ગજબ ઈનોવેશન / ચૂડેલ ચા, તાંત્રિક ચા, ડાકણ ચા..અમદાવાદમાં સ્મશાનગૃહમાં ચાલે છે ‘ભયાનક ટી સ્ટોલ’, ચાની ચૂસકી માણવા લાગે છે લાઈનો

• અમદાવાદનાં સરદારનગરમાં આવેલ ટી સ્ટોલ બન્યો આકર્ષણનું કેન્દ્ર
• સરદારનગરના ભદ્રેશ્વર સ્મશાનગૃહમાં ચાલે છે ટી સ્ટોલ
• સ્ટોલ પર ભૂત કોફી અને કંકાલ બિસ્કિટ પણ મળે છે

ચાની ચૂસકી વિના અમદાવાદીઓનાં જાણે તમામ કામ અધૂરાં રહે છે. અમદાવાદના કોઈ પણ વિસ્તારમાં જશો તમને ચાની ટપરી અવશ્ય મળી આવશે અને તેમાં પણ કેટલીક ટપરીની ચા તો ખૂબ જ પ્રખ્યાત પણ હોય છે ત્યારે અમદાવાદના સરદારનગરમાં આવેલો એક ટી સ્ટોલ પણ લોકોના આકર્ષણનું કેન્દ્ર બન્યો છે, કેમ કે તેનું નામ છે ‘ભયાનક ટી સ્ટોલ’. અહીં લોકોને મળે છે-ચૂડેલ ચા, તાંત્રિક ચા, ડાકણ ચા, ભૂત ચા, મડદા ચા, વિરાના ચા, જેને પીવામાં લોકોને આનંદ પણ આવે છે. અમદાવાદના આ સ્પેશિયલ ટી સ્ટોલની વાત કરીએ તો સ્થળનું નામ જાણીને પણ તમને ખૂબ જ નવાઈ લાગશે. અમદાવાદના સરદારનગર વિસ્તારમાં આવેલા ભદ્રેશ્વર સ્મશાનગૃહમાં આ ટી સ્ટોલ ચાલે છે. અહીં સ્પેશિયલ પ્રેતાત્મા ચા, સ્પેશિયલ કબ્રસ્તાન ચા, સ્પેશિયલ અસ્થિ ચા, ચૂડેલ ચા, તાંત્રિક ચા, ડાકણ ચા, ભૂત ચા, મડદા ચા, વિરાના ચા વેચાય છે એટલું જ નહીં, આ સ્ટોલ પર ભૂત કોફી અને કંકાલ બિસ્કિટ પણ મળે છે.