રાજકારણ / શરદ પવારને મોદી કેબિનેટમાં આ મંત્રી બનાવવાની ઑફર: મોટા નેતાના દાવાથી મહારાષ્ટ્રમાં ખળભળાટ

• મહારાષ્ટ્રમાં દિવસેને દિવસે ગરમાઈ રહ્યું છે રાજકારણ 
• અજિત પવાર અને શરદ પવારની મુલાકાત બાદ મામલો ગરમાયો 
• શરદ પવારને મોદી કેબિનેટમાં આ મંત્રી બનાવવાની ઑફર

શરદ પવાર સમાચાર: મહારાષ્ટ્રમાં દિવસેને દિવસે રાજકારણ ગરમાઈ રહ્યું છે. આ દરમિયાન તાજેતરમાં શરદ પવાર અને અજિત પવાર વચ્ચે પુણેમાં એક ઉદ્યોગપતિના નિવાસસ્થાને થયેલી ગુપ્ત બેઠકથી રાજકીય વર્તુળોમાં અનેક ચર્ચાઓને વેગ મળ્યો છે. આ બેઠકમાં રાષ્ટ્રવાદી કોંગ્રેસ પાર્ટીના વરિષ્ઠ નેતા જયંત પાટીલ પણ હાજર હતા. મહારાષ્ટ્રના નાયબ મુખ્યમંત્રી અજિત પવાર અને તેમના કાકા શરદ પવારની આ મુલાકાત મહારાષ્ટ્રના રાજકારણમાં ચર્ચાનો વિષય બની છે. 

પુણેમાં ઉદ્યોગપતિના નિવાસસ્થાને થયેલી ગુપ્ત બેઠક બાદ હવે અજિત પવારનું નિવેદન સામે આવ્યું છે. અજીત પવારે કહ્યું કે, 'પવાર સાહેબ (શરદ પવાર) પહેલેથી જ સ્પષ્ટતા કરી ચૂક્યા છે. પરિવારના સભ્યો વચ્ચેની મુલાકાતને મીડિયા વિવિધ પ્રકારની પ્રસિદ્ધિ આપી રહ્યું છે જેનાથી મૂંઝવણ ઊભી થઈ રહી છે.  એવું વિચારવાનું કોઈ કારણ નથી કે મીટિંગમાં કંઈપણ અસામાન્ય બન્યું. 

મીડિયા અહેવાલો મુજબ કોંગ્રેસના ભૂતપૂર્વ મુખ્યપ્રધાનનું માનીએ તો અજિત પવારે શરદ પવાર સાથેની તેમની 'ગુપ્ત બેઠક' દરમિયાન 2024ની લોકસભાની ચૂંટણીમાં ભાજપને સમર્થન આપવા માટે NCPના વડાને બે ચોક્કસ પ્રસ્તાવ મૂક્યા હતા. ભૂતપૂર્વ મુખ્યપ્રધાનના જણાવ્યા અનુસાર અજિતે તેમના કાકાને કહ્યું કે, તેમને કેન્દ્રીય કેબિનેટમાં કૃષિ પ્રધાન અથવા નીતિ આયોગના અધ્યક્ષ તરીકે સ્થાન આપવામાં આવશે. જ્યારે સુપ્રિયા સુલે અને જયંત પાટીલને અનુક્રમે કેન્દ્ર અને રાજ્ય સરકારમાં સ્થાન આપવામાં આવશે.

પવાર વિના લોકસભાની 35 બેઠકો જીતવી અશક્ય
ભૂતપૂર્વ મુખ્યપ્રધાને નામ ન આપવાની શરતે જણાવ્યું હતું કે, પવારે તેને સ્પષ્ટપણે નકારી કાઢ્યું હતું અને કહ્યું હતું કે, તેઓ કોઈપણ રીતે ભાજપ સાથે જોડાણ નહીં કરે. તેમણે કહ્યું, ભાજપ જાણે છે કે તે પવાર વિના લોકસભાની 35 બેઠકો જીતી શકે નહીં.

પૃથ્વીરાજ ચવ્હાણે નારાજગી વ્યક્ત કરી હતી
અજિત પવારની શનિવારે પુણેમાં ડેવલપરના ઘરે તેમના કાકા શરદ પવાર સાથેની 'ગુપ્ત મુલાકાત'એ રાજકીય વર્તુળોમાં હલચલ મચાવી દીધી છે. એમપીસીસીના પ્રમુખ નાના પટોલે, યુબીટી શિવસેના પ્રમુખ ઉદ્ધવ ઠાકરે અને કોંગ્રેસના પૂર્વ મુખ્યમંત્રી પૃથ્વીરાજ ચવ્હાણે આ બેઠક પર નારાજગી વ્યક્ત કરી હતી. કોંગ્રેસ અને યુબીટી સેનાએ દલીલ કરી હતી કે શરદ પવાર માટે તેમના ભત્રીજાને મળવું ખોટું હતું, જેમણે ભાજપ સાથે હાથ મિલાવ્યા છે. શિંદે-ફડણવીસ સરકારમાં અજિત પવાર નાયબ મુખ્યમંત્રી બન્યા, જે ખોટું છે. મહા વિકાસ આઘાડી ભાજપ વિરુદ્ધ મિશન ચલાવી રહી છે.

અજિત અને શરદ પવારે સ્પષ્ટતા કરી
આ તરફ અજિત અને શરદ પવાર બંનેએ કહ્યું કે, તેમના સંબંધીઓને મળવામાં કંઈ ખોટું નથી. શરદ પવારે પૂછ્યું, 'અજિત પવાર મારા ભત્રીજા છે. કાકા-ભત્રીજાની મુલાકાતને લઈને આટલો બધો હંગામો કેમ? પરંતુ પટોલેએ જણાવ્યું હતું કે, બેઠક સ્વીકાર્ય નથી. UBT સેના અને પટોલેના સંજય રાઉતે જણાવ્યું હતું કે રવિવારે ઉદ્ધવ ઠાકરે અને પટોલે વચ્ચેની ચર્ચામાં પવારોની બેઠક થઈ હતી.