- મોરેશિયસમાં ચક્રવાત ફ્રેડીનો કહેર ઝંઝાવાતી પવનનો ભારે ખતરો
- અનેક ફ્લાઇટ રદ જનજીવન અસ્તવ્યસ્ત સ્ટોક એક્સચેન્જ બંધ
- હવામાન વિભાગે આ ચક્રવાતને વર્ગ-૩ શ્રેણીનું ચક્રવાત ગણાવ્યું છે
મોરેશિયસમાં વિનાશક વાવાઝોડાએ મોટું સંકટ ઊભું કર્યું છે. ગઈ કાલે ફ્રેડી નામના ચક્રવાતથી થયેલા ભારે વરસાદને કારણે મોરેશિયસમાં જનજીવન અસ્તવ્યસ્ત થઈ ગયું હતું. હવામાન વિભાગ દ્વારા પણ ભયાનક ચેતવણી આપવામાં આવી છે. હવામાન વિભાગ અનુસાર ચક્રવાતને કારણે પવનની ઝડપ ૨૮૦ કિલોમીટર પ્રતિ કલાક સુધી પહોંચી શકે છે. હવામાન વિભાગે આ ચક્રવાતને વર્ગ-૩ શ્રેણીનું ચક્રવાત ગણાવ્યું છે.
ઘરની બહાર નીકળવા પર પણ પ્રતિબંધ મૂકવામાં આવ્યો
મોરેશિયસમાં ચક્રવાતનાં જોખમને ધ્યાનમાં રાખીને મોટાભાગની ફ્લાઇટ્સ રદ્દ કરવામાં આવી છે. સ્ટોક એક્સચેન્જને બંધ કરી દેવાયાં છે. લોકોને જરૂરિયાત વગર ઘરની બહાર નીકળવા પર પણ પ્રતિબંધ મૂકવામાં આવ્યો છે. પ્રાપ્ત અહેવાલો અનુસાર હાલમાં દેશમાં સરકારી સેવાઓ સ્થગિત કરી દેવામાં આવી છે. જાહેર સ્થળ, દુકાન, બેન્ક અને પેટ્રોલ સ્ટેશન પણ બંધ કરી દેવામાં આવ્યાં છે.
ચક્રવાતની આગાહીના આગલે લોકોમાં ભારે ડરનો માહોલ
જાહેર પરિવહન પણ સ્થગિત કરી દેવામાં આવ્યું છે. હવામાન એજન્સીના જણાવ્યા અનુસાર ફ્રેડી ચક્રવાત ફ્રેડી આઇલેન્ડ નજીક ઉત્તરમાં લગભગ ૧૨૦ કિલોમીટરના અંતરે પસાર થયું હતું અને હવે લગભગ ૩૦ કિલોમીટર પ્રતિ કલાકની ઝડપે પશ્ચિમ-દક્ષિણ પશ્ચિમ તરફ આગળ વધી રહ્યું છે. ચક્રવાતની આગાહીના આગલે લોકોમાં ભારે ડરનો માહોલ ઊભો થયો છે. જે અંગે સરકાર તરફથી સુરક્ષાનાં તમામ પગલાં લેવામાં આવી રહ્યાં છે.
