પ્રવાસીઓનો ધસારો / નદી, ડુંગરાળ વિસ્તાર અને કાશ્મીર જેવી શિકારા બોટ: ગુજરાતની નજીકમાં જ વેકેશન માણવાની બેસ્ટ જગ્યા

• દાદરાનગર હવેલીનું દૂધની પ્રવાસીઓ માટે સ્વર્ગ સમાન
• દમણ ગંગા નદીનો ભવ્ય નજારો અને ડુંગરાળ વિસ્તાર
• ગુજરાત અને મહારાષ્ટ્રથી પ્રવાસીઓ ઉમટ્યા
• પ્રવાસીઓ બોટિંગની માણી રહ્યા છે મજા

રાજ્યમાં અત્યારે કાળઝાળ ગરમી પડી રહી છે. આથી લોકો ગરમીથી રાહત મેળવવા ઠંડા વિસ્તારોની મુલાકાત લઈ રહ્યા છે. સાથે જ વેકેશન ચાલી રહ્યું હોવાથી ગુજરાતને અડીને આવેલ દાદરા નગર હવેલી પ્રવાસીઓ માટે સ્વર્ગ સમાન સાબિત થઇ રહ્યું છે. જંગલ અને ડુંગરાળ પ્રદેશ વચ્ચે અંતરિયાળ જંગલ વિસ્તારમાં આવેલ દૂધનીનું કુદરતી સૌંદર્ય પ્રવાસીઓને મીની કાશ્મીરનો અનુભવ કરાવી રહ્યું છે. દાદરાનગર હવેલીના દૂધની લેક પર પ્રવાસીઓનો ધસારો જોવા મળી રહ્યો છે. વેકેશન હોવાથી અહીં મોટી સંખ્યામાં પ્રવાસીઓ ઉમટી પડ્યા છે. પહાડો, નદી અને જળાશયની સાથે અન્ય કુદરતી આકર્ષણને કારણે દૂધની પર્યટકોનું મન મોહી રહ્યું છે.

દૂધની પર્યટકો માટે સ્વર્ગ સમાન 
ગુજરાતને અડીને આવેલ દાદરાનગર હવેલીનો જંગલ વિસ્તાર પ્રવાસન માટે મોકાની જગ્યા છે. સેલવાસથી 40 કિલોમીટર દૂર આવેલ દૂધની પર્યટકો માટે સ્વર્ગ સમાન છે. શહેરોમાં  કોંક્રિટના જંગલમાં રહેતા લોકો અસલી જંગલમાં આવીને ભાવવિભોર બની જાય છે. એક તરફ દમણ ગંગા નદીનો ભવ્ય નજારો અને બીજી તરફ ડુંગરાળ વિસ્તારવાળું પ્રવાસન માટે મોકાની જગ્યા બની ગયું છે. રાજ્યમાં અત્યારે કાળઝાળ ગરમી પડી રહી છે. આથી લોકો ઠંડા સ્થળોએ વેકેશનની મજા માણવા જઈ રહ્યા છે. ત્યારે ગુજરાત સહિત મહારાષ્ટ્રના લોકોને ફરવા માટે દાદરાનગર હવેલીનું દૂધની ખૂબ માફક આવી રહ્યું છે. સુરતથી 150 કિલોમીટર દૂર આવેલ દાદરાનગર હવેલીમાં મોટી સંખ્યામાં પ્રવાસીઓ ઉમટી રહ્યા છે. દૂધની જળાશયમાં હાલ 160થી વધારે રંગબેરંગી શિકારા બોટ પ્રવાસીઓમાં ભારે આકર્ષણ જમાવી રહી છે.

શિકારાઓ જેવી બોટ દૂધની જળાશયનું ખાસ આકર્ષણ
દમણ ગંગા નદી કિનારે આવેલ દૂધની ગામનો પ્રવાસન તરીકે વિકાસ થયો છે. અહીંયા મોટા પ્રમાણમાં રગબેરંગી બોટીંગની સુવિધા શરૂ કરવામાં આવેલ છે. અહીં આવતા પ્રવાસીઓ નદી કિનારે એક દિવસીય પિકનિકનો આનંદ માણે છે. એમાંય અત્યારે તો દમણગંગા નદીના શાંત અને શીતળ જળમાં નૌકા વિહારનો આનંદ પ્રવાસીઓ માટે એક યાદગાર સંભારણું બની જાય છે. કાશ્મીરની ડલ ઝીલમાં જોવા મળતી શિકારાઓ જેવી જ બોટ દૂધની જળાશયનું ખાસ આકર્ષણ છે. પહાડો વચ્ચે દૂધની જળાશયમાં બોટિંગની મઝા માણતા લોકો કાશ્મીર જેવા સ્વર્ગનો અનુભવ માણી  રહ્યા છે.

સ્થાનિક લોકોને મળી રહી છે રોજગારી 
દાદરાનગર હવેલીના અંતરીયાળ વિસ્તારમાં આવેલ દૂધની અને તેની આસપાસના વિસ્તારમાં અગાઉ રોજગારી એક મોટો પ્રશ્ન હતો. જોકે, છેલ્લા એક દશકથી સ્થાનિક લોકોએ દમણગંગા નદીમાં બોટિંગની શરૂઆત કરતા રોજગારી માટે હિજરત કરતા આદિવાસી લોકોને હવે માદરે વતનમાં જ રોજગારી મળી રહી છે. દૂધનીમાં શરૂ થયેલ વોટર ટૂરિઝમના કારણે સ્થાનિક લોકોને રોજગારી મળી રહી છે. સાથે હવે હોટેલ ઉદ્યોગ પણ વિકાસ પામી રહ્યો છે. તેમજ આજુબાજુ વિસ્તારમાં આવેલ નાની-નાની દુકાનો અને ઢાબાઓ દ્વારા પણ સ્થાનિક લોકો રોજગારી મેળવી રહ્યા છે. દમણ ગંગા નદી પર બાંધવામાં આવેલ મધુબન ડેમના કારણે દૂધનીમાં બારેમાસ પાણી સચવાઇ રહે છે.