મનોરંજન / સલમાન ખાનની ફિલ્મની ટિકિટ 11 રૂપિયામાં મળશે, કરી ઘોષણા

અભિનેતા સલમાન ખાનની આગામી યુદ્ધ આધારિત ફિલ્મ 'માતૃભૂમિ'ના ટ્રેલર લોન્ચ પ્રસંગે એક મોટી જાહેરાત કરવામાં આવી છે. લાંબા સમયથી અટવાયેલી આ ફિલ્મ હવે સિનેમાઘરોમાં રિલીઝ થવા માટે સંપૂર્ણપણે તૈયાર છે. ફિલ્મના ટ્રેલર લોન્ચ ઈવેન્ટમાં મીડિયા સમક્ષ ફિલ્મની સમગ્ર સ્ટારકાસ્ટ ઉપસ્થિત રહી હતી, જ્યાં સલમાન ખાને ફિલ્મને લઈને ઉઠેલા વિવિધ સવાલોના ખુલાસા કર્યા હતા અને વરિષ્ઠ નાગરિકો માટે એક વિશેષ ટિકિટ ઓફરની જાહેરાત પણ કરી હતી.

વરિષ્ઠ નાગરિકો માટે વિશેષ ટિકિટ ઓફરની જાહેરાત કરતા સલમાન ખાને જણાવ્યું હતું કે, જે પણ લોકોની ઉંમર 75 વર્ષ કે તેથી વધુ હશે, તેઓ આ ફિલ્મ માત્ર 11 રૂપિયામાં જોઈ શકશે. આ વિશેષ છૂટ માત્ર 75 વર્ષથી વધુ વયના વરિષ્ઠ નાગરિકો માટે જ લાગુ રહેશે.

આ પ્રસંગે સલમાન ખાને ફિલ્મ 'માતૃભૂમિ' પર ઉઠેલા વિવાદો અને સવાલોના જવાબ આપ્યા હતા. પટકથા એટલે કે સ્ક્રિપ્ટમાં ફેરફાર કરવાના દાવાઓને ફગાવતા તેમણે સ્પષ્ટ કર્યું હતું કે સરકાર તરફથી તેમની પર કોઈપણ પ્રકારનું દબાણ નહોતું અને આ તમામ દાવાઓ પાયાવિહોણા છે. તેમણે જણાવ્યું હતું કે આ ફિલ્મ સેનાના અધિકારીઓ અને તેમના પરિવારોના સંઘર્ષની ગાથા રજૂ કરે છે. ફિલ્મમાં એવા પડકારજનક અને મુશ્કેલ સંજોગો દર્શાવવામાં આવ્યા છે, જેમાં સેનાના અધિકારીઓ પોતાના પરિવાર કરતાં દેશને હંમેશાં પ્રાથમિકતા આપે છે.

ફિલ્મની રિલીઝમાં થયેલા વિલંબ અંગે વાત કરતા સલમાન ખાને ખુલાસો કર્યો હતો કે વિઝ્યુઅલ ઇફેક્ટ્સ એટલે કે VFXના કામમાં સમય લાગવાને કારણે ફિલ્મની રિલીઝ પાછળ ગઈ હતી. જોકે, હવે આ ફિલ્મ આગામી 4 ડિસેમ્બરના રોજ સિનેમાઘરોમાં રિલીઝ થવાની છે. હાલ મેકર્સ દ્વારા ફિલ્મના બાકી રહેલા VFX પર કામ ચાલી રહ્યું છે, જેના કારણે 'માતૃભૂમિ'નું ટ્રેલર સોશિયલ મીડિયા પર થોડા દિવસો પછી રિલીઝ કરવામાં આવશે.

આ પણ વાંચોઃ મનોરંજન / ગોવિંદાની પત્ની સુનિતાએ દુઃખ વ્યક્ત કરતાં કહ્યું, "હવે ઘર સુમસામ લાગે છે"

અપૂર્વ લાખિયા દ્વારા નિર્દેશિત આ ફિલ્મમાં સલમાન ખાનની સાથે અભિનેત્રી ચિત્રાંગદા સિંહ પણ મુખ્ય ભૂમિકામાં નજરે પડશે. આગામી 4 ડિસેમ્બરે બોક્સ ઓફિસ પર સલમાન ખાનની આ ફિલ્મની સીધી ટક્કર શ્રદ્ધા કપૂરની ફિલ્મ 'ઈઠા' સાથે થવાની છે. શ્રદ્ધા કપૂરની આ ફિલ્મનો ક્રેઝ અત્યારથી જ દર્શકોમાં ભારે ચર્ચાનો વિષય બન્યો છે. હવે એ જોવું રસપ્રદ રહેશે કે સલમાન ખાન પોતાની આ નવી ફિલ્મ દ્વારા દર્શકોને આશ્ચર્યચકિત કરવામાં કેટલા સફળ થાય છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ