- એલ.ડી.એન્જિ. કેમ્પસમાં હોસ્ટેલ કે કબૂતરખાનું
- વિધાર્થીઓના રહેણાકમાં બંધાઈ ગયા માળા
- ત્રણ વર્ષ પહેલા બનેલી હોસ્ટેલનું ઉદ્ઘાટન જ નથી થયું
ગુજરાતમાં વિકાસને વરેલી સરકારના પ્રયાસથી કરોડો રૂપિયાના ખર્ચે કોઈ કાર્ય થઈ તો જાય છે.. પરંતુ પછી તેની સામે કોઈ ધ્યાન નથી આપતું.. આવું જ કાંઈક અમદાવાદમાં સામે આવ્યું છે.. જ્યાં અંદાજીત 3 વર્ષ પહેલા એલ.ડી.એન્જિનિયરિંગ કોલેજ કેમ્પસમાં વિદ્યાર્થીઓ માટે કરોડોના ખર્ચે અત્યાધુનિક હોસ્ટેલ તો બની ગઈ. પરંતુ આજ સુધી તે હોસ્ટેલ શરૂ જ નથી થઈ.એવું લાગે છે જાણે હોસ્ટેલ પક્ષી ઘર બની ગઈ છે. ત્યારે કેવી છે પક્ષીઘર બની ગયેલી અત્યાધુનિક હોસ્ટેલની હાલત.
અમદાવાદમાં એલ.ડી. એન્જિનિયરીંગ કેમ્પસ ખાતે વિદ્યાર્થીઓની સવલત માટે એક હોસ્ટેલ બનાવવામાં આવી છે. આ હોસ્ટેલ હકીકતમાં તો કરોડોના ખર્ચે ત્રણ વર્ષ પહેલા જ બની ગઈ હતી.. પરંતુ તેનો કોઈપણ રીતે ઉપયોગ ન થતાં ખંડેર હાલતમાં જોવા મળી રહી છે.. કારણ કે, હોસ્ટેલમાં પક્ષીઓના માળા જોવા મળે છે.. છતના પોપડા ઉખડી પડ્યા છે.. ફાયર સેફ્ટીના સાધનો પણ ધૂળ અને કાટ ખાઈ રહ્યા છે. તેવામાં અંદાજ લગાવી શકાય છે કે, કરોડોના ખર્ચે બનેલી આ હોસ્ટેલનું કેવી રીતે મેન્ટેનન્સ થઈ રહ્યું છે.
મહત્વનું છે કે, આ 6 માળની હોસ્ટેલનું નિર્માણ 3 વર્ષ પહેલા જ પૂર્ણ થઈ ગયું છે. અને આ હોસ્ટેલમાં 400 વિદ્યાર્થીઓ રહી શકે તેવી વ્યવસ્થા કરવામાં આવી છે.. છેલ્લા ત્રણ વર્ષથી વિદ્યાર્થીઓ ભાડે રહેવા મજબૂર છે.. હાલના સમયમાં ઓફલાઈન કોલેજો પણ શરૂ થઈ છે. પરંતુ હોસ્ટેલ ખોલવામાં ન આવતા વિદ્યાર્થીઓને ભારે મુશ્કેલી પડી રહી છે. કારણ કે, બહાર રહેવું અને જમવું તેમને મોંઘું પડે છે.. વિદ્યાર્થીઓના આક્ષેપ છે કે, નવી હોસ્ટેલ ઉદ્ઘાટનના અભાવે હાલમાં પક્ષીઘર બની ગઈ છે. અને સત્તાધિશોને વારંવાર રજૂઆતો કરવા છતાં પણ તેમને જાણે કોઈ ફરક ન પડતો હોય તેવું લાગી રહ્યું છે.. જોકે આ મુદ્દે અમે વિદ્યાર્થીઓ સાથે પણ વાતચીત કરવાનો પ્રયાસ કર્યો.
આ હોસ્ટેલને પક્ષીઘર એટલા માટે નામ આપ્યું છે કારણ કે, અહીં વિદ્યાર્થીઓ રહેતા નથી. જેથી પક્ષીઓએ માળા બાંધી હોસ્ટેલને ઘર બનાવી લીધી છે. મેન્ટેનન્સ ન થતું હોવાના કારણે પણ હોસ્પેટલની હાલત ખરાબ જોઈ શકાય છે. ત્યારે સવાલ એ થાય છે કે, કેમ ત્રણ વર્ષ પહેલા બનેલી હોસ્ટેલ હજૂ શરૂ નથી કરાઈ? કરોડો રૂપિયાના ખર્ચે બનેલી હોસ્ટેલ કેમ ધૂળ ખાય છે? સત્તાધિશો હોસ્ટેલ શરૂ કરવા માટે કોની પરવાનગીની રાહ જોઈ રહ્યા છે? શું કોઈ નેતા આવીને ફોટા પડાવશે ત્યારે જ હોસ્ટેલ શરૂ કરાશે? મોંઘા ભાડા આપીને રહેતા વિદ્યાર્થીઓની મુશ્કેલીઓ ક્યારે સમજાશે? સવાલો તો અહીં વિદ્યાર્થીઓના મનમાં અઢળક છે.. પરંતુ હાલ મહત્વનું છે હોસ્ટેલને શરૂ કરવી.
