સર્વ ધર્મ સમભાવ / કોમી એકતાની મિસાલ: ગુજરાતની એવી જગ્યા જ્યાં મુસ્લિમ સમાજ લોકો પહેલા માતાજીને ઘરાવે છે નૈવેધ, અને હિન્દુ લોકો પીરને

• ગીર સોમનાથના  કોડીનારમાં અનોખું દેવસ્થાન
• વેલણ ગામનું મંદિર અને દરગાહ કોમી એકતાનું પ્રતીક
• સોડવ માતાજીના મંદિર સાથે જોડાયેલી અનોખી લોકવાયકા

માઁ ભગવતીના આરાધના પર્વને માત્ર ગણતરીના દિવસો બાકી છે ત્યારે, ગીર સોમનાથ જિલ્લાના કોડીનારમાં અનોખું કોમી એકાતનું પ્રતીક દેવસ્થાનો વિશે જાણવા મળ્યું છે. વેલણ ગામના વાડી વિસ્તારમાં આવેલા સોડવ માતાજીનું મંદિર શક્તિનું પ્રતિક ગણાય છે. આ મંદિર અને તેનાથી એકાદ કિલો મીટર દૂર આવેલી જન્નશાપીરની દરગાહ હિન્દૂ- મુસ્લિમ કોમી એકતાનું સૌથી મોટું પ્રતીક છે. આ બન્ને ધર્મ સ્થાનકો માટે હિન્દૂ  અને મુસ્લિમ સમાજ સંપૂર્ણ શ્રધ્ધા ધરાવે છે. હિન્દુ સમાજની કોઈ પણ વ્યક્તિ કોઈ માનતા કે નિવેદ લઈને  સોડવ માતાજીએ આવે તો પહેલા જન્નશાપીર બાબાની દરગાહે શ્રીફળ અને ચાદર ચડાવવા જવું પડે અને મુસ્લિમ લોકો જન્નશાપીરની કોઈ  માનતા લઈને આવે તો પહેલા સોડવ માતાજીએ ખીર-રોટલી, ચૂંદડી અને શ્રીફળ અર્પણ અવશ્ય કરવા માતાજી આવે છે. 

કોમી એકતાનું એક ઉત્તમ ઉદાહરણ
વેલણ ગામની સીમ વિસ્તારમાં આવેલું સોડવ માતાજીનું મંદિર અને જન્નશાપીરની દરગાહ ખૂબ નજીક આવેલા છે. આ દેવસ્થાનો સાથે એનોખી કહાણી પણ જોડાયેલી છે. એક સમયે માતાજી ગાયો અને તેમના વાછરડા ચરાવતા હોઈ અને ત્યાં બાજુમાં દરિયાઈ માર્ગે એક પથ્થર પર પાંચ ભાઈઓ આવ્યા અને તે જે ભાઈઓ આવ્યા તે આજે જન્નશાપીર તરીકે ઓળખાય છે. આ પાંચેય ભાઈઓને માતાજી ગાયોનું દૂધ આપતા અને રાખડી બાંધી હોવાની લોક માન્યાતા છે. આ પાંચેય ભાઈઓ પણ માતાજીને સગ્ગી બહેન તરીકે જ માનતા હતા. કહેવાય છે કે તત્કાલીન સમયે  કેટલાક લોકો આ પવિત્ર સંબંધને ખરાબ દ્રષ્ટીથી જોતા માતાજીએ તે જ જગ્યા પર ધરતી માતાની ગોદમાં સમાઈ ગયા હતા ત્યારબાદ જન્નશાપીર એટલે કે તે પાંચ ભાઈઓને જાણ થઈ એટલે તેઓ પણ ત્યાંજ ધરતીમાં સમાઈ ગયા હતા તેવી લોક વાયકા છે.

ભક્તોની જામે છે ભીડ
આ પવિત્ર દેવસ્થાનો પર ચૈત્ર, આસો, શ્રાવણ અને રમજાન મહિનામાં લોકોની સતત ભીડ જોવા મળે છે. મુસ્લિમ લોકોનું ઉર્ષ કે ઇદ હોય તો તેઓ પહેલા સોડવ માતાજીના મંદિરે ખીરપુરી, ચુંદડી અને શ્રીફળ લઈ આવે છે. ત્યારે આ મંદિર અને દરગાહ સમગ્ર હિન્દૂ અને મુસ્લિમ સમાજ માટે કોમી એકતાનું એક ઉત્તમ ઉદાહરણ પૂરું પાડે છે.