લોકસભા ચૂંટણી 2024 / ઉનાળાની ગરમીમાં ગુજરાતમાં ઠંડા મતદાનની શકયતા, પક્ષોએ આદરી તૈયારી, સવાર-સાંજનો મેગા પ્લાન તૈયાર

એપ્રિલ માસમાં ગરમીનો પારો ઉંચકાઈ રહ્યો છે. ત્યારે અમદાવાદ રાજકોટ સુરત અને મોટા શહેરો સાથે ગ્રામ્ય વિસ્તારમાં બપોરના 12 વાગ્યાથી સાંજના 5 કલાક સુઘી કોઇ વગર કામે નિકળતુ નથી અને રોડ રસ્તાઓ પણ સુમસામ ભાસી રહ્યા હોય છે. ત્યારે વર્તમાન પરિસ્થિતીને અને ગરમીને ઘ્યાનમાં રાખીને હવે રાજકીય પક્ષો પણ મતદાન માટે ચિંતિત બન્યા છે. ગુજરાતમાં વિધાનસભાની ચૂંટણી હમેંશા શિયાળાની સિઝનમાં હોય છે. ત્યારે બપોરના સમયે લોકો મતદાન કરવા માટે પહોંચતા હોય પરંતુ મે મહિનામાં ગુજરાતમાં વિપરીત પરિસ્થિતિ હોવાના કારણે હવે તો રાજકીય પક્ષના આગેવાનો ઉમેદવારો અને કાર્યકર્તાઓ પણ મતદાનને લઈને ચિંતિત બન્યા છે.

મતદાન મથકમાં ગરમીથી પરેશાની ન થાય તે માટે પણ ખાસ વ્યવસ્થાની માંગ

ગુજરાત ભાજપની વાત કરવામાં આવે તો ભાજપ પક્ષ દ્વારા વધુમાં વધુ મતદાન 12:00 વાગ્યા સુધી છે થઈ જાય તેવું આયોજન કરવામાં આવ્યું છે ત્યારે કોંગ્રેસ પક્ષે પણ 12:00 વાગ્યા પહેલા મતદાન થાય તે રીતનું આયોજન કરવામાં આવ્યું છે આમ બપોરે ભારે ગરમીના કારણે બંને પક્ષો હવે ચિંતિત બન્યા છે સાથે જ કોંગ્રેસ અને ભાજપ દ્વારા એવી પણ માંગ કરવામાં આવી છે કે મતદાન મથક ઉપર પાણીની વ્યવસ્થા અને છાંયડા માટે મંડપની વ્યવસ્થા હોવી જરૂરી છે જ્યારે આ તમામ વ્યવસ્થા અગાઉથી જ રાજ્ય ચૂંટણી પંચ દ્વારા કરી દેવામાં આવી છે આમ કોઈપણ મતદારને મતદાન કરતી વખતે અને મતદાન મથકમાં ગરમીથી પરેશાની ન થાય તે માટે પણ ખાસ વ્યવસ્થાની માંગ રાજકીય પક્ષો દ્વારા કરવામાં આવી છે. 

વધુ વાંચોઃ 26 લોકસભા અને 5 વિધાનસભા બેઠક માટે ચૂંટણીપંચે જાહેરનામું કર્યું પ્રસિદ્ધ, એક ક્લિકમાં જાણો તમામ વિગત

ભારે ગરમીમાં મતદાનને લઈને રાજકીય પક્ષો પણ ચિંતિત બન્યા

આમ તમામ રાજકીય પક્ષો પોતાની તરફી વધુમાં વધુ મતદાન થાય તે રીતનું આયોજન અત્યારથી જ કરી રહ્યા છે. પરંતુ પાંચમીના રોજ રવિવાર 6 તારીખે સોમવાર અને 7 મે  રોજ મતદાનનો દિવસ છે. જ્યારે 7 મે ના રોજ ગુજરાતના સામાન્ય વહીવટ વિભાગ દ્વારા પરિપત્ર બહાર પાડીને જાહેર રજા  જાહેર કરવામાં આવી છે. ઉપરાંત ઉનાળાનો વેકેશન હોવાથી પણ ત્રણ દિવસ સળંગ રજાનો સંયોગ બને છે. ત્યારે હવે આ રજાનો માહોલ અને ભારે ગરમીમાં મતદાનને લઈને રાજકીય પક્ષો પણ ચિંતિત બન્યા છે ત્યારે કેટલું મતદાન ભરપૂર ગરમીમાં થશે તે જોવાનું રહ્યું.

VTV Gujarati Newsની તમામ અપડેટ સૌથી પહેલા મેળ​વ​વા માટે અમારી WhatsApp ચેનલ ફોલો કરો