતે સૌ કોઇની નજર સૌરાષ્ટ્રની આ બેઠક પર રહેશે. કારણ કે આ બેઠક પરથી AAPએ ઈસુદાન ગઢવીને ઉમેદવાર તરીકે જાહેર કર્યા છે. ત્યારે તેઓની આ વખતે ખંભાળિયામાં ભાજપના મુળુભાઈ બેરા અને કોંગ્રેસના વિક્રમ માડમ બન્ને મજબૂત ઉમદવાર સામે લડશે.
એકંદરે આ બેઠક કોઈનો ગઢ નથી રહ્યો
તમને જણાવી દઇએ કે, અહેવાલ મુજબ ખંભાળિયા બેઠક પર માડમ-બેરા જેવા ભાજપ-કોંગ્રેસના મજબૂત ઉમેદવારો 20 વર્ષ બાદ ફરી વખત આમને સામને આવ્યા છે. એકંદરે આ બેઠક કોઈનો ગઢ નથી રહ્યો. પરંતુ હવે વીસ વર્ષ બાદ બે મોટા માથા ચૂંટણી લડી રહ્યાં છે તેમાં આપનો મુખ્યમંત્રી ચહેરો પણ ચૂંટણી લડશે ત્યારે કોણ કોના મત કાપશે તેની પર નજર મંડરાયેલી છે.
