વિરપુરમાં શોક / જલારામ બાપાના પરિવારના વૈકુંઠવાસી હેમલતાબેનની અંતિમયાત્રામાં જોડાયા વિરપુરવાસીઓ, વેપાર-ધંધા સજ્જડ બંધ

• વિરપુરમાં શોકની લાગણી
• રસિકબાપાના ધર્મપત્નીનો દેહવિલય
• હેમલતાબેન ચંદ્રાણીનો 80 વર્ષની વયે દેહવિલય

 કરોડો ભક્તોની જ્યાં આસ્થા જોડાયેલ છે તેવા યાત્રાધામ વીરપુરમાં પૂ.જલારામ બાપાના પરિવારના હેમલતાબેન ચંદ્રાણીનો દેહવિલય થયો છે. રસિકબાપાના ધર્મપત્ની હેમલતાબેનનો 80 વર્ષની વયે દેહવિલય થયો છે.જેને પગલે વીરપુર પંથકના રહીશોમાં શોકની લાગણી ફેલાઈ છે. નોંધનીય છે કે હેમલતાબેન જલારામ બાપાની જગ્યાના ગાદીપતિ રઘુરામબાપા અને ભરતભાઈ ચંદ્રાણીના કાકી થતા હતા. 

નિવાસસ્થાનેથી અંતિમયાત્રા નીકળી

હેમલતાબેને અનંતની વાટ પકડતા તેમના પાર્થિવ દેહને ગઇકાલે અંતિમ દર્શન માટે રાખવામાં આવ્યો હતો. જેમાં હજારોની સંખ્યામાં લોકો જોડાયા હતા. ત્યારબાદ આજે ગુરૂવાર સવારે 9 વાગ્યે તેમની નિવાસસ્થાનેથી અંતિમયાત્રા નીકળી હતી. જેને લઈને સમગ્ર વીરપુરના વેપારીઓ પોતાના વેપાર-ધંધા બંધ રાખ્યા હતા અને ભારે શોક સાથે મોટી સંખ્યામાં વિરપુર પંથકવાસીઓ અંતિમયાત્રામાં જોડાયા હતા. હેમલતાબેનના નિધનથી જલારામબાપાના પરિવારજનોમાં શોકની લાગણી છવાઈ ગઈ છે.

શનિવારે હેમલતાબેન ચાંદ્રાણીની પ્રાર્થના સભા
આગામી તા. 21 ને શનિવારના રોજ હેમલતાબેન ચાંદ્રાણીની પ્રાર્થના સભા યોજાશે. જલારામ બાપાની જગ્યાની ધર્મશાળા શ્રી જલારામ અતિથિગૃહ ખાતે સાંજે 5.30 વાગ્યે પ્રાથનાસભા રાખવામાં આવશે. પ્રાથનાસભા દરમિયાન પણ પૂજ્ય બાપાની જગ્યામાં પૂજ્ય જલારામ બાપાના દર્શન અને અન્નક્ષેત્ર ભાવિકો માટે ખુલ્લા રાખવામાં આવશે તેમ જાહેર થયું છે.