Business / ગ્રીન સિગ્નલ સાથે ખુલ્યું શેર માર્કેટ, નિફ્ટી 24285 અને સેંસેક્સ 77629ની સપાટીએ થઈ રહ્યા છે ટ્રેડ

શ્રાવણના બીજા સોમવારે શેરબજારમાં હરિયાળી જોવા મળી રહી છે. સપ્તાહના પ્રથમ કારોબારી દિવસે દલાલ સ્ટ્રીટના બેન્ચમાર્ક સૂચકાંકો સેન્સેક્સ અને નિફ્ટી 50 લીલા નિશાન સાથે ખુલ્યા હતા. બજાર ખુલતાની સાથે જ રોકાણકારોમાં સકારાત્મક માહોલ જોવા મળ્યો હતો. BSEનો 30 શેરનો સંવેદનશીલ સૂચકાંક સેન્સેક્સ 88 પોઈન્ટના વધારા સાથે 77,629ના સ્તરે ખુલ્યો હતો. બીજી તરફ, NSEનો 50 શેરનો બેન્ચમાર્ક સૂચકાંક નિફ્ટી 50 સોમવારના વેપારની શરૂઆત 33 પોઈન્ટના વધારા સાથે 24,285ના સ્તરે કરી હતી.

ભારતીય શેરબજારની શરૂઆત સકારાત્મક રહી હોવા છતાં એશિયાના અન્ય બજારોમાં મિશ્ર માહોલ જોવા મળ્યો હતો. MSCIનો એશિયા-પેસિફિક ઇન્ડેક્સ 0.1 ટકા ઘટ્યો હતો. દક્ષિણ કોરિયાનો કોસ્પી પણ 1.66 ટકા ઘટ્યો હતો. જાપાનના શેરબજારમાં નિક્કી 225 ઇન્ડેક્સ 0.49 ટકા ઘટ્યો હતો, જ્યારે ટોપિક્સ ઇન્ડેક્સ 0.16 ટકા વધ્યો હતો. આ દરમિયાન હેંગ સેંગ ફ્યુચર્સમાં પણ 0.5 ટકાનો ઘટાડો નોંધાયો હતો. એટલે કે એશિયાના બજારોમાં શરૂઆતના કારોબારમાં એકંદરે મિશ્ર સંકેતો જોવા મળ્યા હતા.

GIFT નિફ્ટીના સંકેતો જોકે સારા રહ્યા

ભારતીય શેરબજાર માટે GIFT નિફ્ટીના સંકેતો જોકે સારા રહ્યા હતા. GIFT નિફ્ટી 24,329.50ના સ્તરની આસપાસ ટ્રેડ કરી રહ્યો હતો. આ સ્તર નિફ્ટી ફ્યુચર્સના પાછલા બંધ કરતાં લગભગ 43.50 પોઈન્ટ ઉપર હતું. GIFT નિફ્ટીમાં જોવા મળેલા આ વધારાને ભારતીય શેરબજારના સૂચકાંકો માટે સકારાત્મક શરૂઆતના સંકેત તરીકે જોવામાં આવી રહ્યો હતો. તેની અસર પણ બજારની શરૂઆતમાં જોવા મળી અને સેન્સેક્સ તથા નિફ્ટી બંને વધારા સાથે ખુલ્યા હતા.

ઓઇલના ભાવમાં 1 ટકાથી વધુનો ઘટાડો નોંધાયો

બીજી તરફ સોમવારે ક્રૂડ ઓઇલના ભાવમાં 1 ટકાથી વધુનો ઘટાડો નોંધાયો હતો. વોશિંગ્ટન દ્વારા ઇરાન પર વધુ પ્રતિબંધોની જાહેરાત કરવામાં આવે તે પહેલાં રોકાણકારોએ નફો બુક કર્યો હતો. મધ્ય પૂર્વમાંથી ક્રૂડ ઓઇલના સપ્લાયમાં વિક્ષેપ ઊભો થવાની શક્યતાને ધ્યાનમાં રાખીને બજારમાં ક્રૂડના ભાવ પર નજર રહી હતી. બ્રેન્ટ ક્રૂડ ફ્યુચર્સ 1.22 ડોલર એટલે કે 1.29 ટકા ઘટીને પ્રતિ બેરલ 93.17 ડોલર થયા હતા. જ્યારે અમેરિકાના વેસ્ટ ટેક્સાસ ઇન્ટરમિડિયેટ એટલે કે WTI ક્રૂડના ભાવમાં પણ ઘટાડો જોવા મળ્યો હતો. WTI ક્રૂડ 1.20 ડોલર એટલે કે 1.38 ટકા ઘટીને પ્રતિ બેરલ 85.86 ડોલર થયો હતો.

આ પણ વાંચો : તહેવારો પૂર્વે ખાદ્યતેલોની આયાત વધતાં દસ મહિનાનો રેકોર્ડ તૂટ્યો

આ ઉપરાંત સોમવારે સોનાના ભાવમાં પણ મજબૂતી જોવા મળી હતી. સોનાના ભાવ ત્રણ મહિનાથી વધુ સમયગાળાના ઉચ્ચતમ સ્તરે પહોંચ્યા હતા. સ્પોટ ગોલ્ડ 0.7 ટકા વધીને 4,636.34 ડોલર પ્રતિ ઔંસ પર પહોંચ્યું હતું. આ 15 મે બાદનું સૌથી ઊંચું સ્તર હતું. બીજી તરફ, યુએસ ગોલ્ડ ફ્યુચર્સ પણ 0.3 ટકા વધીને 4,694.80 ડોલર પર પહોંચી ગયા હતા. આમ, એક તરફ ભારતીય શેરબજારમાં સેન્સેક્સ અને નિફ્ટી વધારા સાથે ખુલ્યા હતા, તો બીજી તરફ આંતરરાષ્ટ્રીય બજારોમાં ક્રૂડ ઓઇલના ભાવમાં ઘટાડો અને સોનાના ભાવમાં વધારો જોવા મળ્યો હતો. હવે દિવસ દરમિયાન રોકાણકારોની નજર વૈશ્વિક બજારોના સંકેતો, ક્રૂડ ઓઇલના ભાવ અને અન્ય આર્થિક પરિબળો પર રહેશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ