T20 World Cup / IND vs ENG : મુંબઈમાં સેમિફાઇનલ પહેલા ટીમ ઇન્ડિયા માટે સામે આવ્યા ગુડ ન્યૂઝ

India vs England Mumbai Weather Update : ICC T20 World Cupના બીજા સેમિફાઇનલમાં ભારત અને ઈંગ્લેન્ડની ટીમ આમને-સામને ટકરાશે. આ મહત્વપૂર્ણ મેચ મુંબઈના વાનખેડે સ્ટેડિયમ (Wankhede Stadium) ખાતે રમાશે. જેને લઈને ચાહકોમાં ભારે ઉત્સાહ છે. મેચ પહેલા વરસાદની આશંકાને કારણે ચિંતા હતી. કારણ કે આ ટૂર્નામેન્ટમાં અગાઉ પણ કેટલીક મેચ વરસાદને કારણે રદ થઈ ચૂકી છે.

જો વરસાદને કારણે સેમિફાઇનલ રદ થાય તો ટીમ ઈન્ડિયાને મોટો ફટકો પડી શકે છે. જોકે હવે હવામાન વિભાગ તરફથી સારા સમાચાર મળ્યા છે. 5 માર્ચે મુંબઈમાં વરસાદની શક્યતા 0 ટકા બતાવવામાં આવી છે. દિવસભર આકાશ સ્વચ્છ રહેવાની આગાહી છે. એટલે મેચ નિરાંતે પૂર્ણ થવાની સંભાવના વધારે છે.

હવામાન મુજબ તે દિવસે તાપમાન 25°C થી 28°C વચ્ચે રહેશે. ભેજનો સ્તર આશરે 35% આસપાસ રહેવાની ધારણા છે. એટલે ખેલાડીઓ અને દર્શકોને વધારે ભેજનો તકલીફદાયક અનુભવ થવાની શક્યતા ઓછી છે. આમ હવામાન ક્રિકેટ માટે અનુકૂળ રહેશે.

ઉત્તર દિશાથી લગભગ 18 માઇલ પ્રતિ કલાકની ઝડપે પવન ફૂંકાવાની સંભાવના છે. સાંજના સમયે આ ઠંડી હવા માહોલને વધુ આનંદદાયક બનાવશે. આવી પરિસ્થિતિમાં ખેલાડીઓને રમત રમવામાં સરળતા રહેશે અને દર્શકો પણ મેચનો આનંદ લઈ શકશે.

આ પણ વાંચો: ...તો એક જ દિવસમાં રમાશે બે સેમિફાઇનલ! જાણો શું છે ICCનો આ નિયમ?

તમારી માહિતી માટે ICC દ્વારા સેમિફાઇનલ માટે રિઝર્વ ડે પણ રાખવામાં આવ્યો છે. જો 5 માર્ચે કોઈ કારણસર મેચ નહીં રમાઈ શકે તો 6 માર્ચે મેચ યોજાશે. પરંતુ જો રિઝર્વ ડે પર પણ મેચ શક્ય નહીં બને તો ICCના નિયમો મુજબ ટીમ ઈન્ડિયા બહાર થઈ શકે છે અને ઇંગ્લેન્ડને સીધો ફાઇનલમાં પ્રવેશ મળી શકે છે. તેથી આ મેચ બંને ટીમો માટે અત્યંત મહત્વપૂર્ણ બની ગઈ છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ