- હવે તો આકાશ પણ સલામત નથી
- ઓસ્ટ્રેલિયામાં હવામાં બે હેલિકોપ્ટર અથડાયા
- ફુરચેફૂરચા ઉડી ગયા હેલિકોપ્ટરના
- 4 લોકોના મોત, 13 લોકો ઘાયલ
હવે તો આકાશમાં પણ અકસ્માત થવા લાગ્યાં છે. બીચ પર દુર્ભાગ્યપૂર્ણ ઘટનાઓ વચ્ચે ઓસ્ટ્રેલિયાથી વધુ એક દર્દનાક અકસ્માત સામે આવ્યો છે જ્યાં બે હેલિકોપ્ટર વચ્ચેની ટક્કરમાં ચાર લોકોના મોત થયા છે. ઓસ્ટ્રેલિયાના ક્વીન્સલેન્ડમાં હવામાં બે હેલિકોપ્ટર અથડાતાં આ અકસ્માત સર્જાયો હતો. ટક્કર થયા બાદ હેલિકોપ્ટર નીચે પડતાં દરિયા કિનારે મજા માણી રહેલા સહેલાણીઓ જીવ લઈને નાઠા હતા.
મરિન થીમ પાર્કમાં ટક્કર બાદ નીચે પડ્યાં બે હેલિકોપ્ટર
મીડિયા રિપોર્ટ્સ અનુસાર આ ઘટના મરિન થીમ પાર્ક પાસે બની હતી, જ્યારે બે હેલિકોપ્ટર એકબીજા સાથે ટકરાયા હતા. નવાઈની વાત તો એ છે કે એ સમયે પાર્કમાં ઘણા બધા લોકો હતા. આ અકસ્માતમાં ચાર લોકોના મોત થયા હતા અને 13થી વધુ લોકો ગંભીર રીતે ઘાયલ થયા હતા. આ પછી પોલીસ અને મેડિકલ ટીમ ઘટના સ્થળે પહોંચી હતી અને લોકોને બચાવી લેવામાં આવ્યા હતા. તમામ ઇજાગ્રસ્તોને હોસ્પિટલમાં દાખલ કરવામાં આવ્યા છે જ્યાં તેમની સારવાર ચાલી રહી છે. મૃતકોમાં હેલિકોપ્ટરના પાઈલટ અને ત્રણ લોકોનો સમાવેશ થાય છે.
એક હેલિકોપ્ટર ક્રેશ, બીજું બીચ પર ઉતર્યું
મીડિયા રિપોર્ટ્સ અનુસાર આ ઘટનામાં એક હેલિકોપ્ટર સંપૂર્ણપણે ક્રેશ થયું હતું. જ્યારે બીજું હેલિકોપ્ટર રેતીની વચ્ચે ઉતરવામાં સફળ રહ્યું હતું, પરંતુ તે હેલિકોપ્ટરના કોઈ પણ મુસાફરને કોઈ ગંભીર ઈજા થઈ ન હતી. આ ઘટના બાદ તરત જ ત્યાં હાજર લોકોએ એક વીડિયો બનાવીને સોશિયલ મીડિયા પર શેર કર્યો છે.
