- યુક્રેન સાથેના યુદ્ધને એક વર્ષ પૂર્ણ થાય તે પહેલા રશિયાના રાષ્ટ્રપતિનું નિવેદન
- રાષ્ટ્રપતિ વ્લાદિમીર પુતિને કહ્યું તેઓ ટૂંક સમયમાં યુદ્ધ સમાપ્ત કરવા માંગે છે
- ગમે તે રસ્તો હોય, તમામ સંઘર્ષોનો અંત આવે, દુશ્મનને આ વાત જેટલી જલ્દી સમજાય તેટલું સારું: પુતિન
યુક્રેન સાથેના યુદ્ધને એક વર્ષ પૂર્ણ થાય તે પહેલા રશિયાના રાષ્ટ્રપતિ વ્લાદિમીર પુતિને ગુરુવારે જાહેરાત કરી છે કે, તેઓ ટૂંક સમયમાં યુદ્ધ સમાપ્ત કરવા માંગે છે. યુક્રેનના રાષ્ટ્રપતિ ઝેલેન્સકીની યુએસ મુલાકાત બાદ પુતિને મીડિયા સાથે વાત કરી હતી. આ દરમિયાન તેમણે કહ્યું કે,આ સંઘર્ષનો અંત લાવવાનો અમારો મુખ્ય ઉદ્દેશ્ય છે. અમે આ માટે પ્રયત્નો કરી રહ્યા છીએ અને કરતા રહીશું.
પુતિને કહ્યું કે, ગમે તે રસ્તો હોય, તમામ સંઘર્ષોનો અંત આવે છે. આપણા દુશ્મનને આ વાત જેટલી જલ્દી સમજાય તેટલું સારું. પુતિને જાહેરમાં યુક્રેનની વિશેષ સૈન્ય કાર્યવાહીને પ્રથમ વખત યુદ્ધ ગણાવ્યું હતું. મીડિયા સાથેની વાતચીત દરમિયાન તેણે અમેરિકા પર આરોપ લગાવ્યો કે, તે રશિયાને નબળા કરવા માટે યુક્રેનનો ઉપયોગ કરી રહ્યો છે.
અમેરિકાએ તાજેતરમાં એક જાહેરાત કરી છે કે, તે યુક્રેનને 15,000 કરોડ રૂપિયાની સહાય આપશે. જેમાં અમેરિકા તરફથી યુક્રેનને પેટ્રિઅટ મિસાઈલ ડિફેન્સ સિસ્ટમ પણ આપવામાં આવશે. પુતિને આ અંગે નિવેદન પણ આપ્યું છે. તેમણે કહ્યું કે,આનાથી યુદ્ધ પર કોઈ ખાસ અસર નહીં પડે. રશિયા તેની સાથે વ્યવહાર કરવા માટે ચોક્કસપણે કોઈ રસ્તો શોધી લેશે. જેઓ યુક્રેનને આવી મદદ કરી રહ્યા છે તેઓ આ સંઘર્ષને આગળ વધારી રહ્યા છે.
આ તરફ ઝેલેન્સકીએ કહ્યું કે, તેમની પાસે રશિયન રાષ્ટ્રપતિ વ્લાદિમીર પુતિનને મોકલવા માટે કોઈ સંદેશ નથી. ઝેલેન્સકીએ કહ્યું, અમારા જીવનનો નાશ કર્યા પછી હું તેમને કેવો સંદેશ મોકલી શકું ? તેઓ આપણને નષ્ટ કરી રહ્યા છે. રશિયાને લોકો સામે, યુરોપ સામે અને મુક્ત વિશ્વ સામે જવાબદાર ઠેરવવું જોઈએ.
