- ભારત અને પાકિસ્તાન વચ્ચેની મેચ અનિર્ણિત રહી
- ઈશાન કિશન અને હાર્દિક પંડ્યાએ કરી શાનદાર બેટિંગ
- લંકામાં ગુંજી ઉઠ્યું "રામ સિયારામ સિયારામ જય જય રામ"
ASIA CUP 2023 IND VS PAK: ભારત અને પાકિસ્તાન વચ્ચે શનિવારે રમાયેલી એશિયા કપ 2023ની ત્રીજી મેચ અનિર્ણિત રહી. વરસાદે આ મેચમાં ઘણી વખત વિક્ષેપ પાડ્યો હતો. જ્યારે ભારતીય ટીમની બેટિંગ ચાલી રહી હતી ત્યારે પણ ઘણી વખત બેટિંગ રોકવી પડી હતી, ત્યારપછી જ્યારે ટીમ ઈન્ડિયાની બેટિંગ પૂરી થઈ એ બાદ અવિરત વરસાદ ચાલુ રહ્યો. જે બાદ મેચ રદ્દ કરવી પડી હતી.
ઈશાન કિશન અને હાર્દિક પંડ્યાએ કરી શાનદાર બેટિંગ
જો કે આ મેચમાં ભારતીય ટીમે પ્રથમ બેટિંગ કરતા 48.5 ઓવરમાં 266 રન બનાવ્યા હતા અને પાકિસ્તાન સામે 267 રનનો ટાર્ગેટ આપ્યો હતો પરંતુ પાકિસ્તાની ટીમ વરસાદને કારણે બેટિંગ કરવા મેદાનમાં આવી શકી ન હતી, જે બાદ મેચ અનિર્ણિત રહી હતી. હવે આ મેચ અનિર્ણિત રહી હોવા છતાં આ મેચમાં ટીમ ઈન્ડિયાના બેટ્સમેન ઈશાન કિશન અને હાર્દિક પંડ્યાએ પોતાની શાનદાર બેટિંગથી ભારતીય ક્રિકેટ ચાહકોના દિલ જીતી લીધા હતા. રોહિત, શુભમન, વિરાટ અને શ્રેયસ અય્યરની વિકેટો પડ્યા બાદ ઈશાન કિશને 82 અને હાર્દિક પંડ્યા 87 રનની ઇનિંગ રમી હતી.
લંકામાં ગુંજી ઉઠ્યું "રામ સિયારામ સિયારામ જય જય રામ" :-
હવે વાત એમ છે કે જ્યારે ઈશાન કિશન અને હાર્દિક પંડ્યા બેટિંગ કરી રહ્યા હતા ત્યારે સ્ટેડિયમમાં ડીજે ' રામ સિયા રામ, સિયા રામ જય જય રામ' ગીત વગાડીને ચાહકોના દિલ જીતી લીધા હતા. તેનો હાલ એક વિડીયો પણ સોશિયલ મીડિયા પર ખૂબ વાયરલ થઈ રહ્યો છે. આ ભારતીય ઇનિંગ્સની 34મી ઓવરમાં થયું, જ્યારે પાકિસ્તાની બોલર આગા સલમાન તેની ઓવર લાવ્યો. ત્યારબાદ સ્ટેડિયમમાં હાજર ડીજેએ રામ સિયા રામ ભજન વગાડ્યું હતું.
હવે તેનો વીડિયો સોશિયલ મીડિયા પર ઝડપથી વાયરલ થઈ રહ્યો છે. ચાહકોને આ વીડિયો ખૂબ જ પસંદ આવી રહ્યો છે. આ અંગે ટ્વિટર પર જોરદાર પ્રતિક્રિયાઓ આવી રહી છે. એક યુઝરે લખ્યું- રામ સિયા રામ… દિલ જીતી લીધું. અન્ય એક યુઝરે લખ્યું- સ્ટેડિયમમાં રામ સિયા રામ સિયા રામ ગુંજી રહ્યું છે.. આ ઉપરાંત છેલ્લા ઘણા સમયથી રામ કથા કરી રહેલા પ્રખ્યાત કવિ કુમાર વિશ્વાસે પણ આ અંગે પોતાની પ્રતિક્રિયા આપી હતી. તેણે લંકામાં લખ્યું હતું – “રામ સિયારામ સિયારામ જય જય રામ”.
